Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri tanggala’ se’re bulang tallu, lalang taung makasampulo asse’re ri wattu nipela’na ikambe, Nakana Batara ri nakke,
2 "He tau, pabattui pasangKu anne mae ri karaeng Mesir siagang sikontu bansana: Tojeng, hebaki kalompoannu! Tena akkulle ampasangkammaiko!
3 Ikau rapangko poko’ camara Libanon gammaraka rassi tangke coppong leko’na na ga’ga. Poko’na lambusuki na lompo coppo’na narapiki rammanga.
4 Attimboi lanri gannaki ri je’ne’. Binanga irawa buttaya assarei kanre, nasirangi sikontu aka’na, na nabasai poko’-poko’ maraenga.
5 Lanri tale’baka kurang je’ne’na, coppongi timbona, lompoi na la’bu tangkenna. Battu ri sikontu poko’ kayu ri romang, iami kaminang tinggi nai’.
6 Sangka’ rupa jangang-jangang a’ru’mung ri tangkenna. Olo’-olo’ liaraka ammana’ irawa ri la’lanna. Sikontu bansa lompoa ri lino ammempo a’la’lang irawanganna.
7 Anjo pokoka ga’gai nicini’; lambusuki poko’na, la’bui tangkenna. Aka’na annarrusuki bella naung nagappai timbuseng je’neka ilalang ri buttaya.
8 Poko’-poko’ camara ri Eden, kokonNa Allata’ala takkulleai nipasangkamma siagang ia. Tena camara akkulle ambetai, tena poko’ kayu la’bu kamma tangkenna. Tojeng, ri kokonNa Allata’ala tena poko’ kayu sangkamma ia ga’gana.
9 INakkemi ampa’jari ga’gai siagang tangke-tangke la’bu na coppong. Sikontu poko’ kayua ri kokonNa Allata’ala assereati ngaseng mae ri ia.
10 Lanri kammana anjo, iNakke, Batara Kaminang Tinggia, Kupauangko apa lakajarianga mae ri anjo poko’ kayu anrapika coppo’na nai’ ri rammanga. Nasaba’ pila’ tinggi pila’ tampoi.
11 Jari laKutollaki siagang laKupassareangi mae ri pamarenta bansa maraeng, nanagaukang mae ri ia apa situruka siagang panggaukanna.
12 Anjo tantara bansa maraeng tenaya nangngasseng appamopporang lanata’bangi anjo poko’ka nampa nabalang parekang. Tangkenna anjo tepokamo tu’gu’-tu’guru’ ngasemmi ri sikontu buluka siagang ka’bunga ri anjo pa’rasanganga. Sikontu bansa niaka irawa kakoasanna la’lampa ngasengi ambokoi.
13 Jangang-janganga labattui na’dangka’ ri anjo poko’ anra’bayamo, siagang olo’-olo’ liaraka lanaonjo’-onjokangi tangke-tangkenna.
14 Kabusu’na anjo sikammaya kajariangi sollanna appakkaramula anne wattua, tenamo pole poko’ kayu lattimbo kamma anjo tinggina; tenamo coppo’ poko’ kayu lanrapi’ nai’ ri rammanga manna pole nanggappa je’ne’ allumpa-lumpa. Kabusu’na musti matei sangkamma rupatau biasaya, nampa asse’re siagang sikamma tau naungamo ri linona tau matea."
15 Kammami anne kananNa Batara Kaminang Tinggia, "Punna naung anjo poko’ kayua ri linona tau matea, laKusuroi je’ne’ rawa buttaya angngammei salaku pammatei kasusaang. LaKutahangi passolonna je’ne’ binangaya siagang laKujempangi sikamma pangka binangaya. Lanri matemi anjo poko’ kayua, lappabattuMa’ sassang mae ri sikamma Moncong Libanon siagang Kupa’jari kalumeng kabusuki poko’-poko’ kayua ri romanga.
16 Ri wattunna Kupanaung anjo pokoka ri linona tau matea, sa’ra tu’guru’na lanapannekkereki bansa-bansaya. Sikontu poko’-pokoka ri Eden siagang poko’-poko’ nipilea ri Libanon, ia anggappaya je’ne’ allumpa-lumpa, siagang naungamo ri lino kaminang rawaya lasannangi nyawana lanri tu’guru’na anjo poko’ kayua.
17 Lanarurungangi ke’nanga mange ri linona tau matea nampa asse’re siagang ke’nanga rioloangnganga tu’guru’. Nampa sikontu anjo le’baka ammempo irawanganna anjo poko’ kayua lanipasiaraki ri alla’na bansa-bansaya.
18 Anjo poko’ kayua a’jari pangngebarangi mae ri karaeng Mesir siagang bansana. Tena poko’ kayu ri Eden kammaya anjo tinggina siagang la’biri’na. Mingka kamma-kamma anne, sangkamma todong poko’-poko’ kayu ri Eden anjo poko’ kayua lanaung tongi ri linona tau matea nampa asse’re siagang ke’nanga tenaya natappa’ ri Allata’ala, siagang sikamma tau matea lalang pa’bundukang. INakke, Batara Kaminang Tinggia, anne akkana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA