Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Allah adhabu, "He, manossa se ta’ langgeng, kakan ketab gulungan reya, samarena pas entar acaca ka reng-oreng Isra’il."
2 Sengko’ pas anganga, ban Allah laju marengngagi ketab gulungan jareya, epakon kakan ka sengko’.
3 Dhabuna, "He, manossa se ta’ langgeng! Esse’e tabu’na ba’na bi’ ketab gulungan reya." Ketab gulungan jareya bi’ sengko’ pas ekakan, rassana manes padha ban maddu.
4 Allah adhabu pole, "He, manossa se ta’ langgeng, kassa’ entar ka reng-oreng Isra’il, kabala Tang pessen jareya kabbi.
5 Sengko’ ngotos ba’na ka reng-oreng jareya, banne ka bangsa se basana malarat, ane, otabana se ba’na ta’ ngarte cacana. Saompamana ba’na bi’ Sengko’ eotos ka bangsa se kantha jareya, tanto reng-oreng jareya padha ngedhingngagi cacana ba’na.
6 (3:5)
7 Tape bangsa Isra’il ta’ endha’ ngedhingngagi ba’na, la’-mala’ Sengko’ dibi’ ta’ eparduli. Reng-oreng jareya cengkal ban dujan alaban.
8 Sateya bi’ Sengko’ ba’na epacengkala keya, epakantha’a reng-oreng jareya keya.
9 Bi’ Sengko’ ba’na epakokowa akantha bato karang, ban epagaliya akantha enten. Ba’na ta’ osa tako’ ka para pamberonta’ rowa."
10 Samarena jareya Allah adhabu, "He, manossa se ta’ langgeng, edhingngagi pagu-onggu ban kaenga’e sabarang se ekoca’agiya Sengko’ ka ba’na reya.
11 Kassa’ ba’na entar ka bangsana se badha e pambuwangan rowa, kabala ka reng-oreng jareya sabarang se ekoca’agi Sengko’, GUSTE Allah Se Mahatenggi, ka reng-oreng jareya, ta’ parduli reng-oreng jareya endha’ ngedhingngagi apa enja’."
12 Saellana jareya sengko’ pas eangka’ bi’ Erroh Allah, ban e tang budhiyan sengko’ ngedhing sowara agarudhu’ ngoca’ kantha reya, "Agungngagi kamolja’anna PANGERAN e sowarga!"
13 Sengko’ ngedhing monyena kalembangnga lok-mahlok gella’ se saleng sedding, ban monyena dha-rodha se thak-kalotthagan, ranyengnga akantha lendhu.
14 Kakobasa’anna PANGERAN dhateng ka sengko’ ce’ kowadda, ban e bakto sengko’ eangka’ ebakta Errohna, tang ate arassa pae’ ban panas.
15 Sengko’ pas napa’ ka kennengnganna reng-oreng buwangan e Tel-Abib e penggirra Songay Kebar. Pettong are abidda sengko’ enneng e jadhiya; sengko’ guk-magguk mekkere sabarang se buru ekaedhing ban etangale’e sengko’ jareya.
16 Saellana olle pettong are, PANGERAN adhabu ka sengko’,
17 "He, manossa se ta’ langgeng, bi’ Sengko’ ba’na eangkada epadaddiya panjagana bangsa Isra’il. Panapa’ ka reng-oreng jareya parengeddan dhari Sengko’ reya.
18 Mon Sengko’ abala ja’ oreng se jahat bakal mateya, tape ba’na ta’ maenga’ oreng jareya sopaja ngoba tengkana me’ olle salamet, oreng jareya bakal mateya menangka oreng se dusa, ban tanggung jawab parkara matena oreng jareya bakal egugada ka ba’na.
19 Mon ba’na maenga’ oreng jahat jareya, ban oreng jareya ta’ endha’ ambu se alako jahat, oreng jareya bakal mateya menangka oreng se dusa, tape ba’na dibi’ bakal salamedda.
20 Mon oreng becce’ molae agabay dusa, ban oreng jareya bi’ Sengko’ epangadhebbi babaja, oreng jareya bakal mateya mon bi’ ba’na ta’ epaenga’. Oreng jareya bakal mateya polana sa-dusana, ban kon-lalakonna se becce’ bi’ Sengko’ ta’ ekaenga’ana. Tape tanggung jawab parkara matena oreng jareya bi’ Sengko’ egugada ka ba’na.
21 Mon oreng becce’ jareya bi’ ba’na epaenga’ sopaja ta’ agabay dusa, ban oreng jareya atoro’ ka babala’anna ba’na, oreng jareya bi’ Sengko’ ta’ eokoma ban ba’na bakal salamedda."
22 Sengko’ ngarassa’agi kowadda kahadiranna PANGERAN, ban sengko’ ngedhing Salerana adhabu ka sengko’, "Mara jaga, pas entar ka cora. E dhissa’ Sengko’ acaca’a ka ba’na."
23 Daddi sengko’ pas entar ka Cora, ban e jadhiya sengko’ nangale’e tera’ se agalirap se noduwagi ja’ PANGERAN badha e jadhiya akantha se etangale’e sengko’ e penggirra Songay Kebar rowa. Sengko’ pas labu nyokem ka tana,
24 tape Errohna Allah maso’ ka dhalem sengko’, ban sengko’ pas epajaga bi’ Erroh jareya. PANGERAN adhabu ka sengko’, "Kassa’ mole, pas ja’ kalowaran dhari bengkona.
25 He, manossa se ta’ langgeng, ba’na etaleyana bi’ tale sampe’ ta’ bisa kalowaran ban ta’ bisa tatemmo ban oreng.
26 Jilana ba’na bi’ Sengko’ epagerra’a sampe’ ba’na ta’ bisa maenga’ bangsa pamberonta’ jareya.
27 Dhaggi’, mon Sengko’ la acaca ka ba’na pole, ban ba’na la epangenneng acaca pole, ba’na kodu manapa’ apa se ekoca’agi Sengko’, GUSTE Allah Se Mahatenggi, ka reng-oreng jareya. Sabagiyan dhari reng-oreng jareya bakal ngedhingngagiya, tape sabagiyan laenna enja’, sabab reng-oreng jareya pajat bangsa pamberonta’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA