Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai roh ma hata ni Jahowa hu bangku,
2 “Ale anak ni jolma, dompakkon ma bohimu hu dolog-dolog ni Israel anjaha manjahai ma ho dompaksi,
3 hatahon ma, ʻAle dolog-dolog ni Israel, tangihon ma hata ni Tuhan Jahowa. Sonon do hata ni Tuhan Jahowa dompak sagala dolog ampa buntu-buntu, dompak lombang bagas ampa habungan: Tonggor ma, parohon-Ku ma bannima podang, gabe parsedaon-Ku ma panumbahannima bani ianan na gijang.
4 Maningon parsedaon do anjapanjapnima anjaha parropukon-Ku anjapanjap pardahupaannima; anjaha rasei bahenon-Ku halak na binunuh humbennima i lobei ni gana-gananima.
5 Sampakkonon-Ku do bangkei ni halak Israel i lobei ni gana-gana ni sidea, anjaha erapon-Ku do holi-holinima liot anjapanjapnima.
6 Bani haganup ianannima parsedaon do sagala huta anjaha parreongon panumbahannima bani ianan na gijang, ase seda anjaha marumbak anjapanjapnima, maropuk anjaha mangkabolah gana-gananima, hona rumbakkon anjapanjap pardahupaannima, anjaha bois na pinaulinima.
7 Radag ma halak na tarbunuh i tongah-tongahnima, gabe botohonnima ma, Ahu do Jahowa.
8 Tapi paturuton-Ku do deba manggoluh hun bannima, na maluah humbani podang i tongah-tongah ni bangsa-bangsa, bani na Huerap ai hanima i nagori-nagori ai.
9 Sidea na maluah ai, ingaton ni sidea ma Ahu i tongah-tongah ni bangsa-bangsa, pambuangan bani sidea, dob Huropuki uhur parbangkison ni sidea ai, na manlembang hun Bangku, sonai mata parbangkison ni sidea ai, na mangkawah bani gana-gana ni sidea; gabe magigi ma sidea mangidah diri ni sidea sandiri, halani hajahaton na hinorjahon ni sidea, halani habutakon ni sidea ai.
10 Anjaha botohon ni sidea ma, Ahu do Jahowa, seng hape na so marhala Hulumbahon hamagouan sibahenon-Kai bani sidea.”
11 Sonon do hata ni Tuhan Jahowa, “Martopap ma ho, injak-injakkon ma naheimu, anjaha hatahon ma, ʻMagou ma!ʼ Halani haganup hasamboron na hinorjahon ni halak Israel ai maningon rasei do sidea bahenon ni podang, lohei pakon sampar.
12 Ise na daoh matei do bahenon ni sampar, anjaha ise na dohor matei do bahenon ni podang, anjaha ise na tading anjaha na bansah matei gayuran do. Sonai ma padalanon-Ku ringis-Ku bani sidea.
13 Jadi tandaonnima ma, Ahu do Jahowa, anggo radag ma na rasei humbani sidea i tongah-tongah ni gana-gana ni sidea, inggot bani anjapanjap ni sidea, i atas ni ganup buntu-buntu, bani pakpak ni sagala dolog, i toruh ni ganup hayu na maratah, i toruh ni ganup jajabi na matabun, bani ganup panutungan dahupa i lobei ni gana-gana ni sidea.
14 Anjaha pagostongon-Ku do tangan-Ku dompak sidea laho mambahen tanoh ai halong anjaha tarulang, bani haganup ianan ni sidea, hun halimisan nari das hu Ribla. Jadi botohon ni sidea ma, Ahu do Jahowa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA