Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 E tanggal lema’ bulan ennem e taon se kapeng ennem bakto sengko’ ban tan-taretan laenna badha neng e pambuwangan, para pamimpinna oreng buwangan Yehuda entar ka tang bengko, laju ju’-toju’ apolong. O-tao kakobasa’anna Guste ALLAH Se Mahatenggi ngobasae sengko’.
2 Sengko’ adhanga, laju nangale’e badha se aropa akantha manossa. Dhari tengngana ka baba akaton kantha apoy, dhari tengngana ka attas arap-galirap akantha paronggu se eossowe.
3 Se akaton akantha manossa jareya mangaceng bagiyanna se akantha tanang, se pas laju agumba’ tang obu’. Saellana jareya, e dhalem pangatonan jareya, sengko’ eangka’ epatenggi e bang-abang bi’ Erroh Allah, sarta laju egiba ka Padalemman Socce e Yerusalim, ka labangnga pagarra taneyan bagiyan dhalem e penggir dhaja. E jadhiya badha arcana brahala se andaddiyagi dukana Allah.
4 Sengko’ pas nangale’e sonar se tera’ tar-kataran se nandha’agi ja’ Allahna Isra’il hadir e jadhiya, padha ban se etangale’e sengko’ e bakto sengko’ badha e penggirra Songay Kebar.
5 Dhabuna Allah ka sengko’, "He, manossa se ta’ langgeng, kodda’ abas ka dhaja." Sengko’ atoro’. E jadhiya, e erenganna mezba e seddi’na labang, sengko’ nangale’e brahala se maduka Allah.
6 Dhabuna Allah ka sengko’, "He, manossa se ta’ langgeng, apa ba’na nangale’e badha kadaddiyan apa e dhissa’ rowa? Abassagi sabarang tengkana oreng Isra’il, se majau Sengko’ dhari Tang Padalemman! Baji’na tengka jareya! Mara, bi’ Sengko’ ba’na eduduwana barang se lebbi majitjit pole!"
7 Sengko’ laju ebakta ka labangnga pagarra taneyan lowar se egabay palebadanna oreng mon maso’a. Sengko’ eduduwi lobang se badha e geddhung.
8 Dhabuna, "He, manossa se ta’ langgeng, paraja lobang jareya." Saellana sengko’ ajalannagi papakon jareya, sengko’ nangale’e labang.
9 Dhabuna ka sengko’, "Kassa’ maso’, tenggu apa bai tengkana reng-oreng e dhissa’ rowa! Baji’na tengka jareya!"
10 Sengko’ maso’ pas nenggu apa se badha e jadhiya. Dhung-geddhungnga kennengngan jareya egambari samacemma olar ban burun alas se haram laenna, bariya keya gambarra brahala acem-macem se epojja reng-oreng Isra’il.
11 E jadhiya badha pamimpinna bangsa Isra’il, bannya’na pettong polo oreng, e antarana tamaso’ Ya’azanya ana’na Safan. Kabbi padha neggu’ padupa’an bang-sebang, okossa bul-ngebbul.
12 Dhabuna Allah ka sengko’, "He, manossa se ta’ langgeng, apa ba’na nangale’e pa-apa se elakone para pamimpinna Isra’il jareya ta’ kalaban asa’-kasa’? Reng-oreng jareya ajalannagi kabakteyan e kennengngan se possa’ ban brahala; ca’na, lantaranna polana Sengko’ la ondur dhari nagara reya ban ta’ kera nangale’e tengkana reng-oreng jareya."
13 Pangeran laju adhabu ka sengko’, "Ba’na gi’ bakal nangaleyana tengkana reng-oreng jareya se lebbi majitjit pole."
14 Sengko’ laju ebakta ka labang saketheng bagiyan dhajana Padalemman Socce. E jadhiya sengko’ epanangale’e babine’an se nangese matena Diba Tamus.
15 Pangeran adhabu ka sengko’, "He, manossa se ta’ langgeng, ba’na nangale’e jareya? Gi’ bannya’ pole se lebbi majitjit ate."
16 Sengko’ laju ebakta ka taneyan dhalemma Padalemman Socce. E seddi’anna labang se elebadi oreng mon maso’a ka kennengngan se socce, e antarana mezba ban lorong, badha oreng bannya’na sagame’. Kabbi padha mongkore kennengngan se socce, padha asojud addhep ka temor nyemba ka are se moncar.
17 Pangeran adhabu ka sengko’, "He, manossa se ta’ langgeng, ba’na nangale’e jareya, ya? Reng-oreng Yehuda jareya gi’ arassa korang mon pera’ ngalakone sabarang tengka se majitjit akantha se la etangale’e ba’na rowa ban ngalakone sabarang se ta’ tao perikamanossa’an e saantero nagara. Reng-oreng jareya la’-mala’ ngalakone tengka jareya kabbi e dhinna’, e dhalem Tang Padalemman, ban sajan mapeggel Sengko’. Abassagi baramma reng-oreng jareya ya-nyeya Sengko’ kalaban cara se paleng jahat jareya!
18 Reng-oreng jareya bakal taowa rassana peggella Sengko’ se talebat rajana! Sengko’ ta’ aberri’a sapora ka reng-oreng jareya. Maske aera’ adu’a epace’kajana ka Sengko’, Sengko’ ta’ ngedhingngagiya!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA