Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 A’bicarai pole Batara ri nakke, Nakana,
2 "He tau, paui mae ri bansanu, angkanaya punna Kupabattu pa’bundukanga ri se’reang pa’rasangang, iaminne lakajariang: Anjo pandudu’na pa’rasanganga lanapilei ke’nanga battu ri tangnga-tangngana ke’nanga sitau pajaga.
3 Punna naciniki anjo pajagaya battu musua, lappasa’rai pammatei tanra bahaya, sollanna tutu kabusu’ taua.
4 Inai-nai allangngereki anjo tanra bahayaya, mingka tena najampangi, nampa battumo musua ambunoi, ia matei lanri salana tonji. Ebara’ angkana naparhatikangi anjo tanra bahayaya, tantu akkullei salama’.
5 (33:4)
6 Mingka punna accini’ nia’ battu musu anjo pajagaya nampa tena nappasa’ra tanra bahaya, nampa battu musua ambunoi anjo tau dorakaya, tanggong jawa’na kamateanna anjo taua laKutuntuki battu ri ia.
7 He tau, ikau Kuangkakko a’jari pajaga mae ri bansa Israel. Pabattui mae ri ke’nanga anne pasangKu:
8 Punna Kupau angkanaya nia’ se’re tau ja’dala’ lamate, mingka tena nupakaingaki sollanna napinra panggaukanna sa’genna salama’, lamatei salaku tau doraka ija. Mingka tanggong jawa’na kamateanna laKutuntuki battu ri kau.
9 Punna nupakaingaki anjo tau ja’dalaka nampa taeroka ammari a’gau’ ja’dala’, lamatei salaku tau doraka, mingka ikau kalennu lasalamakko."
10 Nakana Batara ri nakke, "He tau, pau poleangi mae ri bansa Israel anne kananna ke’nanga, ‘Ta’ronangi tallasa’na ikambe lanri nijallakkanna ri dosana siagang kaja’dallanna ikambe. Antekamma nakkulle ikambe attallasa’?’
11 Paui mae ri ke’nanga angkanaya lanri iNakke, Allata’ala mattallasaka, Batara Kaminang Tinggia, tena naKusannang punna mate tau ja’dalaka; kabalekanna Kukellai nabokoi ke’nanga dosa-dosana sollanna tuli attallasa’. He bansa Israel, ammari mako a’gau’ ja’dala’! Angngapa nuero’ mate?
12 Jari, he tau, paui mae ri tu Israel angkanaya punna nia’ tau baji’ anggaukangi dosaya, anjo kabajikanna rioloa takkulleai antulungi kalenna. Punna tau ja’dala’ ammari a’gau’ dosa, tena nalanihukkungi, siagang punna tau baji’ a’gau’ dosa tena nalanipasalamaki.
13 Nakulle kapang le’ba’Ma’ a’janji lampasalamaki anjo tau bajika, mingka appakkaramulami a’gau’ dosa siagang narannuangi angkanaya lanipasalamaki lanri anjo kabajikanna rioloa, sala pahangi. Tenamo nalaKuu’rangi kabajikang le’baka nagaukang siagang lamatemi lanri dosa-dosana.
14 Nakulle kapang le’ba’mi Kupakainga’ tau ja’dalaka angkanaya lamatei ke’nanga. Mingka punna ammari a’gau’ dosa, siagang appakkaramulami nagaukang apa bajika siagang annabaya, ebara’na napoterangngangi apa napappita’gallanga taua yareka barang le’baka nalukka’, kammayatompa naturuki hukkung-hukkung angngeranga mae ri katallassang, anjo taua tena nalamate.
15 (33:14)
16 Tena nalaKuu’rangi pole dosa-dosana le’baka nagaukang, siagang lattallasaki lanri nagaukangi apa annabaya siagang bajika.
17 Mingka anjo bansaya nakana angkanaya anjo tindakangKu tena naadele’! Padahala’ tindakanna ke’nanga tena naadele’.
18 Sikalipi pole Kupau, angkanaya punna nia’ tau baji’ appakkaramula anggaukangi ja’dalaka, lamatei lanri anjo kaja’dallanna.
19 Punna tau ja’dalaka ammari a’gau’ dosa, siagang appakkaramula anggaukangi apa bajika siagang annabaya, lattallasaki lanri anjo panggaukanna.
20 Mingka manna nakamma anjo nakana bansa Israel angkanaya anjo tindakangKu tena naadele’. Tojeng, laKuadeli ke’nanga situru’ massing panggaukanna."
21 Ri tanggala’ lima bulang sampulo, lalang taung makasampulo anrua ri wattu nipela’na ikambe, nia’ sitau akkulle ta’lappasa’ battu ri Yerusalem; battui angngerang kabara’ ri nakke angkanaya tu’guru’mi kota Yerusalem.
22 Ri bangngi tenana nabattu, kupisa’ringimi kakoasanNa Batara. Jari ri wattunna battu anjo taua mae ri nakke, akkullema’ a’bicara siagang tenamo nakupepe.
23 Nakana Batara ri nakke,
24 "He tau, anjo sikamma tau ammantanga ri rumbanna kota-kotaya ri butta Israel nakanai, ‘Abraham anggappai anne sikontu buttaya, padahala’ ia poro kale-kalennaji bawang. Ikatte anne jaiki’, jari anne buttaya ikatte pata.’"
25 Lanri kammana Nasuroa’ Batara Kaminang Tinggia ampabattui anne pasanNa mae ri ke’nanga angkana, "Angnganreko dageng niaka ija cera’na; nusombai barhalaya siagang nugaukangi ammunoa. Barani tojengko angngani anne buttaya angkana ikau pata.
26 Nupattoangi pa’dannu. Panggaukannu appakaringi’-ringiki. Kabusu’nu anggaukangi a’gau’ bawanga. Maka barani ijako angngani angkana anne buttaya ikau pata?
27 Lanri iNakke, Allata’ala mattallasaka, Batara Kaminang Tinggia, sikamma anjo tau ammantanga anjoreng ri rumbangnganga ri kotaya lamate nibunoi. Ia ke’nanga ammantanga ri paranga lanikanrei ri olo’-olo’ sekke’. Ia accokkoa ri bulu’-buluka siagang ri sikamma leanga lamate garringi.
28 Anjo pa’rasanganga laKupa’jari parang sino, siagang anjo kakoasanna nakalompoang pa’maika ke’nanga lalanynya’mi. Sikamma buluka ri Israel la’jari sinomi, sa’genna manna sitau tania’ barani angngoloi.
29 Ri wattunna Kuhukkung anjo bansaya lanri dosa-dosana ke’nanga, siagang Kupa’jari sino anjo pa’rasanganga, naassemmi ke’nanga angkanaya iNakke Batara."
30 Nakana Batara, "He tau, ikau nipare’ carita mako ri julu bansanu ri wattunna massing sigappa ke’nanga ri tembo’-tembo’ kotaya yareka ri dallekang pakke’bu’-pakke’bu’ ballaka. Nakana ke’nanga para ia, ‘Umba nipilangngeri apa pasanNa Batara anne alloa.’
31 Battui ke’nanga a’gapullung siagang salaku ummakKu ammempoi ke’nanga ampilangngeri kana-kanannu, mingka anjo apa nuparentakanga tena naturuki ke’nanga. Muncenna ke’nanga appasuluki kana-kana mangngai mingka atinna ke’nanga sangnging passawallanji nanawa-nawa.
32 Napare’ kammako pakelong kelong-kelong passingaiang bajika sa’ranna siagang cara’deka akkarena kacapi. Memang ke’nanga nalangngereki kana-kanannu, mingka tena naturuki.
33 Sikontu anjo apa nupaua lakajariang ngasengi, siagang punna narapiki wattunna, lanaassemmi ke’nanga angkanaya ikau na’bi ri tangnga-tangngana ke’nanga."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA