Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ta’ abit saellana Yoyakim pottrana Yosiya jumenneng rato Yehuda,
2 PANGERAN adhabu ka sengko’, "Kassa’ ba’na manjeng e taneyanna Tang Padalemman, pas acaca ka pandhudhu’ Yehuda se entar ajalannagiya kabakteyan e jadhiya. Kabala kabbi ka reng-oreng jareya apa se eparenta’agi Sengko’ ka ba’na sopaja epanapa’a ka reng-oreng jareya. Ja’ korange maske sakone’a.
3 Pola bangsa jareya endha’ ngedhingngagi, pas ambu se alako jahat, sampe’ Sengko’ maburung Tang neyat kaangguy macalaka’ reng-oreng jareya satembang ban kajahadanna."
4 PANGERAN makon sengko’ ngoca’ kantha reya ka reng-oreng jareya, "Sengko’, PANGERAN, la marenta’agi sopaja ba’na ta’at ka Sengko’ ban ajalannagi kom-hokom se la eajarragi Sengko’ ka ba’na.
5 Ba’na kodu ngedhingngagi keya apa se ekoca’agi Tang di-abdi, para nabbi se bi’ Sengko’ ros-terrosan eotos ka ba’na. Tape ba’na ta’ endha’ ngedhingngagi Tang di-abdi jareya.
6 Mon ba’na paggun ta’ endha’ atoro’, kennengnganna kabakteyan reya bi’ Sengko’ epapadha’a ban Silo, sampe’ sa-bangsa e dunnya reya ngangguy nyamana kottha reya menangka babaston."
7 Sabarang se ekoca’agi sengko’ e Padalemman Socce jareya ekaedhing bi’ para imam, para nabbi ban ra’yat.
8 Ta’ abit saellana sengko’ mare manapa’ sabarang se edhabuwagi PANGERAN, sengko’ laju etangkep bi’ reng-oreng jareya sambi ra’-era’an, "Ba’na kodu mate!
9 Ce’ bangalla ba’na se ngoca’ bit asmana PANGERAN ja’ Padalemman Socce reya daddiya akantha Silo, ban ja’ kottha reya epamosna’a epadaddiya kennengngan se ta’ ekennengnge oreng pole." Sengko’ pas ekarobut oreng sabannya’na.
10 E bakto ja-pangrajana pamarenta Yehuda ngedhing kadaddiyan jareya, laju padha kalowar dhari karatonna rato terros ka Padalemman Socce, pas toju’ e Labang Saketheng Anyar.
11 Para imam ban para nabbi ngoca’ ka ja-pangraja jareya ban ka ra’yat, "Oreng paneka kodu eokom mate sabab makalowar ca’-oca’ se nangtang kotthana kaula sareng sampeyan. Sampeyan dibi’ ampon meyarsa."
12 Sengko’ pas ngoca’, "PANGERAN se makon kaula manapa’ dhabuna se nangtang Padalemman Socce sareng kottha paneka akadi se ampon epeyarsa sampeyan dibi’.
13 Daddi samangken ngereng sampeyan padha ngoba cara odhi’na sareng tengka polana; ta’adi GUSTE Allah me’ olle Salerana maburung neyadda se macalaka’a sampeyan.
14 Parkara kaula, pajat badha e dhalem kakobasa’anna sampeyan; ngereng, epakadi ponapa’a saos, kasokanna.
15 Tape kaemodi, manabi sampeyan mate’e kaula, sampeyan sareng pandhudhu’na kottha paneka kodu nanggung kasala’an mate’e oreng se ta’ sala. Sabab PANGERAN se ngotos kaula kaangguy maemot sampeyan sadaja."
16 Daddi para pangrajana pamarenta ban ra’yat padha ngoca’ ka mam-imam ban ka bi-nabbi jareya, oca’na, "Oreng paneka abu-dhabu bit asmana PANGERAN, ta’ patot eokom mate."
17 Saellana jareya badha pin-pamimpinna bangsa nyander ka adha’, pas ngoca’ ka reng-oreng se badha e jadhiya,
18 "E bakto Hizkiya jumenneng rato Yehuda, Nabbi Mikha dhari Moresyet manapa’ ka ra’yat dhabuna PANGERAN Se Mahakobasa, ‘Siyon bakal enanggala’a akantha teggal, Yerusalim bakal daddiya tombuganna jur-gujuran, ban Gumo’ Padalemman Socce bakal daddiya alas raja.’
19 Tape Rato Hizkiya ban oreng Yehuda ta’ mate’e Mikha. La’-mala’ Hizkiya tako’ ka PANGERAN sarta nyo’on kabellasan. Daddi PANGERAN maburung dhabuna se ngara macalaka’a reng-oreng gapaneka. Ban samangken paneka, kaula sareng sampeyan para’ madhatengnga balai se raja ka aba’ dibi’."
20 Tao keya badha oreng laen se acaca nangtang kottha reya bit asmana PANGERAN, akantha se ejalannagi sengko’ reya. Oreng jareya nyamana Uriya ana’na Semaya dhari Kiryat-Yearim.
21 E bakto Rato Yoyakim ban ra-parwirana sarta para pangrajana pamarenta meyarsa ca’-oca’na Uriya jareya, rato jareya aehteyar mateyana Uriya. Tape Uriya ngedhing parkara jareya, laju tako’, pas buru ka Messer.
22 Tape Rato Yoyakim makon Elnatan ana’na Akhbor abareng ban reng-oreng laen entar ka Messer mega’a Uriya.
23 Reng-oreng jareya mega’ Uriya, pas egiba abali ka Rato Yoyakim. Saellana jareya rato makon mate’e Uriya, ban mayyidda ebuwang e koburan omom.
24 Tape sateya berkat partolonganna Ahikam ana’na Safan, sengko’ Yeremiya, ta’ esoro pate’e ka ra’yat.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA