Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ I bas wari pelimaken, bulan si peenemken, tahun si peenemken kenca kami i bas pembuangen, peminpin-peminpin kalak si ibuang i Juda nari, kundul ras aku i bas rumahku. Emaka rempet aku ikuasai tan TUHAN si Erdolat.

² Kutare ku datas, janah kuidah sada si tempasna bagi manusia. I bas awakna nari ku teruh teridah bagi api, janah i bas awakna nari ku das erkilat-kilat bagi tembaga si ipelas alu kertas pasir.

³ Idadakenna man bangku si tempasna bagi tan, jenari itangkapna bukku. Kenca bage i bas pengenehenen enda Kesah Dibata ngangkat aku meganjang jenari IbabaNa aku ku Jerusalem, ku pintu gerbang si arah utara. I je lit sada gana-gana si nembeh kal ate Dibata ngenenca.

⁴ I bas ingan e teridah man bangku terang si mesilo tandana Dibata nu Israel reh ku je, bali ras kuidah tupung aku i tepi Lau Kebar.

⁵ Nina Dibata man bangku, "O manusia si ermasap-masap tataplah ku utara." Kutatap ku utara, janah deherken batar-batar si lit i duru pintu gerbang e kuidah gana-gana si nembeh kal ate Dibata ngenenca.

⁶ Nina Dibata man bangku, "O manusia si ermasap-masap, idahndu ka nge kai si jadi? Perdiatekenlah perbahanen-perbahanen si melket si ilakoken kalak Israel i jenda, si erbahanca Aku lalap reh dauhna i bas inganKu si Badia e nari. Nandangi idahndu denga me tole perkara-perkara si ndauh melketen asa si enda."

⁷ Kenca bage IbabaNa aku ku dalan bengket ku kesain Rumah Pertoton, jenari IcidahkenNa man bangku sada lubang i bas tembok.

⁸ Nina man bangku, "Nusuklah kam arah lubang e," jenari kuidah sada pintun.

⁹ Nina man bangku, "To ku bas janah pernehenlah kejahaten ras perbahanen si macik si ilakokenna i je."

¹⁰ Emaka bengket aku, janah kuidah dingdingna dem alu gambar nipe ras rubia-rubia si deban si ipantangken, bage pe barang-barang si deban si isembah kalak Israel tupung si e.

¹¹ Peminpin-peminpin kalak Israel lit pitupuluh kalak i je, ikut pe Jahasanya anak Sapan. Sekalak-sekalak njemak ingan nutung kumenen, janah cimber kumenen ndai erdipul ku das.

¹² Isungkun Dibata aku nina, "O manusia si ermasap-masap, ma nggo idahndu kai si ibahan peminpin-peminpin Israel e alu erbuni-buni? Kerina ia sanga nembah man sada ingan si dem alu gana-gana. Alasenna eme, 'TUHAN labo ngidah kita. Nggo ItadingkenNa negeri enda.'"

¹³ Kenca bage nina ka TUHAN man bangku, "Idahndu denga me tole perbahanenna si termelketen asa si enda."

¹⁴ Emaka IbabaNa aku ku pintu gerbang si arah utara Rumah Pertoton. I je IcidahkenNa man bangku piga-piga kalak diberu sangana nangisi kematen dibata-dibata Tammus.

¹⁵ IsungkunNa aku nina, "Ma nggo idahndu e? Idahndu denga me tole perbahanen si termelketen asa si e."

¹⁶ Emaka IbabaNa aku ku kesain si i tengah Rumah Pertoton. Deherken dalan bengket ku bas ingan si badia, kelang-kelang batar-batar ras labah, lit i je kira-kira dua pulu lima kalak dilaki. Ipudikenna ingan si badia e, mungkuk ia ku Timur lako nembah man matawari si sangana nangkih.

¹⁷ Ikataken TUHAN man bangku nina, "O manusia si ermasap-masap ma nggo idahndu e? Kalak Juda enda la puas alu ngelakoken kerina perbahanen si melket si nggo idahndu e saja; la puas akapna arah ngelakoken pemerasen i belang-belang negeri e, tapi arus ka kepe ia reh ku Rumah Pertoton enda ngelakoken si e kerina, si mahanca tambah kal ateKu nembehna. Nehenlah uga sangatna penggombangina Aku alu dalan si macikna kal.

¹⁸ Erkiteken si e inanamina me uga sangatna pernembeh ateKu man bana. La Kupulahi ia, janah la sitik pe ateKu mekuah man bana. Serko-serko me ia ertoto man bangKu asa gangna, tapi la Aku nggit megikenca."

Yehezkiel

Video Yehezkiel 8

Ikuti Kami:

KONTAK | PARTISIPASI | DONASI