Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Isuruh TUHAN aku nukur gendit lenen dingen makesa. Tapi IkatakenNa maka gendit e la banci kena lau.
2 Emaka kutukur dingen kupake.
3 Kenca bage ngerana ka TUHAN man bangku nina,
4 "To ku Lau Eprat janah buniken gendit e i jah i bas sada lubang batu."
5 Emaka lawes aku dingen kubuniken deher Lau Eprat.
6 Piga-piga dekah kenca si e, isuruh TUHAN aku ku Lau Eprat muat gendit ndai.
7 Emaka lawes aku dingen tupung kubuat i bas inganku munikenca mbarenda, nggo macik gendit e, lanai erguna.
8 Kenca bage ngerana ka TUHAN man bangku nina,
9 "Bagenda me pengkernepkenKu kiniganjangen ukur Juda ras Jerusalem.
10 Bangsa si jahat e lanai patuh man bangKu. Mekeng pusuhna dingen gelgel jahat pengelakona. Isembahna janah erdahin ia guna dibata-dibata si deban. Emaka genduari nggo seri ia ras gendit enda; lanai erguna.
11 Bali ras gendit enda leket i bas awak bage me Kubahan leketna kalak Israel ras Juda ras Aku. Kulakoken si e gelah ia jadi bangsangKu janah ipujina ras ihamatina gelarKu. Tapi la ia patuh man bangKu."
12 Nina TUHAN Dibata man bangku, "O Jeremia, turiken man kalak Israel maka tep-tep guci lau anggur atena iisi salu lau anggur. Ikatakenna me maka ietehna nge tep-tep guci lau anggur la banci la iisi salu lau anggur.
13 Kataken man bana maka Aku TUHAN si mereken man bangsa e lau anggur seh ngayak mabuk; subuk raja-rajana, subuk kesusuren Daud, imam-imam, nabi-nabi bage pe kerina kalak si tading i Jerusalem.
14 Kenca bage Kuperperken ia desken guci si perper erkiteken siantuken ras guci. Subuk nguda entah metua, lanai ateKu mekuah, lanai ia Kukelengi, la erndobahen Kukernepken ia kerina."
15 O kalak Israel, TUHAN kap si nggo ngerana! Peteruklah ukurndu dingen dengkehkenlah Ia.
16 Erkemalangenlah man TUHAN Dibatandu, ope denga IberekenNa kegelapen man bandu. Ope denga kam tertuktuk i deleng-deleng si gelap. Ope denga terang si iarap-arapkenndu salih jadi gelap la teralang.
17 Adi la ibegikenndu, ngandung me aku i bas ingan si terbuni, tangis ngandung aku janah iluh mambur erdire-dire, erkiteken bangsa TUHAN nggo ibaba tertaban.
18 Nina TUHAN, "Kataken man raja ras kempak nande raja gelah ia nusur i bas kursi kinirajanna nari, sabap mahkotana si mejile nggo ndabuh i bas takalna nari.
19 Kota-kota arah Selatan Juda nggo ikepung. Emaka ise pe la nai banci mentas arah e. Kerina kalak Juda nggo iangkut ku pembuangen."
20 O Jerusalem, nehenlah! Musuhndu reh i Utara nari! I ja kin rarasen si ipermakanindu, eme bangsa si iagahkenndu?
21 Kai nari belas-belasndu adi bangsa si iakapndu temanndu, naluken janah engkuasai kam? Mesui kal iakapndu desken sekalak pernanden sangana mupus.
22 Kune nungkun-nungkun pusuhndu, ngkai maka si enda kerina jadi man bandu, ngkai maka irigatken kalak uisndu janah igagahina kam, jabapna eme erkiteken mekeleksa dosandu.
23 Banci kin kalak mbiring ngobah kulitna gelah ula nai mbiring? Banci kin arimo nasapken rupana si mekambing? Kune banci, emaka kam si semal ngelakoken si jahat, banci nge erlajar erbahan kai si mehuli.
24 Ikerapken TUHAN me kam desken segal si iembusken angin si rehna i gurun pasir nari.
25 IkatakenNa maka eme jadi sikerajangenndu. Enda me KeputusenNa erkiteken kam nggo ngelupaken Ia janah ernalem man dibata-dibata si la tuhu.
26 TUHAN jine si erbahanca kam manjang-anjang maka mela akapndu.
27 IdahNa ilakokenndu si nembeh AteNa. IdahNa kam ngadap ku lebe-lebe gana-gana kalak perbegu i datas uruk-uruk ras i tengah juma, desken sekalak dilaki erlua-lua ras ndehara temanna, desken mberguh kuda iadep-adepen beruna. O kalak Jerusalem, cilaka me kam! Ndigan kam banci bersih?
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA