Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On do hata na roh bani si Jeremia humbani Jahowa,
2 “Tangihon ma hata ni padan on, anjaha hatahon ma in bani halak Juda ampa bani pangisi ni Jerusalem.
3 Hatahon ma bani sidea sonon do hata ni Jahowa, Naibata ni Israel, ʻHona papa do haganup na so manangihon hata ni padan on,
4 na dob Hutonahkon bani ompungnima, sanggah na Huboan sidea luar hun tanoh Masir, humbani pamurunan bosi, ningku do, ʻTangihon hanima ma sorang-Ku, anjaha dalankon hanima haganup na Hutonahkon ai bannima, ase gabe bangsang-Ku hanima, anjaha Ahu gabe Naibatanima,ʼ
5 ase Hupatotap bulawan na dob Hubulawankon bani ompungnima, ai ma laho mamberehon bani sidea sada tanoh, na marbaoran ijai dadih ampa manisan songon na masa sonari.” Jadi ningku ma mambalosi, “Sonai ma tongon, ale Jahowa!”
6 Dob ai nini Jahowa ma dompak ahu, “Tingtingkon ma haganup hata ai bani huta-huta ni Juda ampa bani dalan-dalan na i Jerusalem, ʻTangihon hanima ma hata ni padan on, anjaha dalankon ma ai!
7 Ai Hupalumba do ompungnima humbani ari sanggah na Huboan sidea tangkog hun tanoh Masir, Hupalumba do sidea tongtong ronsi ari on, ningku do, ʻTangihon hanima ma sorang-Ku!ʼ
8 Tapi seng itangihon sidea Ahu, seng itareihon sidea pinggolni Bangku; haganup do sidea marparlahou domu hu bani hengkeng ni uhur ni sidea na jahat in. Halani ai do ase Huparoh bani sidea haganup hata ni padan on, na Hutonahkon bani sidea ase iramotkon, hape seng ihorjahon sidea.ʼ”
9 Jadi nini Jahowa ma dompak ahu, “Masa do partahi-tahion i tongah-tongah ni halak Juda ampa i tongah-tongah ni pangisi ni Jerusalem.
10 Domma mulak sidea bani hajahaton ni ompung ni sidea, ai ma sipangengkar manangihon hatang-Ku; iihutkon sidea do naibata na legan laho mambalosi ai. Domma iosei ginompar ni Israel pakon ginompar ni Juda padan na Hubahen bani ompung ni sidea.
11 Halani ai, sonon do hata ni Jahowa, ʻTonggor ma, parohon-Ku do bani sidea hamagouan, na seng boi lembangan ni sidea; age pe dilo-dilo sidea Bangku, seng Hutangihon sidea.ʼ
12 Gabe laho ma huta ni Juda ampa pangisi ni Jerusalem, dilo-dilo bani naibata na legan, ginalangan ni sidea ai, hape seng boi iurupi sidea bani panorang hasosakan ni sidea.
13 Ai songon buei ni hutamu do buei ni sisombahonmu, ale Juda, anjaha songon buei ni dalan na i Jerusalem do buei ni anjapanjap habadoron, na pinaulinima bahen panggalangan bani Baal.
14 Tapi anggo ho, ulang ma tonggohon bangsa on, anjaha ulang ma ho ra mangelek mangkopkop sidea, ai seng anjai tangihonon-Ku sidea, age pe dilo-dilo sidea sanggah panorang hasosakan ni sidea.
15 Ai aha do na hinorjahon ni bangsa kasihan-Ku i rumah-Ku? Mangkorjahon na masambor do ia. Mintor boi ma salpu hamagouan humbam halani bagah-bagah ampa gulei na ginalangkon? Ai boi ope ho marolob-olob?
16 Igoran Jahowa hinan do ho, ʻHayu Jetun na maratah, na majenges ramos, marbuahʼ marhasoman sora ni logou na mapor pagaraonni do apuy hujai, anjaha mangkaseda ma dangkah-dangkahni.”
17 “Ai Jahowa Zebaot, na manuan ho do manlumbahon hamagouan bam halani hajahaton, na binahen ni ginompar ni Israel ampa ginompar ni Juda, laho parohkon ringis-Ku, marhitei na manutung dahupa bani Baal.
18 Jahowa do na pabotohkon ai hu bangku gabe hubotoh; Ia do pataridahkon hu bangku pambahenan ni sidea na jahat ai.
19 Tapi anggo ahu, songon biribiri na lomuk do, na tinogu hu panayatan; seng dapot uhurhu, na ahu do hape tinahihon ni sidea, marhitei na mangkatahon, ʻParseda hita ma hayumu on pakon buahni, boiskon hita ma ia hun tanoh ni halak na manggoluh, ase ulang be dong na manarsingati goranni.ʼ
20 Tapi Ham, ale Jahowa Zebaot, panguhum na pintor do Ham, siuji piah-piah pakon uhur, pataridahkon Ham ma bangku pambalason-Mu bani sidea; ai hu Bamu do huondoskon parkarangku.ʼ”
21 Halani ai sonon do hata ni Jahowa hubani halak na hun Anatot, na manguhurhon hosahku, anjaha na mangkatahon, “Ulang sai manjahai ho marhitei goran ni Jahowa, ase ulang mangonai tangannami bam;
22 sonon do hata ni Jahowa Zebaot, ʻTonggor ma, ningon marlulu do Ahu bani sidea; ningon matei do garama bunuhon ni podang, anjaha anak pakon boru ni sidea maningon matei gayuran do,
23 anjaha seng dong be na tading humbani sidea. Ai parohon-Ku do hamagouan bani halak na i Anatot, bani tahun pambalason bani sidea.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA