Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 PANGERAN adhabu ka sengko’, "E, manossa se ta’ langgeng, abassagi nong-gunong Isra’il rowa, pas kabala Tang pessen parkara okoman se etarema’a nong-gunong jareya.
2 (6:1)
3 Soro edhingngagi ban soro estowagi apa se ekoca’agi Sengko’, GUSTE Allah Se Mahatenggi, ka nong-gunong jareya, bariya keya ka mo’-gumo’, rang-jurang ban ra-cora. Ongguwan, Sengko’ ngeremmagiya peddhang maancora sakabbinna kennengnganna pamojja’anna brahala.
4 Ba-mezbana epagujura ban padupa’anna epabella’a kabbi. Reng-oreng e jadhiya epateyana kabbi e adha’anna brahalana.
5 Mayyidda reng-oreng Isra’il bi’ Sengko’ epajalamperrana, ban lang-tolangnga etabura e sakalenglengnga ba-mezbana.
6 Tha-kottha Isra’il epamosna’a kabbi, ba-mezba ban la-brahalana epaancora kabbi sampe’ atabuyan, padupa’anna epalejjara kabbi, ban sabarang se ekagabay reng-oreng jareya bakal elanga.
7 E man-dhimman bakal badha’a oreng se epate’e, ban oreng se salamet bakal taowa ja’ Sengko’ reya PANGERAN.
8 E antarana reng-oreng jareya badha sakone’ se bi’ Sengko’ epalopoda dhari panjagalan jareya, tape epabalessadana e antarana sa-bangsa;
9 e dhissa’ reng-oreng jareya bakal odhi’a e dhalem pambuwangan. Saellana jareya reng-oreng buru bakal enga’a ka Sengko’ ban bakal ngarteya ja’ Sengko’ ngokom ban ya-nyeya aba’na polana atena ta’ esto ka Sengko’. Reng-oreng jareya adina’agi Sengko’ ban mele brahala menangka gantena Sengko’. Saellana jareya reng-oreng jareya bakal ngalennyerra ka aba’na dibi’ polana sakabbinna lalakon se jahat ban kotor, se la ekalako aba’na.
10 Daddi reng-oreng jareya bakal taowa ja’ Sengko’ reya PANGERAN ban ja’ sakabbinna Tang parengeddan banne pera’ caca malolo."
11 GUSTE Allah Se Mahatenggi adhabu, "Mara pasossa! Mara nanges! Nanges pangennes polana sakabbinna lalakon se jahat ban kotor se la ekalako bangsa Isra’il. Reng-oreng jareya bakal mateya polana paperrangan, kalaparan ban wabah panyaket.
12 Reng-oreng jareya bakal taowa rassana pangamogga Tang ate se peggel. Reng-oreng se badha e jauna e pambuwangan bakal sake’a pas terros mate; se semma’ bakal mateya e dhalem perrang, ban karena bakal mateya kalaparan.
13 Yit-mayyit bakal ajalamperrana e antarana la-brahala ban e sabingkerra ba-mezba, ajalamperran e saneyap gumo’ se tenggi, ban e konco’na saneyap gunong, e babana saneyap kajuwan se gumbus ban saneyap kajuwan se raja; pandha’na, e man-dhimman se ekennengnge reng-oreng jareya ngobbar kurban ka la-brahalana. Saneyap oreng pas bakal taowa ja’ Sengko’ reya PANGERAN.
14 Onggu, Sengko’ bakal ngacongngagiya Tang tanang ban maancora nagarana reng-oreng jareya, sampe’ daddi ce’ seppena, molae dhari Sagara Beddhi Lao’ sampe’ ka kottha Ribla e dhaja. Dhari se ekennengnge oreng Isra’il, e dhimma’a bai, tadha’ settonga se bi’ Sengko’ epasalamedda. Sakabbinna oreng tanto pas tao ja’ Sengko’ PANGERAN."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA