Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nasuroa’ Batara a’lampa ammalli bongki, nampa kukio’ siapa are pamimpinna bansaya siagang siapa are imang-imang toaya,
2 untu’ a’lampa siagang ke’nanga mange ri Ka’bung Lappara’ Hinom allalo ri Pakke’bu’ Lompo Beling. Anjoreng musti kupa’la’bangi kupabattu apa Napappasangnganga ri nakke.
3 Musti akkana kamma’ anne, "He sikamma karaenna Yehuda siagang pandudu’na Yerusalem! Pilangngeri eroka Kupau, iNakke Batara Kaminang Koasaya, Allata’alana Israel, angkanaya, lappabattuA’ bala lompo mae ri anne tampaka, sa’genna ta’bangka tau allangngerekai.
4 Kugaukangi anjo passalaka lanri anne bansaya nabokoiMa’. Narantassi anne tampaka lanri assarena koro’bang mae ri rewata-rewata tenaya naassengi ke’nanga, tenaya naassengi boe-boena ke’nanga siagang sikamma karaenna tu Yehuda. Nabonei tommi ke’nanga anne tampaka cera’na tau tenaya nasala.
5 Appaentengi ke’nanga tampa’ pakkoro’bangngang untu’ Rewata Baal, untu’ ampassareangi ana’-ana’na ke’nanga a’jari koro’bang nitunu, padahala’ tale’bakai Kusuro ke’nanga anggaukangi anjo kammaya, ba’lalo anjo kammaya tale’bakai ammumba lalang ri pikirangKu.
6 Lanri kammana anjo, nia’ sallang nanarapiki wattunna naanne tampaka tenamo naniarengi Tofet yareka Ka’bung Lappara’ Hinom, passangalinna Ka’bung Lappara’ Pammolongang.
7 Ri anne tampaka laKupassalasai sikontu rancanana tu Yehuda siagang pandudu’na Yerusalem. LaKubalang parekangi ke’nanga nibeta ri musu-musunna siagang nibuno lalang ri pa’bundukanga. LaKubalang parekangi maya’na ke’nanga nikanre ri jangang-jangang siagang olo’-olo’ sekke’.
8 LaKupabattui bala lompoa ri anne kotaya sa’genna sikamma tau ammaloa anjoreng lata’bangkai siagang lamalla’ ngasengi.
9 Lanikurungi ri musu anne kotaya, siagang nausahakangi nabuno pandudu’na. Teai sipato’ heba’na batena musua angkurungi, sa’genna sikamma tau niaka lalang ri anne kotaya lasikanre-kanrei para ia sipa’gangngang, ba’lalo ana’ kalenna nakanre ngaseng."
10 Nampa Nasuroa’ Batara anreppeki anjo bongkia ri dallekanna ngaseng anjo tau niaka amminawang ri nakke.
11 Musti kupauangi ke’nanga angkanaya akkana kammai anne Batara Kaminang Koasaya, "Anne bansaya siagang kotaya laKuancuruki sa’genna a’jari rapang bongki anjo reppeka tenayamo nakkulle nipakabaji’ ammotere’. Lanitarawangi maya’-maya’na ke’nanga ri taua ri Tofet, lanri tenamo tampa’ pa’jerakkang maraeng.
12 Anne kotaya siagang pandudu’na laKupa’jari sangkamma Tofet.
13 Sikontu balla’ niaka ri Yerusalem siagang sikontu balla’ karaenga ri Yehuda lanipa’jari rantasaki sangkamma Tofet; lanri irate ri tompo’na sikamma anjo ballaka le’ba’mi taua attunu dupa untu’ rewata-rewata ri langi’, siagang assare koro’bang anggoro’ untu’ rewata-rewata maraeng."
14 Nampa kubokoi Tofet, tampakku nisuro ampabattui pasanNa Batara. A’lampa’ mange ri paranglakkeng Balla’Na Batara ammenteng anjoreng, nampa kupauang sikontu taua,
15 angkanaya Batara Kaminang Koasaya, Allata’alana Israel, akkana kammai anne, "Lanri kapala batunu siagang taerokako mappilangngeri, laKupabattui sikontu balaya mae ri anne kotaya siagang sikontu desa niaka ri tammulilina, iamintu bala le’baka Kurancana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA