Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ikataken TUHAN tole RananNa man bangku nina,
2 "Ula kam erjabu entah mupus i bas ingan enda.
3 Kukataken man bandu kai si nandangi jadi man anak-anak si tubuh i jenda ras orang tuana.
4 Mate me ia erkiteken penakit si mekelek janah la lit si ngandungisa,la lit si ngkuburkenca, maitna ampar-ampar desken sampah ergun-gun. Mate ia erkiteken perang ras kelihen, badanna ipangani perik-perik ras rubia-rubia.
5 La kam banci bengket ku bas rumah kalak si erceda ate. Ula rate ceda ntah ngandung ras ise pe. Dame kubuat i bas bangsangKu nari. Keleng ateKu ras perkuah ateKu lanai Kucidahken man bana.
6 Kalak bayak ras kalak musil mate i bas negeri enda. La lit kalak si ngkuburken tah pe ngandungisa. La lit kalak si nggunting buk takalna lako encidahken atena ceda.
7 La lit kalak man ras minem lako ngapuli kalak kune pe si ikelengina mate. La lit kalak si ncidahken ikut rate ceda aminna pe kalak kebenen nande entah bapa.
8 Ula kam bengket ku rumah kalak si erpesta. Ula kam kundul man minem ras ia.
9 Dengkehkenlah kai si Kukataken, TUHAN si Erdolat, Dibata nu Israel. Kupengadi me sora-sora keriahen, kesenangen ras kemalemen ate i bas kerja erdemu bayu nari. Sanga nggeluh denga kalak enda idahna me kai si nandangi jadi.
10 Tupung iturikenndu enda kerina man bana, isungkunna me kam ngkai maka nggo Kutetapken ngukum ia bage kelekna. Isungkunna me kejahaten ras dosa kai kin si nggo ilakokenna nandangi TUHAN Dibatana.
11 Kataken man bana maka TUHAN ngatakenca, 'Nini-ninindu, nggo nundalken Aku, jenari nembah dingen iperbudakkenna bana man dibata-dibata si deban. Itadingkenna Aku dingen la ikutkenna ajarKu.
12 Tapi kam nggo ilakokenndu terjahaten asangken nini-ninindu. Kerina kam kalak jahat dingen mekeng, la ibegikenndu Aku.
13 Emaka Kukencahken kam ndarat i bas negeri enda nari, ku negeri si langa pernah nini-ninindu ras kam metehsa. I je banci isembahndu dibata-dibata si deban suari ras berngi, janah la Kucidahken perkuah ateKu maka malem atendu.'"
14 Nina TUHAN, "Seh me paksana maka lanai kalak ersumpah i bas gelarKu selaku Dibata si nggeluh si maba Israel ndarat i negeri Mesir nari.
15 Tapi ersumpah ia i bas gelarKu selaku Dibata si nggeluh si maba kalak Israel ndarat i bas negeri i Utara nari, dingen i bas negeri-negeri si deban nari, ku ja ia nggo Kukerapken. Kubaba ia mulih ku negerina jine, ku negeri si nggo Kubereken man nini-ninina. Aku TUHAN si nggo melasken ranan enda."
16 Nina TUHAN, "Kusuruh me reh nterem penjala nurung nangkapi bangsa enda. Kenca bage Kusuruh nterem perburu gelah iburuina kalak enda ku datas deleng-deleng, ku uruk-uruk dingen ku kelang-kelang batu mbelin.
17 Kuidah kai pe si ilakokenna. La lit si terligen man bangKu. Dosa-dosana la banci pulah i bas pengidahKu nari.
18 Kubahan maka igalarina dua kali lipat dosa-dosana ras kejahatenna. Perbahan nggo icemarkenna negeringKu salu gana-gana si la erkesah bagi bangke dingen nggo idemina negeringKu salu dibata-dibata si la tuhu."
19 O TUHAN, Kam kap kecionku, si mereken gegeh man bangku. Tupung aku i bas kiniseran IsampatiNdu aku. Bangsa-bangsa i tampuk doni nari reh me, jenari nina, "Sikerajangen nini kami dibata-dibata si la tuhu kap ngenca. La lit si deban seakatan gana-gana si la lit gunana.
20 Banci kin jelma erbahan dibatana jine? Lang me! Kune ibahanna pe, labo e dibata."
21 Nina TUHAN, "Emaka sekali seh rasa lalap, Kubahan maka ieteh bangsa-bangsa kuasa ras gegehKu. Je maka ietehna maka Aku kap TUHAN."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA