Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kata Dibata seh bangku nina,
2 "Dengkehkenlah kai si nikataken i bas perjanjin enda. Kataken man kalak Juda ras Jerusalem
3 maka Aku, TUHAN Dibata nu Israel nggo numpahi kerina kalak si la ngikutken kata perjanjin enda.
4 Eme perjanjin si Kubahan ras nini-ninina tupung ia Kubaba i Mesir nari, ingan si bali iakapna lasna ras i bas ginuhur si gurlah. Kukataken man bana maka ikutkennalah Aku, dingen ilakokennalah kerina si Kuperentahken man bana. Kukataken man bana, kune ikutkenna Aku, maka ia jadi bangsangKu janah Aku jadi Dibatana.
5 Emaka Kutepati janjingKu si Kubahan man nini-ninina maka Kubereken me man bana negeri si sampur dadih ras tengguli si ianina genduari." Ningku ngaloi, "Payo TUHAN."
6 Kenca bage nina TUHAN man bangku, "To ku kota-kota Juda ras ku dalan-dalan Jerusalem. Momoken katangKu enda i jah, suruh bangsa e gelah idengkehkenna dingen ngataken kai si ikataken i bas perjanjin e.
7 Tupung Kubaba nini-ninina ndarat i Mesir nari, Kupersingeti kal man bana gelah ia patuh man bangKu, janah seh ngayak genduari pe tetap denga ia Kupersingeti.
8 Tapi la idengkehkenna, la iikutkenna Aku. Tapi tetap mekeng pusuhna janah lalap jahat perbahanenna. Nggo Kuperentahken maka icikepna perjanjin enda, tapi itulakna. Emaka Kudabuhken man bana ukumen bagi si tersena i bas perjanjin e."
9 Kenca bage nina TUHAN man bangku, "Kalak Juda ras Jerusalem nggo erpekat ngelawan Aku.
10 Mulihken ka ia ndabuh kubas dosa-dosa nini-ninina nai si la nggit ngikutken kai si Kukataken bana. Nggo isembahna dibata-dibata si deban, subuk Israel bage pe Juda nggo icedakenna kal perjanjin si Kubahan ras nini-ninina.
11 Emaka Aku, TUHAN, Kupersingeti ia maka Kudabuhken me man bana cilaka janah la ia banci pulah. Aminna pe ia serko mindo penampat man bangKu, la Kubegiken.
12 Emaka lawes me kalak Juda ras Jerusalem ku gana-gana inganna mpersembahken persembahen dingen serko ia man gana-gana e mindo penampat. Tapi tupung reh cilaka e, gana-gana ndai la ngasup nampati ia.
13 Nggo bali buena gana-gana kalak Juda ras kota-kotana dingen kalak Jerusalem nggo majekken batar-batar persembahen bali buena ras dalan i bas kota e guna mereken persembahen man Baal si nggesuh e.
14 O Jeremia, ula kam ertoto dingen mindo man bangKu guna bangsa e. Tupung ia i bas kiniseran aminna pe erlebuh man bangKu mindo penampat la ia Kubegiken."
15 Nina TUHAN, "Bangsa si Kukelengi nggo erbahan jahat. Lit denga kin hakna bengket ku bas Rumah PertotonKu? Iakapna kin arah janji-janji ras arah mpersembahken daging asuh-asuhen ia banci pulah i bas cilaka nari? E kin si erbahanca meriah iakapna?
16 Nai pernah Kugelari ia batang Saitun si Merabun, meramis buahna, tapi genduari alu sora si erlenggur, Kuciluk bulungna dingen Kupenggelken ranggas-ranggasna.
17 Aku TUHAN si Mada Kuasa sinuanken Israel ras Juda. Tapi genduari Kuancam ia alu cilaka. Cilaka e ndabuh man bana erkiteken nggo lepak perbahanenna. Ilegina rawangKu alu nutung persembahen man Baal."
18 Ipebetehken TUHAN man bangku sura-sura imbangku ngelawan Aku.
19 Aku bali ras anak biri-biri si melemuk itegu ku penggelehen, dingen la kueteh maka imbang-imbangku nggo erpekat erbahan si jahat man bangku. Nina, "Iah si tabah batang kayu enda tupung ia meratah denga. Iah si bunuh ia gelah ise pe lanai lit si ngingetsa."
20 Emaka ertoto aku ningku, "O TUHAN si Mada Kuasa, Kam kap hakim si bujur. IujiNdu kap perukuren ras pusuh peraten manusia. Man BaNdu kuendesken perkarangku, kutimai PembalasenNdu nandangi bangsa enda."
21 Kalak Anatot ersura-sura munuh aku, dingen ikatakenna maka ibuatna kesahku adi tetap kuberitaken kata TUHAN.
22 Emaka nina TUHAN si Erdolat, "Kuukum me ia! Anak peranana mate i bas perang. Anak-anakna mate erkiteken lumben.
23 Nggo kutetapken sada paksa man kalak Anatot guna idabuhi cilaka. Emaka adi nggo seh paksa e, ise pe ia la banci tetap nggeluh."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA