Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 A’bicarami pole Batara ri nakke, angkana,
2 "Teako a’buntingi siagang anggappai ana’ ri anne tampaka.
3 LaKupauangko apa lakajarianga mae ri ana’-ana’ lassuka anrinni siagang mae ri tau toana.
4 Lamatei ke’nanga lanri nitaba ri garring angngeranga kamateang, siagang lamatei ke’nanga lalang pa’bundukang yareka mate naallei cipuru’. Tena manna sitau langngarru’ yareka antarawangi ke’nanga. Latassiaraki maya’na ke’nanga rapang pupu’ panynyoppongi ri butta, siagang nikanre ri jangang-jangang siagang olo’-olo’ sekke’.
5 Teako a’lampai mae ri balla’na tau natabaya susa, Yeremia. Teako susai lanri manna pole inai. Tenamo nalaKubarakkaki pole ummakKu siagang kasalewangang, kammayatompa tenamo nalaKupappicinikang pangngaiKu siagang pangngamaseangKu mae ri ke’nanga.
6 Sikamma tau kalumanynyanga siagang tau kasi-asia ri anne pa’rasanganga lamatei natena tau antarawangi ke’nanga. Tena manna sitau lansessai kalenna yareka anggondoloki ulunna salaku pammatei ri kasusaanna ke’nanga.
7 Tena todong tau laero’ appare’ pammaca-macang untu’ ansaleori tau susaya. Tena lamminawang turu’ susa ba’lalo manna tau ammoteranga manggena yareka amma’na.
8 Teako antamakki ri balla’na tau assua’-suaraka. Teako angnganrei siagang angnginungi siagang ke’nanga.
9 Pilangngeri anne eroka Kupau ri kau, iNakke Batara Kaminang Koasaya, Allata’alana Israel. Sa’ra rannuna siagang kakkala’na anjo passua’-suarrang pa’buntinganga laKupammari ngasengi. Anjo sikammaya lanacini’ ngasengi sikamma tau attallasaka ri anne jammannu.
10 Punna nupabattu ngasengi anne mae ri ke’nanga, gassingka akkuta’nangi ke’nanga angkana angngapa naKuero’ anghukkung terasa’ kammai anjo ke’nanga. Lakkuta’nangi ke’nanga angkana apa kasalanna siagang dosana ke’nanga mae ri Nakke, Karaeng Allata’alana ke’nanga.
11 Pauangi ke’nanga angkanaya kammai anne kanangKu, ‘Le’ba’Ma’ nabokoi boe-boenu untu’ a’lampa mange anynyomba siagang assambayang ri rewata-rewata maraenga. Nabalang parekangA’ siagang taerokai ke’nanga mannuruki ri paratorang-paratorangKu.
12 Mingka ikau la’bi ja’dallangngangi pole apa nugaukanga. Kapala batuko siagang ero’ kalennu bawang ja’dalaka nuturukiang. Taerokako mannuruki ri Nakke.
13 LaKubongkako assulu’ battu ri anne pa’rasanganga nampa Kupelakko mange ri se’reang pa’rasangang tena sikalia nuassengi siagang boe-boenu. Anjorengko lassambayang allo bangngi mae rewata-rewata maraenga, siagang tena Kulamangngamaseang mae ri kau.’"
14 Nakana Batara, "Lanarapiki sallang wattunna natenamo nassumpa taua lalang arengKu, Allata’ala mattallasaka, le’baka angngerangi umma’ Israel assulu’ battu ri Mesir;
15 Passangalinna lanri iNakke, Allata’ala mattallasaka, angngerangai umma’ Israel assulu’ battu ri se’reang pa’rasangang ri bageang wara’ siagang battu ri sikontu pa’rasangang maraeng le’baka napammantangngi ke’nanga Kupasiara’. LaKuerangi ammotere’ ke’nanga mange ri butta passolongang cera’na ke’nanga, pa’rasangang le’baka Kupassareang mae ri boe-boena ke’nanga."
16 Nakana Batara, "LakkiokKa’ jai paboya juku’ untu’ anjakkalaki anne taua. Nampa lakkiokKa’ jai pasoso’ untu’ assosoki ke’nanga ri sikamma monconga siagang buluka, siagang ri sikamma leang-leang batua.
17 Kuciniki sikontu apa nagaukanga ke’nanga. Tena nia’ kacokkoang mae ri Nakke; Kucini’ ngaseng tommi dosa-dosana ke’nanga.
18 LaKubalasaki dosana siagang kaja’dallanna ke’nanga siagang hukkungang a’lappi rua, lanri narantassimi pa’rasangangKu siagang jai barhala. Anjo barhala-barhalaya tena na’nyawa, sangkammai maya’."
19 O Batara, iKattemi alla’langngia’ siagang assarea’ kagassingang; iKatte antulunga’ ri wattungku kasukkarang. Labattui bansa-bansaya battu ri cappa’na linoa mae ri Katte na nakana, "Boe-boena ikambe poro rewata takontutojengaji bawang napatappa’, tena sikalia matu-matunna.
20 Maka akkullei rupataua ampareki rewataya untu’ kalenna todong? Tantu tena! Anjo napareka tantu teai Allata’ala."
21 Nakana Batara, "Lanri kammana anjo, anne sikalia laKupa’jari bansa-bansaya angkasiaki kakoasangKu siagang kagassingangKu sollanna lanaasseng ke’nanga sa’genna satunggu-tungguna angkanaya iNakkemi Batara."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA