Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jenari seh kata TUHAN man bangku,
2 "O manusia si ermasap-masap ernubuatlah kam janah momoken kai si Kukataken: Andiko, nggo reh wari cilaka,
3 nggo ndeher warina TUHAN nehken UkumenNa. Wari geltem, embun seh kapalna, eme wari kiniseran man bangsa-bangsa,
4 Kesusahen reh man Sudan. I Mesir pecah peperangen. Nterem i je kalak maten, negeri e irampasi janah ibahan jadi runtuhen.
5 I bas perang e melala mate tentera upahen i Sudan nari, Libia, Lidia, Arab, Kub, janah bangsangKu jine pe."
6 Nina TUHAN si Erdolat, "Mulai i Migdol nari i Utara terus ku Aswan i Selatan, kerina kalak si mpertahanken Mesir mate i bas peperangen. Tentera kemegahen Mesir ikernepken. Aku, TUHAN si Erdolat ngatakenca.
7 Negeri e jadi sada negeri si melungen kal i bas kerina negeri-negeri, janah kota-kotana keri kal runtuh.
8 Tupung Mesir Kuciluk janah kerina si mpertahankenca mate, jenari ietehna me maka Aku kap TUHAN.
9 Adi wari e nggo seh, janah Mesir nggo ikernepken, Kusuruh me persuruhen tare kapal nengget Sudan; la iarapna jadi si e man bana, emaka gentar ia kerina. Wari e nggo reh!"
10 Nina TUHAN si Erdolat, "Kupake Raja Nebukadnesar i Babilon nari lako engkeriken kebayaken Mesir.
11 Nebukadnesar ras tenterana si la meteh mekuah reh engkernepken negeri e. Iserangna Mesir alu pedang, janah amparen me mait i belang-belang negeri e.
12 Lau Nil Kukerahi janah Kutamaken Mesir i teruh kuasa kalak jahat. Bangsa si deban mahanca getem kerina negeri e." Bagenda nina TUHAN.
13 Nina ka TUHAN tole, "Kukernepken me gana-gana ras dibata-dibata palsu i Mempis. Lanai lit ise pe si ngerajai Mesir, janah gentar kerina bangsa e Kubahan.
14 Terulang Kubahan Mesir selatan, janah Kuciluk Kuta Soam i utara. Ibukotana, Tebe Kuukum,
15 janah kebayakenna Kukernepken. Kutelkasken nembeh ateKu man Pelusium, kota si jadi benteng negeri Mesir.
16 Kuciluk negeri Mesir maka mesui kal ate Pelusium. Runtuh me tembok kota Tebe, jenari banjir me kuta e.
17 Anak perana kuta Heliopolis ras Bubastis mate i bas perang e, janah kalak si debanna ibaba jadi tabanen.
18 Kenca kuasa Mesir Kuruntuhken janah gegeh si iagahkenna Kukeriken, gelap me Tahpanhes. Embun mekapal nutupi Mesir, janah kerina penduduk kota-kotana ibaba jadi tabanen.
19 Kenca bagenda pengukumKu Mesir, itehna maka Aku kap TUHAN."
20 I bas wari pitu, bulan si pemena, tahun si pesepuluh sadaken, sanga kami i pembuangen, seh kata TUHAN man bangku nina:
21 "O manusia si ermasap-masap, nggo Kupenggelken tan raja Mesir. La lit ise pe si malutisa, la lit ise pe si ngerempuisa tanna si penggel e gelah malem, maka megegeh mulihi ngawatken pedang.
22 Dage enda me katangKu, Aku TUHAN si Erdolat: Aku kap imbang raja Mesir. Kupenggelken tanna duana, subuk si langa penggel genduari, bage pe si nggo penggel, gelah ndabuh pedang e i bas tanna nari.
23 Kukerapken me kalak Mesir e ku belang-belang doni.
24 Kenca bage megegeh Kubahan tan raja Babilon, jenari Kutamaken pedangKu i bas tanna. Tapi Kupenggelken tan raja Mesir maka ia ndehereng dingen mate i lebe-lebe musuhna.
25 Tuhu, Kupekote me ia, janah Kupegegehi raja Babil. Kenca Kubereken bana pedangKu, janah iawatkenna kempak Mesir, kerina kalak metehsa maka Aku kap TUHAN.
26 Kukerapken kalak Mesir ku belang-belang doni. Kenca bage ietehna maka Aku kap TUHAN."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA