Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 A’bicarami pole Batara Nakana,
2 "He tau, a’boto mako siagang pabattui mae ri bansa Mesir apa Kupaua, iNakke Batara Kaminang Tinggia, ri ke’nanga. Ammarrangko siagang appiraungko kamma anne: Aduh! A’reppese’mi allonNa Batara! Tasalloami Nangngalle tindakang. Anjo alloa sassangi na nia’ rammang, wattunna anggappa hukkungang bansa-bansaya.
3 (30:2)
4 Bala lompo lantujui Sudan. Ri Mesir lania’ pa’bundukang. Jai tau lamate; niellaki sikontu pa’rasanganga siagang lanipa’jari rumbangngang.
5 Lalang ri anjo pa’bundukanga lanibuno tommi sikamma tantara nisewaya battu ri Sudan, Lidia, Libia, Arab, Kub siagang ba’lalo battu ri bansa KalengKu."
6 Nakana Batara Kaminang Tinggia, "Battu ri Migdol bageang wara’ sa’genna mange ri Aswan bageang timboro’, sikontu naaganga sita’gala’ Mesir lamatei lalang pa’bundukang. Siagang anjo tantara Mesir tampoa laancuru’ taba sikali. INakke, Batara Kaminang Tinggia anne akkana.
7 Anjo pa’rasanganga la’jarimi sino sikali ri tangnga-tangngana pa’rasangang sino maraenga, siagang kota-kotana la’jarimi loro-loro.
8 Punna Kutunu Mesir siagang Kubuno kabusu’ naaganga sita’gala’, naassemmi ke’nanga angkanaya iNakkemi Batara.
9 Punna narapi’ anjo alloa, nampa ancuru’mo Mesir, laKukiringi sikamma suroKu siagang kappala’ jai untu’ ampata’bangkai tu Sudan tenaya bata-batana, sa’genna a’jari malla’mo ke’nanga. Tojeng, anjo allo kammaya lanarapiki wattunna labattu!"
10 Nakana Batara Kaminang Tinggia, "LaKupakei Karaeng Nebukadnezar battu ri Babel untu’ angngancuruki sikontu kakalumanynyangnganna Mesir.
11 Nebukadnezar siagang tantarana tenaya nangngasseng appamopporang labattui nampa naancuru’ anjo buttaya. Lanabunduki ke’nanga Mesir siagang pa’dang, siagang latassiaraki mayaka ri anjo pa’rasanganga.
12 LaKupa’jari kalotoroki Binanga Nil siagang Kupassareangi sikontu Mesir mae ri sikamma tau ja’dalaka. LaKusuroi bansa-bansa maraenga angngancuruki anjo sikontu pa’rasanganga. INakke, Batara, anne akkana."
13 Nakana Batara Kaminang Tinggia, "LaKuancuruki barhala-barhalaya siagang rewata-rewataya ri Memfis. Talaniakkamo pole karaeng ri Mesir. Sikontu pandudu’na laKupa’jari mallaki.
14 Sikontu Mesir bageang timboro’ laKupa’jari sino sikali siagang kota Soan ri bageang wara’ laKutunui. Tebe, anjo ibukotaya laKuhukkungi,
15 siagang laKuancuruki kakalumanynyangnganna. LaKupa’betteseki larroKu mae ri Pelusium, kota a’jaria pattahanganna Mesir,
16 siagang anjo kotaya lasanna’ sessana. Tojeng, laKutunui Mesir. Tembo’-tembo’na kota Tebe laruntungi, siagang anjo kotaya lanitujui ri a’ba.
17 Sikamma tau rungkana kota Heliopolis siagang Bubastis lamatei lalang pa’bundukang siagang sikamma tubai’-bainea lanitahangi.
18 Anjo wattua laKupakala’busammi kakoasanna karaeng Mesir, siagang Kuallei anjo kakoasang nakatampoang dudua; Tahpanhes lanitongkoki ri sassang siagang tubai’-bainena lanitahangi.
19 Kammami anjo batena laKuhukkung Mesir, nampa naassemmo ke’nanga angkanaya iNakke Batara."
20 Ri tanggala’ tuju bulang se’re, lalang taung makasampulona asse’re ri wattu nipela’na ikambe, Nakana Batara ri nakke,
21 "He tau, le’ba’mi Kutepo’ paling-palinna karaeng Mesir, siagang tena ansikkokangi anjo paling-palinna yareka angngurukangi sollanna baji’ ammotere’ siagang gassing ammotere’ anna’gala’ pa’dang.
22 INakke, Batara Kaminang Tinggia angkana: INakke anne musunna karaeng Mesir, siagang laKutepo’ rua-ruai paling-palinna, baji’ anjo bajika ija kammayatompa anjo tepokamo. Jari latu’guru’mi anjo pa’danga battu ri limanna.
23 LaKupasiaraki tu Mesir mange ri sikontu linoa.
24 Nampa laKukassakki paling-palinna karaeng Babel, siagang Kuboliki pa’dangKu ri limanna. Mingka paling-palinna karaeng Mesir laKutepoki sa’genna lakkunrareng na mate ri dallekanna karaeng Babel, musunna.
25 Tojeng, karaeng Mesir laKupa’jari lammai, nampa karaeng Babel laKupa’jari kassaki. Punna Kupassareang pa’dangKu ri ia, nampa napatuju limanna mange ri Mesir, lanaassemmi ke’nanga angkanaya iNakke Batara.
26 LaKupasiaraki tu Mesir mange ri sikontu linoa. Na nassemmo ke’nanga angkanaya iNakke Batara."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA