Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai ibobai ma ahu mulak hu horbangan ni ianan na mapansing ai, na mandompakkon hapoltakan; tapi tutup do ai.
2 Jadi nini Jahowa ma hu bangku, “Maningon totap do tutup horbangan on; seng bulih buhaon on, ise pe lang bulih masuk hunjon, halani na dob masuk Jahowa, Naibata ni Israel hunjon; halani ai do ase totap tutup on.
3 Pitah raja in do, halani raja ia, bulih hundul ijon, laho mangankon na ginalangkon i lobei ni Jahowa; humbani surambih ni horbangan ai ma ia masuk anjaha humbani dalan na sada ai ma kaluar.
4 Dob ai ibobai ma ahu hun horbangan parutara ai hu lobei-lobei ni Rumah na Mapansing ai; mangkawah ma ahu, anjaha tonggor ma, hamuliaon ni Jahowa do manggoki rumah ai; jadi manrogop ma ahu.”
5 Tapi nini Jahowa ma hu bangku, “Ale anak ni jolma, parimbagaskon ma, kawah ma ho marhitei matamu, anjaha tangi ma ho marhitei pinggolmu pasal haganup sipatugahon-Ku bam mangonai haganup aturan-aturan ni rumah ni Jahowa, ampa haganup titah-Ni; parimbagaskon ma pasal parmasuk hubagas Rumah Panumbahan in ampa pasal parluar hun jin.
6 Anjaha hatahon ma hubani ginompar ni Israel sipanlawan in: Sonon do hata ni Tuhan Jahowa: Sungkup ma in, hanima na mangkorjahon ganup hasamboronnima in, ale ginompar ni Israel.
7 Ai ipaturut hanima do masuk halak na legan, na so marsunat uhurni ampa dagingni, bani ianan-Ku na pansing in, laho pabutakkon rumah-Ku, sanggah na manggalangkon ruti, taboh-taboh ampa daroh hanima Bangku; iosei hanima do padan-Ku marhitei haganup pambahenannima na masambor in.
8 Seng iramotkon hanima horja ibagas ianan-Ku na mapansing in, tapi halak na legan do ipabangkit hanima mandalankon horjang-Ku bani ianan-Ku na pansing in.
9 Sonon do hata ni Tuhan Jahowa: Haganup halak na legan, na so marsunat uhurni pakon dagingni, lang malo masuk hubagas ianan-Ku na pansing in, ai ma ganup halak na legan, na manginsolat i tongah-tongah ni halak Israel.
10 Tapi halak Levi, na paganggang dirini hun Bangku, sanggah na kahou ai Israel manundalhon Ahu laho mangihutkon gana-gana ni sidea, maningon porsanon ni sidea do hajahaton ni sidea.
11 Gabe siparugas mando sidea bani ianan-Ku na mapansing in, ai ma gabe parjaga bani horbangan ni Rumah Panumbahan, gabe sipangidangi i Rumah Panumbahan; sidea ma na manayat galangan situtungon pakon galangan sisayaton bani halak simbuei, maningon jongjong do sidea ilambung ni halak na mabuei, laho mangidangi sidea.
12 Halani ra sidea marugas bani simbuei ai i lobei ni gana-gana ni sidea, gabe sidea parhiteian ni ginompar ni Israel marhajahaton, halani ai do ase Hupagostong tangan-Ku marbija dompak sidea, nini Tuhan Jahowa, paboa maningon porsanon ni sidea hajahaton ni sidea.
13 Lang bulih be sidea roh dohor hu Bangku laho mandalankon jabatan hamalimon barang roh hundohor bani na mapansing-mapansing atap bani galangan tang na susi; maningon do porsanon ni sidea habadoron ni sidea ai, halani parbalikon ni sidea ai.
14 Hubahen do sidea siparjaga bani Rumah Panumbahan, sidalankon horja atap aha silahoan ijai.
15 Tapi anggo malim-malim, halak Levi ai, ai ma anak ni si Sadok, na totap mandalankon horja ibagas ianan-Ku na mapansing in, sanggah na kahou ai Israel hun Bangku, bulih do sidea roh mandohori Ahu, marugas bangku; bulih do sidea jongjong i lobeihu, laho manggalangkon hu Bangku taboh-taboh ampa daroh, nini Tuhan Jahowa.
16 Bulih do sidea masuk hubagas ianan-Ku na mapansing in anjaha bulih do sidea mandohori mejang-Ku, laho marugas i lobei-Hu, anjaha laho mandalankon horjang-Ku.
17 Anggo sihol masukan ni sidea horbangan ni alaman parbagas in, maningon pakeion ni sidea do pakeian linnen, seng bulih pakeionni sidea pakeian wol, sadokah marugas sidea bani horbangan ni alaman parbagas in atap ibagas Rumah na Mapansing in.
18 Maningon margotong linnen sidea, anjaha marsaluar linnen bani binongeini; seng bulih sidea marbontingkon atap aha pe, na mambahen hadogasan sidea.
19 Anggo laho sidea hu darat, hu alaman pardarat ai, hubani halak simbuei ai, maningon tanggalon ni sidea do pakeian ni sidea sanggah marugas ai, anjaha tibalhononni ai i kamar na mapansing ai; pakeian na legan ma ipakei, ase ulang mandipar na mapansing ai marhitei pakeian ni sidea ai bani halak na mabuei ai.
20 Seng bulih suhuron ni sidea ulu ni sidea, atap paturuton ni sidea ganjang jambulan ni sidea, tapi maningon pangkason do inggot ulu ni sidea.
21 Seng bulih minum anggur malim, anggo laho masuk ia hu alaman parbagas ai.
22 Lang bulih ompoanni naboru na mabalu atap naboru na sinirangkon; maningon anak boru do humbani ginompar ni Israel, atap na mabalu na hinabaluhon ni malim ompoanni.
23 Maningon ajarhonon ni sidea do bani bangsang-Ku parleganan ni na mapansing humbani na so pansing, anjaha pabotohkononni bani sidea legan ni na susi humbani na mabutak.
24 Bani parsalisihan sidea ma gabe panguhum, anjaha iuhumi ma ai romban hubani uhum na hum Bangku. Maningon ramotkonon ni sidea do homa aturan-Ku ampa titah-Ku bani haganup pestang-Ku na dob Hutontuhon, anjaha maningon papansingon ni sidea do Sabat-Ku.
25 Seng bulih pabutakon ni sidea dirini marhitei na mandohori na matei; tapi bulih do butak sidea halani bangkei ni bapa atap inang, anak atap boru, sanina atap botou na so laho ope.
26 Dob gabe butak ia, hiraon ma bani pitu ari, ai pe ase pansing ia use.
27 Anjaha bani ari parmasukni ai use hu ianan na mapansing ai, ai ma hu alaman parbagas ai, laho marugas bani ianan na mapansing ai, maningon galangkononni do galangan pardousaonni, nini Tuhan Jahowa.
28 Seng dong parbagianan bani sidea, Ahu do parbagianan bani sidea; seng marrupei sidea bahenonnima bani tanoh ni Israel, Ahu do rupei bani sidea.
29 Ia galangan sipanganon, galangan pardousaon ampa galangan parsalahan maningon sidea do mangankon ai; anjaha sagala na pinapulig ni Israel, sidea do simadasi.
30 Anjaha limbuah ni haganup gogoh ni tanoh ampa haganup guguan na ginalangkon, malim do simada ai; maningon bereonnima do homa bani malim limbuah ni nitaknima, ase marianan pasu-pasu bani rumahnima.
31 Sagala na matei-matei atap na hona soroh, manuk-manuk atap binatang pe ai, seng bulih panganon ni malim.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA