Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nasuroa’ Batara a’lampa mange ammalli lipa’ bodo battua ri kaeng lenang nampa kupake, mingka takkulleai kutallangngang antama’ ri je’neka.
2 Jari a’lampama’ mange amballi anjo lipa’ bodoa, nampa kupake.
3 Nampa a’bicaramo Batara ri nakke, Nakana,
4 "A’lampako mange ri Binanga Efrat, siagang cokkoi anjo lipa’ bodoa ri alla’-alla’na batua."
5 Jari situru’ parentaNa Batara, a’lampama’ nampa kucokko anjo lipa’ bodoa ri ampi’na Binanga Efrat.
6 Siapa are wattu ribokoanganna, Nasuroma’ pole a’lampa Batara mange ri Binanga Efrat untu’ angngallei anjo lipa’ bodoa.
7 Jari a’lampama’, nampa kupasulu’ anjo lipa’ bodoa battu ri tampa’na kucokko. Nama’nassa jappo’mo anjo lipaka, siagang tena sikalimo matu-matunna.
8 Nampa a’bicaramo pole Batara mae ri nakke, angkana,
9 "Kammaminjo caraKu angngalle tindakang mae ri tu Yehuda siagang pandudu’na Yerusalem. LaKuancuruki anjo kabarroang ta’liwa’na ke’nanga.
10 Anne bansa ja’dalaka sanna’ kapala batuna siagang taerokai mannuruki ri Nakke. Anynyombai siagang napa’jari atai kalenna ke’nanga mae ri rewata-rewata maraenga. Lanri kammana minjo nala’jari ke’nanga rapang anjo lipa’ bodo tenaya matu-matunna.
11 Rapang lipa’ bodo tassikko’ jarreka ri aya’na tau ampakeai, kammami anjo erokKu sollanna tassikko’ umma’ Israel siagang Yehuda mae ri Nakke. Lanri kammanami anjo na’jarimo ke’nanga ummakKu ampa’jariai arengKu nipuji siagang nipakalompo. Mingka, taerokai ke’nanga mannuruki ri Nakke."
12 Nakana Karaeng Allata’ala ri nakke, "Yeremia, pabattui anne pasangKu mae ri tu Israel angkanaya tunggala’ bongki pammoneang anggoroka musti nibonei anggoro’ sa’genna rassi. Lappiali ke’nanga angkana, ‘Apa saba’ natanaassenga ikambe angkanaya tunggala’ bongkia musti nipirassi siagang anggoro’?’
13 Jari pauangi ke’nanga angkanaya sikamma taua anrinni ri pa’rasanganga, sikamma karaeng jari-jarina Daud, sikamma imanga, na’bia, siagang sikontu pandudu’na Yerusalem laKubonei anggoro’ sa’genna nabengo.
14 Nampa laKupasiruppa ke’nanga massing para ia. Tau toa siagang tau rungka laKupakamma ngaseng nampa tena nalanipammopporang. LaKupanraki ke’nanga, tena Kupassayangi yareka tena naKukamaseangi. INakke, Batara, anne akkana."
15 Umma’ Israel, le’ba’mi a’bicara Batara! Teako tampoi, mappilangngeri mako ri Ia!
16 Musti nupakalompoi Karaeng Allata’alanu lalang tenanapa Napabattui sassanga, siagang tatto’ro bangkennu ri pa’monconganga, lalang anjo singara’ numinasaia taNapinrayapi a’jari sassang.
17 Punna kuttu nyawanu mappilangngeri, la’mere’-merekia’ angngarru’. Pacce pa’maikku angkarruki anjo katampoannu. Lammattiki je’ne’ matangku lanri niengka’na umma’Na Batara salaku tunitahang.
18 Nakana Batara ri nakke, "Suroi karaenga siagang amma’na naung battu ri empoang kakaraenganna, nasaba’ anjo songko’ karaeng ga’gana tu’guru’mi battu ri ulunna.
19 Kota-kotana Yehuda ri bageang timboroka nikurungi ri musu, siagang tenamo akkulle antarrusuki anjo pakkurunga. Sikontu tu Yehuda niengka’ ngasengi mange ri butta pammelakkanga."
20 Nakana Batara mae ri pandudu’na Yerusalem, "Parhatikangi! Nia’mi musu-musunnu battu wara’! Kemaeji sikamma tau eroka nula’langngi siagang sannaka nukalompoanna ri pa’mai’?
21 Apa lanukana sallang punna sikamma tau nupare’ aganga ambetako siagang angkoasaiko? Tantu lapa’risiki nusa’ring rapang baine eroka ammana’.
22 Gassingka akkuta’nangko angkana angngapa nabattu ngaseng anjo sikammaya antujuko, angngapa nanikae pakeannu siagang angngapa nanigau’ bawangko. Parallui nuasseng angkanaya nakajariang anjo sikammaya lanri lompo duduna dosanu.
23 Maka akkullei tau le’lenga ampinrai kalenna, yareka macanga ampelaki ballanna? Tantu tena! Kammatommi anjo ikau biasaya a’gau’ ja’dala’, tena olonu lakkulle anggaukangi bajika.
24 LaKupasisa’la’-sa’lakko rapang awang niirika ri anging battua ri paranga.
25 Iaminjo sarennu le’baka Kupattantu, lanri nukaluppaingKu, siagang lanri tappa’nu mae ri rewata-rewata takontutojenga.
26 KalengKu angkaei pakeanga battu ri kalennu sollannu a’jari assolara’ siagang a’jari siri’-siri’.
27 Le’ba’mi Kucini’ nugaukang sikamma apa-apa tenaya naKungai. Kucini’mi nuondang rewata-rewata maraenga ri buluka siagang ri kokoa, rapang sitau bura’ne a’lingu-lingu ero’ mae ri bainenna taua, yareka jarang laki balere’ dudua mae ri jarang ganaya. He pandudu’na Yerusalem, cilaka mako! Angngapapi nulata’lappasa’ battu ri sikontu kaja’dallanga?"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA