Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nina Dibata, "O manusia si ermasap-masap, pan gulungen enda; kenca bage to ngeranalah kempak bangsa Israel."

² Emaka kungangaken babahku, jenari IberekenNa gulungen surat ndai, maka kupan.

³ Nina, "O anak manusia si ermasap-masap, panlah gulungen surat si Kubereken enda; isi beltekndu alu e." Kupan gulungen surat e, janah nanamna entebu bagi tengguli.

⁴ Kenca bage nina Dibata, "O manusia si ermasap-masap, to lawes ku bangsa Israel, jenari kataken man bana kai si Kusuruh kam ngatakenca.

⁵ La kap kam Kusuruh kempak bangsa si deban simesera akapndu ngantusi cakapna, tapi kempak kalak Israel jine nge.

⁶ Adi Kusuruh kam kempak bangsa-bangsa si mbelin si cakapna mesera dingen la iangkandu, tentu ibegikenna nge kam.

⁷ Tapi la lit sada pe kalak Israel si nggit megiken; Aku pe labo ia nggit megikenca. Kerina ia mekeng dingen nimbak.

⁸ Genduari Kubahan kam mekeng dingen mersik lako ngelawan bangsa e.

⁹ Kubahan kam paguh bagi lingling batu, piherna bagi batu intan. Dage ula kam mbiar ngenehen pemberontak e."

¹⁰ Tole nina Dibata, "O manusia si ermasap-masap, perdiatekenlah alu tutus kai si Kukataken man bandu, janah tetaplah inget.

¹¹ Kenca bage laweslah ndahi senina-seninandu si sada bangsa, si sangana i bas pembuangen, jenari turiken man bana kai si Kukataken man bana, Aku TUHAN si Erdolat, subuk iperdiatekenna kam tah lang."

¹² Kenca bage Kesah Dibata ngangkat aku, jenari kubegi arah pudingku sada sora ergeruhguh si megang nina, "Pujilah kemulian TUHAN i Surga i das!"

¹³ Kubegi sora kabang rubia-rubia ndai engkepak-kepak i awang-awang, bage pe sora roda-roda ndai si bali gangna ras linur.

¹⁴ Kuasa TUHAN reh ku aku alu megegeh, janah tupung KesahNa mabaken aku, ngilas kuakap janah merawa ateku.

¹⁵ Emaka seh aku i Tel Abib i tepi Lau Kebar, i ja kalak si ibuang e sangana ringan. Pitu wari dekahna aku i je, janah kidekah si e, jengang aku ngukuri kai si nggo kuidah ras si kubegi.

¹⁶ Kenca lepas si pitu wari e, ngerana TUHAN man bangku nina,

¹⁷ "O kam manusia si ermasap-masap Kubahan kam jadi si njaga i bas bangsa Israel. Kam nehkenca man bana kai persinget si Kubereken man bandu.

¹⁸ Adi Kukataken maka sekalak kalak jahat nandangi mate me, tapi la ipersingetindu gelah ia jera i bas dalanna nari maka ia terkelin, la banci lang mate me ia i bas dosana, janah Kuidoi kam kerna kematenna.

¹⁹ Tapi adi ipersingetindu kalak jahat, janah la ingadikenna erbahan dosa, la banci lang mate me ia i bas dosana, tapi kam terkelin.

²⁰ Adi lit sekalak bujur ibenakenna erbahan jahat, janah Kutamaken bahaya i lebe-lebena, emaka la banci lang mate ia adi la ipersingetindu. Mate ia erkiteken dosa-dosana la Kuinget kai si mehuli si nggo ilakokenna janah Kuidoi kam kerna kematenna.

²¹ Adi ipersingetindu kalak bujur gelah ula erdosa, jenari ibegikenna kam janah la ia erbahan dosa, emaka terus me ia nggeluh, janah kam pe terkelin ka."

²² Kugejap kuasa TUHAN erdahin i babongku, janah kubegi Ia ngerana nina, "Kekeken, laweslah ku baluren e. Ngerana ateKu man bandu i je."

²³ Emaka berkat aku ku baluren e, janah i je kuidah kemulian TUHAN bali ras si kuidah mbarenda i tepi Lau Kebar. Minter aku langkem i babo taneh,

²⁴ tapi Kesah Dibata mengketi aku, jenari IpetedisNa aku. Nina TUHAN man bangku, "Mulihlah ku rumah, janah erukilah bandu i rumah.

²⁵ O manusia si ermasap-masap, itambat me kam alu tinali, janah la kam banci ndarat ku tengah-tengah jelma si nterem.

²⁶ Kubahan maka leket dilahndu ku langit-langit babahndu, seh maka kam pekak, lanai ngasup ngerana mpersingeti bangsa pemberontak e.

²⁷ Emaka kenca Aku ngerana ka mulihi man bandu, janah Kubereken mulihi man bandu kuasa ngerana, i bas gelarKu, TUHAN si Erdolat arus ikatakenndu man bangsa e kai si Kukataken. Deba nggit megikenca, tapi deba la kam diatena pe, sabap bangsa pemberontak kap ia."

Yehezkiel

Video Yehezkiel 3

Ikuti Kami:

KONTAK | PARTISIPASI | DONASI