Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pasapuluh-tahunkon ari sapuluh dua, bulan sapuluh, roh ma hata ni Jahowa hu bangku, mangkatahon,
2 “Ale anak ni jolma, dompakkon ma bohimu dompak Parao, raja ni Masir, manjahai ma ho pasalsi ampa pasal ganup tanoh Masir,
3 hatahon ma: Sonon do hata ni Tuhan Jahowa: Imbang-Ku do ho, ale Parao, raja ni Masir, naga bolon ai, na gompang i tongah-tongah ni bah banggal ai, na mangkatahon, Ahu do simada Bah Nil, Ahu do sijadihon in!
4 Nahkonon-Ku do hait-hait hubagas osang-osangmu, anjaha bahenon-Ku do dengke na ibagas bahmin longkot bani sisikmu; jadi sintakon-Ku ma ho hu darat hun tongah-tongah ni bahmin rap pakon haganup dengke na ibagas bahmin, na longkot bani sisikmu.
5 Gijigkonon-Ku do ho hu halimisan, ho ampa haganup dengke na ibagas bahmin; timpal ma ho bani tanoh in, seng dong na mambuat atap na mananom. Bani binatang na i tanoh in ampa bani manuk-manuk na i awang-awang ai do Huberehon ho gabe sipanganon bani;
6 jadi botohon ni haganup pangisi ni Masir ma, Ahu do Jahowa. Halani tungkot tolong do ho bani ginompar ni Israel --
7 (anggo ipartungkot sidea ho, maponggol ho, hona tusuk do tangan ni sidea; anggo ipangunsandei sidea ho, maponggol do ho, gabe rebad-rebad do binongei ni sidea),
8 halani ai sonon do hata ni Tuhan Jahowa: Tonggor ma, parohon-Ku do podang mangimbang ho, anjaha raseihonon-Ku do jolma pakon pinahan hun tongah-tongahmu.
9 Gabe halimisan anjaha tarulang do tanoh Masir; jadi tandaon ni sidea ma, Ahu do Jahowa. Halani ihatahon ho: Ahu do simada Nil, anjaha ahu do sijadihon ai!
10 Halani ai, tonggor ma, imbang-Ku do ho, imbang-Ku do age bah banggalmu, anjaha bahenon-Ku do tanoh Masir gabe halimisan botul anjaha tarulang hun Migdol das hu Siene, das hu parbalogan Etiopia.
11 Seng dong be nahei ni jolma na montas hunjai, nahei ni pinahan pe seng dong na montas hunjai, seng be ianonkon ai ompat puluh tahun dokahni.
12 Anjaha bahenon-Ku do tanoh Masir gabe halimisan i tongah-tongah ni nagori, na dob gabe halimisan, anjaha huta ni sidea pe parsedaon do i tongah-tongah ni huta na dob pinarseda, ompat puluh tahun dokahni. Anjaha erapon-Ku do halak Masir i tongah-tongah ni bangsa-bangsa, anjaha mambur do sidea bahenon-Ku i tongah-tongah ni nagori-nagori.
13 Ai sonon do hata ni Tuhan Jahowa: Dob salpu siompat puluh tahun ai, patumpuon-Ku ma halak Masir humbani bangsa-bangsa hamerapan ni sidea ai.
14 Jadi pasuangon-Ku ma Masir, anjaha boanon-Ku do sidea mulak hu tanoh Patros, tanoh hasusuran ni sidea ai; gabe harajaon na etek ma sidea ijai.
15 Gabe sietekan do ai marimbang harajaon na legan, anjaha lang be pagijangonni dirini mangatasi bangsa-bangsa; paotikon-Ku do sidea, ase ulang be irajai bangsa na legan.
16 Anjaha seng marpangajaman bani be ginompar ni Israel; ai taringat ma sidea bani hasalahan ni sidea, anggo iparapat sidea dirini bani Masir. Jadi tandaon ni sidea ma, Ahu do Tuhan Jahowa.
17 Paduapuluhpitu-tahunkon, ari sada bulan sada, roh ma hata ni Jahowa hu bangku, mangkatahon,
18 “Ale anak ni jolma, isuruh si Nebukadnesar, raja ni Babel do balani marhorja koras manlawan Tirus; mapalpal do ganup ulu anjaha masapsap sagala abara, tapi age ia, age balani aha pe lang jumpahsi hun Tirus, bahen upah ni halojaonni manlawan huta ai;
19 Halani ai sonon do hata ni Tuhan Jahowa: Tonggor ma, ondoskonon-Ku do tanoh Masir hu tangan ni si Nebukadnesar, raja ni Babel; buatonni do arta-artani, rampason anjaha samunonni do ai, ai ma gabe upah bani balani.
20 Tanoh Masir do Hubere bani, gabe upah ni halojaonni, ai marguna Bangku do na hinorjahon ni sidea ai.
21 Bani panorang ai patubuhon ma sada tanduk bani ginompar ni Israel, anjaha ungkabon-Ku do pamanganmu i tongah-tongah ni sidea, ase ibotoh sidea, Ahu do Jahowa.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA