Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Umma’ Israel, pilangngeri anne pasanNa Batara mae ri kau.
2 Nakana, "Teako turuki kabiasanna bansa-bansa maraenga, siagang teako mallakki anciniki sikamma pammateia irate ri langika, nakamallakkang anjo bansa-bansaya.
3 Ada’ kabiasanna anjo bansa-bansaya tena sikali matu-matunna. Nata’bangi ke’nanga poko’-poko’ kayua ri romanga, siagang nasuroi tukang kayua anjamai a’jari patung barhala.
4 Nampa nabelo-beloi anjo patung berhalaya siagang bulaeng na pera’, nampa najarreki siagang paku sollanna tena natu’guru’.
5 Anjo patung-patung barhalaya rapangi tau-tau ri koko bonteka. Takkulleai ke’nanga a’bicara, takkulleai a’dakka, siagang musti niangkaki. Teako mallakki mae ri ke’nanga, nasaba’ takkulleai ke’nanga a’gau’ ja’dala’ mae ri kau; manna a’gau’ bajika tanakullei ke’nanga."
6 Batara mala’birika, tena sangkammanTa, malompoi arenTa siagang lompoi koasaTa.
7 Inai kutadeng taeroka mappilangngeri mae ri Katte, Karaenna sikontu bansaya? Tojeng, siratang sikaliKi’ nipakalompo. Battu ri sikontu cara’deka ri alla’na bansa-bansaya siagang battu ri sikontu karaenna ke’nanga, tena manna sitau akkulle nipasangkamma iKatte, o Batara.
8 Kapala batui siagang dongo’ ngasengi ke’nanga nasaba’ rewatana poro kayuji bawang, takkulleai angngajara’ ri apa a’matu-matua.
9 Nilapisiki siagang bulaeng na pera’ nieranga battu ri Spanyol siagang kota Ufas, yangasenna bate pare’na tucara’deka siagang panre bulaenga. Pakeanna battu ri kaeng lame butung toa siagang lame butung lolo cura’na, bate jamana tau cara’deka attannung baji’.
10 Mingka iKatte, Batara, Allata’ala tojenga, Allata’ala assarea katallassang, Karaeng mannannunganga. Punna larroKi’, ta’ge’gosoki buttaya, Punna nassuKi’ tattahangngai bansa-bansaya.
11 (Ikau ngaseng, he ummaka, musti nupauangi ke’nangaangkanaya lanipanraki anjo sikamma rewata-rewata tenaya napa’jari langika siagang buttaya. Lanipa’lanynyaki ke’nanga battu ri tompo’na buttaya.)
12 Napa’jari Batara buttaya lanri koasaNa, Napareki linoa lanri kacara’dekanNa na Naka’rang langika lanri akkala’ poreNa.
13 Poro assareji bawang parenta, nammarummo je’neka battu ri passimbanga. Battu ri cappa’-cappa’na buttaya Napabattu rammanga, na Napare’ kila’ tassioroka lalang ri bosia, kammayatompa Nakiring anginga battu ri pammolikanNa.
14 Nacini’na ngaseng anjo sikammaya sadara’mi rupataua, angkanaya ia dongoki siagang tena pammahanna. Sikamma panre bulaenga siri’-siri’ ngaseng, nasaba’ anjo patung barhala bate pare’na anu palusu’ siagang tena na’nyawa.
15 Anjo barhala-barhalaya tena anggaranna, siratangi nicau-cau siagang nihina. Punna narapiki sallang wattunna lapanraki ke’nanga.
16 Allata’alana Yakub tena nasangkamma anjo barhala-barhalaya; Ia ampa’jari sikontu apa niaka. Arenna iamintu Batara Kaminang Koasaya; Iami le’ba’ ampilei Israel a’jari umma’Na.
17 He pandudu’ Yerusalem, nikurungko ri musu! Lanri kammana anjo, apparuru mako!
18 Anne wattua laNapasambilai Batara sikontu bansa Yehuda mange ri pa’rasangang pammelakkanga; laniancuru’ ngasengko taba sikali. Iaminjo pasanNa Batara.
19 Akkio’mi pandudu’na Yerusalem angkana, "Sannaki loko’na ikambe siagang takkulleami pia. Riolo nakapangi ikambe angkanaya anne pa’risika akkulleji natanggong ikambe, padahala’ tena padeng.
20 Panra’mi kemana ikambe, siagang tappu’ ngasemmi sikamma otere’na. Tenamo akkulle ambangung kema siagang ampatabai kaeng-kaenna, lanri a’lampa ngasemmi ana’-anaka."
21 Appialima’ angkana, "Dongoki anjo pamimping-pamimpinta. Tena nappala’ pitunju’ ke’nanga mae ri Batara, iaminjo saba’na nasalasa ke’nanga, siagang kinipasiara’mo ri kere-keremae.
22 Pilangngeri! Nia’ kabara’ angkanaya nia’ se’re bansa ri bageang wara’ appa’nia’ kagegerang lompo. Tantarana lampa’jari sinoi kota-kota niaka ri Yehuda siagang tena nanipammantangngi. Kongkong-kongkong romanga lamangei anjoreng accokko."
23 Batara, kuassengi angkanaya tena manna sitau makoasa ampattantui sarenna yareka allewai oloang tallasa’na.
24 Pangngajarimi ikambe o Batara, mingka teaKi’ pamma’ji pa’risi’ dudua. Tea tongKi’ hukkungi ikambe punna lalang larroKi’, nasaba’ mattantu lapanra’ ngasengi ikambe.
25 Pa’bettese’mi larroTa mae ri bansa-bansa tenaya naaniKi’ siagang tenaya naero’ anynyomba ri Katte. Nasaba’ le’ba’mi napanraki taba sikali ummatTa siagang naancuru’ pa’rasanganna ikambe.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA