Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nampa anjo tu bura’nea narurunganga’ pole mange ri pakke’bu’ lompo ri bageang irayangnganga ri pammantanganna Balla’Na Batara. Anjo pakke’bu’ lompoa tattongkoki.
2 Nakanamo Batara ri nakke, "Anne pakke’bu’ lompoa musti tattongkoki siagang takkulleai nisungke. Tena manna sitau akkulle antama’ anjoreng, nasaba’ iNakke, Karaeng Allata’alana Israel, le’ba’Ma’ antama’ ri BallakKu angngolo ri anne pakke’bu’ lompoa. Jari, anne pakke’bu’ lompoa musti tuli tattongkoki.
3 Mingka pamarenta anna’galaka koasa akkullei a’lampa mange ri anjo pakke’bu’ lompoa untu’ angkanrei kanre matangkasaka ri dallekangKu. Musti antamaki angngolo ri kamara’ lompoa siagang punna ammotereki ia todong anjo naolo."
4 Nampa anjo tu bura’nea naeranga’ mange ri pakke’bu’ lompo bageang wara’, assidallekanga siagang Balla’Na Batara. Kuparhatikangi, siagang kucini’mi anjo Balla’Na Batara nitongko’ ri caya accilla’ tanra kahaderanNa Batara. Nampa anra’bama’ naung nakusu’ju’,
5 siagang Nakanamo Batara ri nakke, "He tau, parhatikangi baji’-baji’ apa nucinika siagang nulangngereka. LaKupauangko sikamma paratoranna siagang hukkunna ri passala’na anne BallakKu. Cataki baji’-baji’ inai-nai nipa’biang antama ri BallakKu siagang inai-nai takkullea.
6 Paui mae ri anjo umma’ Israel nangaia angngewa, angkanaya iNakke, Batara Kaminang Tinggia, taerokaMa’ allappassangi ke’nanga anggaukangi ra’masaka.
7 Le’ba’mi ke’nanga anra’massi BallakKu, nasaba’ lalang nipassareanna mae ri Nakke jannana siagang cera’na koro’banga, napa’biangi ke’nanga antama sikamma bansa maraeng tenaya nassunna’, siagang tena namannuruki ri Nakke. Lanri anjo sikamma panggaukanna ke’nanga appakaringi’-ringika, nadakkaimi parjanjiangKu siagang ke’nanga.
8 Teai ke’nanga bawang anggaukangi sikamma pa’gaukang matangkasaka lalang ri BallakKu, passangalinna tau bansa maraenga nasare tongi tugasa’ ke’nanga untu’ anggaukangi.
9 INakke, Batara Kaminang Tinggia, ampa’la’bangi ampaui angkanaya bansa maraeng tenaya nassunna’ siagang tutenaya namannuruki ri Nakke, tena nipa’biangi antama’ ri BallakKu. Anjo atorang kammaya nataba tongi bansa maraeng niaka ammantang tuli ri tangnga-tangngana bansa Israel".
10 Nakana Batara ri nakke, "LaKuhukkungi tu Lewi siagang tu Israel maraengannaya, lanri nabokoiA’ siagang anynyombai ri barhala.
11 Lalang ri BallakKu, poro akkulleji bawang ke’nanga allayaniA’ salaku pagawe siagang pajaga pakke’bu’ lompo. Akkullei ke’nanga ammolong olo’-olo’ untu’ koro’bang nitunu siagang passare, siagang musti tuli allayani ke’nanga ri ummaka.
12 Mingka lanri nagaukannamo ke’nanga upacara anynyombaya ri barhala untu’ bansa Israel, siagang naeranna anjo bansa Israel mange ri dosaya, jari iNakke, Batara Kaminang Tinggia, assumpaMa’ angkanaya musti Kuhukkungi ke’nanga.
13 Anjo ke’nanga tenamo nakkulle allayaniA’ salaku imang yareka anseroi apa matangkasaka untu’ iNakke, yareka antama’ ri Tampa’ Kaminang Matangkasaka. Iami anjo hukkungang mae ri panggaukang-panggaukang ra’masa’ nagaukanga ke’nanga.
14 Kamma-kamma anne Kusarei ke’nanga anggaukangi jama-jamang kasaraka iamintu parallua nijama lalang ri BallakKu."
15 Nakana Batara Kaminang Tinggia, "Ri wattungKu nabokoi bansa Israel, imang-imang tu Lewi battua ri jari-jarina Zadok tamamminrayai allayaniA’ lalang ri BallakKu. Lanri kammana anjo iami anjo ke’nanga musti allayaniA’ siagang battu mae ri dallekangKu untu’ angngerang passare janna siagang cera’na sikamma koro’banga.
16 Ke’nangaji bawang akkulle antama ri BallakKu, allayaniA’ ri tampa’ pakkorobangngangKu, siagang ampimpingi ibadaya ri BallakKu.
17 Ri wattunna antama ke’nanga ri pakke’bu’ lompoa a’lampa mange ri paranglakkeng bageang lalanga, musti ammakeang kaeng lenangi ke’nanga. Takkulleai ke’nanga ammake pakeang wol punna tugasaki ke’nanga ri paranglakkeng bageang lalanga, yareka lalang ri BallakKu.
18 Sollanna tena nabussang yareka assongo’ ke’nanga, musti ammakei saluara’ lenang na tena nammake passikko’ aya’, siagang passikko’ ulu battu ri kaeng lenang.
19 Punna a’lampai ke’nanga assulu’ ri paranglakkeng pantaranga, iamintu tampa’ pa’rappunganna ummaka, anjo imang-imanga musti nasungkei pakeang dinasa’na ke’nanga ilalang ri kamara’-kamara’ matangkasaka ri BallakKu, nampa ammake pakeang maraeng, sollanna anjo pakeang matangkasaka tena nabalai ummaka.
20 Sikamma imanga takkulleai nagondolo’ ulunna ke’nanga, yareka nalappassangi la’bu uu’na. Anjo uu’na ke’nanga musti nicukkuru’ bodoi situru’ atorang le’baka nipattantu.
21 Takkulleai ke’nanga angnginung anggoro’ punna eroki ke’nanga antama ri paranglakkeng bageang lalanga.
22 Sikamma imanga tulolo Israel ji bawang akkulle nabuntingi, iamintu tuloloa iji yareka jandana se’rea imang. Takkulleai ke’nanga ambuntingi baine le’baka nitalla’.
23 Sikamma imanga musti naajaraki ummakKu untu’ angngassengi angkanaya kereanga nisa’la’ untu’ iNakke siagang kereanga tena, kereanga matangkasa’ situru’ agamaya siagang kereanga ra’masa’.
24 Punna nia’ passisala-salang lanri parkara hukkung, musti napakabajiki ke’nanga situru’ hukkung-hukkungKu. Musti napakalompoi ke’nanga allo lompo agamaya, situru’ atorang-atorangKu siagang hukkung-hukkungKu, kammayatompa napakalompoi allo Pammari-marianga salaku allo nisa’laka untu’ iNakke.
25 Se’rea imang takkulleai nara’massi kalenna lanri naberona mayaka, pantaranganna maya’na tau toana, ana’na, sari’battang bura’nena yareka sari’battang bainena tenayapa nale’ba’ a’bunting.
26 Punna tangkasa’mi ammotere’, musti attayangi pole tuju allo,
27 nampa a’lampa mange ri paranglakkenna BallakKu, siagang assare koro’bang untu’ antangkasi kalenna sollanna akkulle tugasa’ ammotere’ ri BallakKu. INakke, Batara Kaminang Tinggia, anne akkana.
28 Sikamma imanga natarimai anjo jama-jamang imanga salaku bageang ri apa Kupassareanga mae ri Israel siagang jari-jarina. Takkulleai ke’nanga ammallaki apa-apa ri Israel: INakkemi a’jari apa-apanna, napatanga ke’nanga.
29 Katallassanna ke’nanga iamintu musti battu ri gandung passarea, koro’bang pannangkasi dosa, siagang koro’bang passambe karugiang; sikontu-kontuna apa nipassareanga mae ri Nakke, musti nisareangi ke’nanga.
30 Sikamma imanga musti nisareangi bageang kaminang bajika battu ri sikontu wassele’ alleang bungasaka, siagang battu ri apa-apa mamo nipassareanga mae ri Nakke. Punna appare’ bansa Israel roti, anjo roti bungasa’ nipareka musti untu’ imanga. Jari laKubarakkaki ruma tanggana bansa Israel.
31 Jangang-janganga siagang olo’-olo’ maraengannaya punna mate kalennai yareka mate nikokkoki ri olo’-olo’ sekke’, takkulleai sikamma imanga angkanrei."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA