Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani parmulaan ni harajaon ni si Joyakim, anak ni si Josia, raja ni Juda, roh ma hata on humbani Jahowa:
2 Sonon do hata ni Jahowa, “Jongjong ma ho bani alaman ni Rumah ni Jahowa, anjaha hatahon ma bani haganup halak na roh hun huta-huta ni Juda, laho martonggo hu rumah ni Jahowa, haganup on na Hutonahkon bam, sihatahononmu bani sidea; ulang buati age sangkababah hata!
3 Sai andohar ma ra sidea manangihon anjaha mubah uhurni humbani parlahouni na sambor ai, ase marulak-ulakan uhur-Hu pasal hasedaon, na dob Husurahon hinan sibahenon-Ku bani sidea.
4 Hatahon ma bani sidea, sonon do hata ni Jahowa, ʻAnggo lang itangihon hanima Ahu, ai ma marpangabak hanima ibagas titah-Ku, na dob Hubere i lobeinima,
5 anjaha itangihon hanima hata ni juakjuak-Ku, nabi-nabi ai, na Husuruh bannima marulak-ulak, hape seng ra hanima manangihon,
6 halani ai bahenon-Ku ma rumah on songon na bani Silo, anjaha bahenon-Ku do huta on gabe siburaan bani haganup bangsa-bangsa na i tanoh on.ʼ”
7 Ibogei malim-malim ampa nabi-nabi ampa haganup bangsa ai do si Jeremia mansahapkon hata ai i rumah ni Jahowa.
8 Jadi dob salpu ihatahon si Jeremia haganup hata na tinonahkon ni Jahowa sihatahononni bani haganup bangsa ai, roh ma malim-malim, nabi-nabi ampa haganup bangsa ai manangkapsi, nini sidea ma, “Maningon matei do ho!”
9 Mase ma manjahai ho marhitei goran ni Jahowa, nim, ʻManingon songon Silo do rumah on, anjaha maningon tarulang do huta on, seng marpangisi?ʼ Anjaha marurup do ganup bangsa ai dompak si Jeremia, ibagas rumah ni Jahowa.
10 Dob ibogei na sangap-sangap ni Juda barita ai, tangkog ma sidea hun rumah ni raja ai hu rumah ni Jahowa, anjaha hundul bei ma sidea i labah ni horbangan na baru, na bani rumah ni Jahowa.
11 Dob ai nini malim-malim ampa nabi-nabi ai ma hubani na sangap-sangap ai ampa hubani ganup bangsa ai, “Patut do marutang hosah dalahi on, ai manjahai do ia dompak huta on, songon na binogei nasiam marhitei pinggol nasiam.”
12 Tapi nini si Jeremia ma dompak na sangap-sangap ai ampa hubani haganup bangsa ai, “Jahowa do na marsuruh ahu manjahai dompak rumah panumbahan on pakon dompak huta on marhitei haganup hata na dob ibogei nasiam.
13 On pe, padear nasiam ma parlahou ampa pambahenan nasiam, anjaha tangihon nasiam ma sora ni Jahowa, Naibata nasiam, ase marulak-ulakan uhur ni Jahowa pasal hamagouan, na dob nilumbahon-Ni ai hubani nasiam.
14 Tapi anggo ahu, tonggor ma, ibagas tangan nasiam do. Bahen nasiam ma bangku, sonaha na dear ampa na sintong ninuhur nasiam.
15 Tapi botoh nasiam ma torang-torang, anggo ibunuh nasiam ahu, na mambahen marsapata do nasiam bani daroh na so marpipot pakon bani huta on ampa pangisini, ai sintong do, Jahowa do na marsuruh ahu bani nasiam, laho mangkatahon haganup hata on bani pinggol nasiam.”
16 Dob ai nini na sangap-sangap ampa haganup bangsa ai ma dompak malim-malim ampa nabi-nabi ai, “Seng patut marutang hosah halak on, ai marhitei goran ni Jahowa Naibatanta do ia manluar banta.”
17 Deba humbani pangintuai ni tanoh ai jongjong ma, anjaha nini sidea ma hubani haganup halak na martumpu ai,
18 Bani panorang ni si Hiskia, raja ni Juda, adong do sada nabi, ai ma si Mika na hun Moreset, nini do dompak ganup bangsa Juda: Sonon do hata ni Jahowa Zebaot, “Maningon tinggalaon do Sion songon juma, Jerusalem gabe timbunan batu; anjaha dolog hajongjongan ni rumah panumbahan ai gabe buntu-buntu na marharangan.
19 Naha, ai ibunuh Raja Hiskia ampa haganup Juda do ia halani ai? Ai lang mabiar do ia mangidah Jahowa, anjaha ielek-elek Ia, gabe marulak-ulakan uhur ni Jahowa pasal hamagouan on, na dob nilumbahonni bani sidea? Naha hita, parohonta do hamagouan banggal banta?”
20 Adong do homa halak na legan ijia, na manjahai marhitei goran ni Jahowa, ai ma si Uria, anak ni si Semaya, hun Kiriat-Jearim. Manjahai do ia dompak huta on ampa dompak tanoh on, usih songon hata ni si Jeremia.
21 Jadi dob ibogei Raja Joyakim ampa haganup puanglimani ampa haganup na sangap-sangap haganup hatani ai, ipindahi raja ai ma dalan laho mamunuhsi. Dob ibogei si Uria ai, mabiar ma ia, gabe maporus ma ia laho hu Masir.
22 Dob ai isuruh Raja Joyakim ma piga-piga halak laho hu Masir, ai ma si Elnatan, anak ni si Akbor ampa halak na legan mangkasomanisi;
23 jadi ialop sidea ma si Uria hun Masir, anjaha iboan ma ia hu lobei ni Raja Joyakim; dob ai ibunuh ma ia marhitei podang, anjaha igijigkon ma bangkeini bani tanoman ni halak simbuei.
24 Tapi tangan ni si Ahikam, anak ni si Sapan do mangkasomani si Jeremia, gabe seng iondoskon ia hubani simbuei ai laho mamunuhsi.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA