Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai ibobai ma ahu use hu labah ni Rumah na Mapansing ai, anjaha tonggor ma, luar do bah hun toruh ni molmolan ni rumah ai dompak hapoltakan, ai mandompakkon hapoltakan do Rumah na Mapansing ai. Mabaor do bah ai hun toruh ni tembok pardangsina ni rumah ai hampit dangsina ni anjapanjap ai.
2 Dob ai ibobai ma ahu luar hun horbangan parutara ai, anjaha iarahkon ma ahu mardalan maringgot hampit darat hu horbangan parhapoltakan ai, anjaha tonggor ma, marsual-sual do bah ai roh hun lopah pardangsina ai.
3 Sanggah laho dalahi ai dompak hapoltakan, manjolom tali sibar-sibar ibagas tanganni, isibar ma saribu asta, anjaha itogu ma ahu mandipari bah ai; singgan mata ni ari ni nahei do bagasni ai.
4 Dob ai isibar ma use saribu asta, anjaha itogu ma ahu mandipari bah ai, sibar towod do bagasni ai. Isibar use ma saribu asta, anjaha itogu ahu mandipari bah ai; sibar binongei do bagasni ai.
5 Dob ai isibar use ma saribu asta, bah banggal do ai, na so boi tardipari ahu; ai bagas do bah ai, silanguyon mando, sada bah banggal na so tardipari.
6 Dob ai nini ma hu bangku, “Ale anak ni jolma, domma ididah ho in? Dob ai itogu ma ahu mulak manopi-nopi bah ai.
7 Sanggah na mulak ai ahu, tonggor ma, adong do buei hayu bani topi ni bah ai, angkup lopah.
8 Jadi nini ma dompak ahu: Ia bah on mabaor do dompak tanoh hampit hapoltakan, dob ai tuad hu pamah ai; dob masuk ai hu laut Matei, hu bah na margaram ai, ibahen ma ai gabe tawar.
9 Atap huja pe das bah ai, manggoluh ma ijai sagala na marhosah ampa na manggulmit, anjaha dengke pe buei tumang ma; ai anggo das ma bah on hujai gabe tawar ma bah ni laut ai. Atap huja pe das bah on, manggoluh ma ganup ijai.
10 Parjala pe jongjong bei ma i topini ai hun En-Gedi das hu En-Eglaim, panjomuran ni jala ma ai; ai buei do dengke, marbagei-bagei songon na ibagas laut bolag.
11 Tapi anggo paya-payani ampa rawang-rawangni seng gabe dear ai, pambuatan ni garam do ai.
12 Anjaha i topi ni bah ai, angkup lopah ni bah ai, tubuh do ijai bagei-bagei ni hayu bahen sipanganon. Seng ra melus bulungni ai anjaha seng maronti marbuah, tapi marbuah do ai siap bulan halani bahni ai, roh hun ianan na mapansing ai. Gabe sipanganon do buahni anjaha bulungni gabe tambar.
13 Sonon do hata ni Tuhan Jahowa, “On ma parbalogan sibahenonnima laho marbagi tanoh ai bahen parbagianan bani halak Israel sisapuluh dua marga ai. Bani si Josep dua bagian.
14 Dos ma parbagianannima bani tanoh ai; Hupagostong do tangan-Ku marbulawan laho mamberehon on bani ompungnima; halani ai bannima do tanoh on bahen parbagianannima.
15 On ma parbalogan ni tanoh in: Hampit utara, ai ma hun laut bolag ai, manlopusi Hetlon laho hu Sedad,
16 hu Hamat, Berota, Sibrayim, na bani parbalogan ai, i holangkolang ni Damaskus ampa Hamat, das hu Hazar-Enon, na bani parbalogan ni Hauran.
17 Ase parbalogan ai gistang do ai hun laut das hu Hazar-Enon, na bani balog parutara ampa Damaskus, das hu parbalogan ampa Hamat i utara. Ai ma parbalogan hampit utara.
18 Parbalogan hampit hapoltakan, ai ma hun Hazar-Enon na i holangkolang ni Hauran ampa Damaskus, dob ai Bah Jordan na i holangkolang ni Gilead ampa tanoh Israel das hu laut parhapoltakan hu Tamar. Ai ma parbalogan hampit hapoltakan.
19 Parbalogan hampit dangsina, ai ma hun Tamar das hu bah partinggilan na i Kades ai, hunjai manopi-nopi bah Masir laho hu laut bolag. Ai ma parbalogan hampit dangsina.
20 Parbalogan hampit hasundutan, ai ma laut bolag ai das hu tontang ni Hamat. Ai ma parbalogan hampit hasundutan.
21 Ase bagi hanima ma tanoh in bannima mangihutkon marga ni Israel.
22 Marjomput na sinurat ma hanima laho marbagi tanoh in, bahen parbagianan bannima ampa bani halak na manginsolat i tongah-tongahnima, na dob tubuhan anak i tongah-tongahnima. Maningon songon halak Israel do sidea hiraonnima; maningon dapotan parbagianan do sidea songon hanima marhitei na manjomput na sinurat i tongah-tongah ni marga ni Israel.
23 I tongah-tongah ni marga ja panginsolat ai marianan, ijai ma bere hanima bani parbagiananni,” nini Tuhan Jahowa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA