Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai roh ma hata ni Jahowa hu bangku, mangkatahon,
2 “Ale anak ni jolma, parsahapkon ma hasomanmu na sabangsa, anjaha hatahon ma bani sidea: Anggo Huparoh podang hubani sada nagori, jadi roh pangisi ni nagori ai mambuat sada halak hun tongah-tongah ni sidea, anjaha ipabangkit sidea ia gabe siparjaga bani sidea,
3 anjaha anggo ididah roh podang ai dompak nagori ai, gabe isompul tarompit ai, laho palumbahon bangsa ai,
4 jadi anggo adong na manangar sora ni tarompit ai, hape seng ra ia palumbaon, gabe roh podang ai anjaha ibunuh ia, marbilang hubani sandiri ma darohni ai.
5 Ibogei do sora ni tarompit ai, hape seng ra ia palumbaon, marsapata hubani ma darohni. Tapi halani ipalumba parjaga ai do, jadi maluah ma hosahni.
6 Tapi, anggo ididah parjaga ai podang ai roh, hape seng isompul tarompit ai, gabe seng hona palumba bangsa ai, gabe roh podang ai, anjaha dong na tarbunuh humbani sidea: matei do halak ai ibagas dousani, tapi humbani parjaga ai do tungguonku darohni.
7 Tapi anggo ho, ale anak ni jolma, domma hupabangkit ho gabe parjaga bani ginompar ni Israel, anggo adong itangar ho sada hata humbani pamangan-Ku, lumbahon ma ai bani sidea ibagas goran-Ku.
8 Anggo Huhatahon bani halak parjahat: Maningon matei do ho, ale parjahat tapi seng marsahap ho palumbahon parjahat ai, ase itadingkon dalanni ai, sai na matei do namin parjahat ai ibagas hajahatonni, tapi humbani tanganmu do tungguon-Ku darohni.
9 Tapi, anggo ipalumba ho do parjahat ai, ase itadingkon dalanni ai, hape seng ra ia mulak manadingkon dalanni ai, sai na matei do ia ibagas hajahatonni, tapi maluah do anggo hosahmu.
10 Anjaha ho ale anak ni jolma, hatahon ma hubani ginompar ni Israel: Sonon do sahap-sahapnima: Mangonai bennami do panlanggaronnami pasal dousanami, anjaha lambin masab do hanami ibahen, sonaha ma boi manggoluh ope hanami?
11 Hatahon ma bani sidea: Songon sintongni manggoluh Ahu, nini Tuhan Jahowa, sabonar seng marosuh uhur-Hu mangidah hamatean ni parjahat, tapi ase mulak do parjahat ai manadingkon dalanni, ase manggoluh ia. Mulak, mulak ma hanima humbani dalannima na jahat in; ai mase ma rahanan matei hanima, ale ginompar ni Israel?
12 Ho ale anak ni jolma, hatahon ma hubani bangsamu: Hapintoron ni halak parpintor seng tarpaluah ia dirini bani panorang panlanggaronni; anjaha pasal hajahaton ni parjahat, seng madabuh ia halani ai, asal itadingkon hajahatonni ai; halak parpintor seng boi manggoluh ia halani hapintoronni hinan, anggo mardousa ia.
13 Age pe domma Huhatahon bani halak parpintor: Maningon manggoluh do ho! Anjaha martenger ni uhur ia bani hapintoronni ai, hape idalankon hajahaton, haganup hapintoronni ai seng be ingaton ai; tapi matei mando ia halani hajahaton na hinorjahonni ai.
14 Porini domma Huhatahon bani halak parjahat: Maningon matei do ho! Hape itadingkon dousani ai, anjaha idalankon uhum ampa hapintoron,
15 ai ma, ipaulak parjahat ai sikoram, ipasuang na nirampasni, marparlahou ia ibagas titah hagoluhan, anjaha seng idalankon hagedukon, maningon manggoluh do ia, seng anjai matei ia.
16 Haganup dousa, na dob hinorjahonni ai, seng be hiraon bani; halani ihorjahon do aturan pakon uhum ampa hapintoron, maningon manggoluh do ia.
17 Tapi ihatahon bangsamu do: Seng sintong dalan ni Tuhan! Hape dalan ni sidea sandiri do na so sintong.
18 Anggo manlembang halak parpintor humbani hapintoronni, gabe ihorjahon hajahaton, maningon matei do ia halani ai.
19 Anjaha anggo itadingkon halak parjahat hajahatonni, anjaha idalankon uhum ampa hapintoron, manggoluh do ia halani ai.
20 Hape ihatahon hanima: Seng sintong dalan ni Tuhan! Ale ginompar ni Israel, domu hubani parlahounima bei do hanima uhumon-Ku.
21 Pasapuluhdua-tahunkon, bani ari lima bulan sapuluh, dob tarbuang hanami, roh ma sada halak na maluah hun Jerusalem marayak ahu, mangkatahon, Domma talu huta ai!
22 Ia tangan ni Jahowa domma tampei bangku bodari ni ai, paima roh halak na maporus ai; iungkab do pamanganku bani panorang parroh ni halak ai bangku sogod-sogod; jadi buha ma pamanganku, seng longah be ahu.
23 Roh ma hata ni Jahowa hu bangku, mangkatahon,
24 Ho ale anak ni jolma, sonon sahap-sahap ni pangisi ni ianan na dob maseda ai i tanoh Israel: Si Abraham, sahalaksi do hansa hape gabe parbagiananni do tanoh in; buei do anggo hita, tontu iberehon do tanoh in gabe parbagiananta.
25 Halani ai hatahon ma bani sidea: Sonon do hata ni Tuhan Jahowa: Ipangan hanima gulei marhasoman daroh, mangkawah do matanima dompak gana-gananima, anjaha manduruskon daroh do hanima; mintor tartean hanima ma tanoh in?
26 Marpangajaman do hanima bani podangnima, ihorjahon hanima do na masambor, anjaha ganup do hanima pabutak jolma ni hasomanni; mintor tartean hanima ma tanoh in?
27 Hatahon ma sonon bani sidea: Sonon do hata ni Tuhan Jahowa: Songon sintongni manggoluh Ahu, maningon rasei do bahenon ni podang na marianan bani huta na dob maseda ai; anjaha halak na marianan i darat ondoskonon-Ku do gabe sipanganonni binatang; anjaha halak na adong bani dolog batu ampa liang-liang maningon matei do bahenon ni sampar.
28 Bahenon-Ku do tanoh ai gabe halimisan anjaha tarulang, anjaha marujung do sagala pangenjengon ai; gabe lungun ma dolog-dolog ni Israel, seng dong be halak na montas hunjai.
29 Jadi tandaon ni sidea ma, Ahu do Jahowa, anggo gabe halimisan anjaha tarulang tanoh ai Hubahen, halani haganup hasamboron na hinorjahon ni sidea.
30 Ia ho, ale anak ni jolma, bangsamai, na mansahap-sahapkon ho i lambung ni tembok ampa bani labah ni rumah-rumah, nini samah sidea, ganup bani hasomanni: Eta, anjaha tangar hita ma hata aha do ai, na roh humbani Jahowa!
31 Jadi roh ma sidea marayak ho, marhulan-hulan, lanjar hundul ma bangsangkai i lobeimu, anjaha tangihonon ni sidea do hatamu, tapi seng dalankonon ni sidea ai; holong do isahapkon pamangan ni sidea, tapi bani untungni bei do sangkut uhur ni sidea.
32 Tongon, songon sipandoding sipamalas-malas uhur do ho bani sidea, silurlur sora ampa na pandei marhusapi, ai itangihon sidea do na hinatahonmu, tapi seng ihorjahon sidea ai.
33 Tapi anggo masa ma ai, tonggor ma, maningon saud do ai, jadi botohon ni sidea ma, na adong do nabi i tongah-tongah ni sidea.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA