Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai pasapuluhsada-tahunkon, bani ari sada bulan tolu, roh ma hata ni Jahowa hu bangku, mangkatahon,
2 “Ale anak ni jolma, hatahon ma bani Parao, raja ni Masir, pakon hubani rayatni: Ise do usihan bam ibagas habanggalonmin?
3 Tonggor ma, ai ma hayu ares na i Libanon, pardangkah na jenges, parbulung na tabun, gijang tumang, punsuni das hu hombun.
4 Bah do na pabanggal ai, gijang do ai ibahen bah na marjullak-jullak hun tanoh, na mambahen marbaoran bah inggot iananni ai, anjaha binangani laho hubani sagala hayu na i talun.
5 Halani ai gijangan do ai marimbang sagala hayu na i talun, lambin banggalni dangkahni, anjaha lambin ganjangni ia rantingni, halani buei ni bah na pabanggalhonsi.
6 Sagala manuk-manuk na i awang-awang marasar do bani rantingni, anjaha i toruh ni dangkahni do manunas sagala binatang na i talun; bani linggomni marianan do bangsa-bangsa na banggal.
7 Jenges do ai halani habanggalonni, halani ganjang ni dangkahni, ai mangumparpar do urat na bani bah mabuei.
8 Hayu ares na i pohon ni Naibata, seng taratasisi ai, anjaha hayu tusam seng tardosdosi dangkahni; hayu harangan seng tarimbangsi jenges ni ranting-rantingni; seng dong hayu i pohon ni Naibata na usih hujai ibagas hajengeson.
9 Hubahen do ia jenges marhitei hinabuei ni dangkahni, anjaha haganup hayu na i Eden, na ibagas pohon ni Naibata simburu do bani.
10 Halani ai sonon do hata ni Tuhan Jahowa: Halani na marganjang ai ia, das punsuni hu hombun, anjaha gijang uhurni halani ganjangni ai,
11 halani ai ondoskonon-Ku ma ia hubagas tangan ni sada halak na gogoh i tongah-tongah ni bangsa-bangsa; bahenonni do hubani romban hubani hajahaton na hinorjahonni ai, usironni do ia.
12 Halak sileban, sibisangan humbani bangsa-bangsa do na manrobohsi lanjar itadingkon. Bani dolog-dolog ampa bani sagala habungan do mangkadabuh dangkahni, anjaha marponggolan ranting-rantingni, merap bani lombang-lombang ni tanoh in; misiran do sagala bangsa na i tanoh on hun toruh ni linggomni, itadingkon do ai.
13 Bani batangni na marumbak ai ma sogop sagala manuk-manuk na i awang-awang, anjaha bani dangkahni ai sagala binatang na i talun,
14 ase ulang adong be hayu na i topi bah, na mangenjeng halani ganjangni, anjaha na das punsuni hu hombun; anjaha ulang adong be hayu na minum bah das sonai gijangni; ai hubani hamatean do sidea iondoskon, hu nagori partoruh ai, usih songon jolma na legan, marayak jolma na dob susur hu lubang ai.
15 Sonon do hata ni Tuhan Jahowa: Bani ari parturun-Ni hu nagori toruh, hubahen do marhoru bah banggal ai, Huolat do bah bolonni, anjaha soh mabaor buei binangani; marpakeian pusok ni uhur do Libanon hubahen halani-Si, anjaha sagala hayu na i talun madotei iahap halani-Si.
16 Hitir do Hubahen sagala bangsa halani pardorob ni parrumbakni, sanggah husampakkon ia hu nagori toruh, hubani halak na dob tuad hu lubang ai; sagala hayu na i Eden, ai ma na pinilih ampa sijengesan i Libanon, sagala sionsop bah tarapoh do i nagori toruh.
17 Ai sidea pe turun do hu nagori toruh rap pakon sidea, mangayaki halak na dob tarbunuh halani podang, ai ma sidea, na marianan i toruh ni linggomni humbani bangsa-bangsa.
18 Ise do usihanmu ibagas hamuliaon ampa habanggalon humbani hayu na i Eden? Rap pakon hayu na i Eden do ho gijigkonon hu nagori toruh; maningon rap tibal do ho ampa halak na so marsunat, rap pakon halak na binunuh ni podang. Ai ma Parao ampa haganup rayatni, nini Tuhan Jahowa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA