Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri tanggala’ sampulonrua bulang sampulo, lalang taung makasampulo ri wattu nipela’na ikambe, Nakana Batara ri nakke,
2 "He tau, callai karaeng Mesir. Pabattui mae ri ia angkanaya ia siagang sikontu ra’ya’ Mesir lanihukkungi."
3 Nasuroa’ Batara Kaminang Tinggia ampabattui mae ri karaeng Mesir anne pasanga, angkana, "INakke anne musunnu, he buaya lompo niaka attinro ri tangngana binangaya. Lompoi bawanu accarita angkanaya anjo Binanga Nil ikau pata siagang angkanaya ikau ampareki.
4 LaKupitabai pakkai’ cango-cangonu siagang laKupadakkiki sikamma jukuka ri sissi’nu. Nampa Kubesokko assulu’ battu ri Binanga Nil siagang sikontu anjo juku’ a’dakkika ri sissi’nu.
5 Nampa ikau siagang sikontu anjo jukuka Kupasambilako mange ri parang kassika. Latattappasaki kalennu naung ri buttaya siagang ammonrang mako anjoreng. Tena manna sitau lantarawangko. Tubunu laKupassareangi mae ri jangang-janganga siagang olo’-olo’ maraenga untu’ nakanre.
6 Jari naassemmi sikontu ra’ya’ Mesir angkanaya iNakkemi Batara." Nakana Batara, "He bansa Mesir! Narannuangi tu Israel bantuannu, mingka sanrapang jako bawang takkang lammaya.
7 Ri wattunna tanjeng ke’nanga ri kau, ikau tepo’ mako nampa nuto’do’ epana ke’nanga, sa’genna tassala ura’ salangganna ke’nanga.
8 Lanri kammana anjo, iNakke, Batara Kaminang Tinggia, Kukana ri kau angkanaya lappabattuA’ tantara untu’ ambundukiko siagang pa’dang, kammayatompa nabunoi pandudu’nu siagang olo’-olo’nu.
9 Mesir la’jari butta sino. Jari nuassemmi angkanaya iNakke Batara." Nakana Batara, "He karaeng Mesir! Lanri nukanana angkanaya anjo Binanga Nil ikau pata, siagang angkanaya ikau ampareki,
10 jari iNakkemi a’jari musunnu, siagang musunna anjo Nil binanganu. Sikontu Mesir laKupa’jari butta sino appakkaramula battu ri kota Migdol bageang wara’ sa’genna kota Aswan ri bageang timboro’, sa’genna pa’baeng-baenna Sudan.
11 Tena tau yareka olo’-olo’ angngoloi. Lalang patampulo taung tena tau lampammantangngi.
12 LaKupa’jari Mesir sino sikali, sa’genna ri sikontu pa’rasangang sino maraenga, Mesir kaminang sino. Lalang patampulo taung sallona kota-kotaya ri Mesir lattambungi a’jari loro, bella la’bi panra’na nakota-kota attambung maraenganga. Bansa Mesir laKupa’jari tau annompang ri pa’rasangang maraeng. Latassiaraki ke’nanga mange ri sikontu pa’rasangang maraeng siagang anjorengi ri tangnga-tangngana bansa maraenga ammantang."
13 Nakana Batara Kaminang Tinggia, "He bansa Mesir, punna le’baki anjo patampulo taunga sallona, laKuerangko ammotere’ battu ri sikamma pa’rasangang tampa’nu tassiara’.
14 LaKupakabajiki ammotere’ pattallassannu siagang Kusuroko ammantang ri Mesir bageang timboro’, iamintu pa’rasangang kabattuannu. Anjorengko lappaenteng kakaraengang lamma,
15 iamintu kaminang lammaya ri sikontu linoa. LaKupa’jariko sanna’ lammanu, sa’gennu takkullea ammarenta mae ri bansa-bansa maraeng, yareka ampattampoangi kalennu mae ri ke’nanga.
16 Israel tenamo nalappala’ bantuang mae ri kau. Anjo sarennu, he Mesir, lampakaingaki bansa Israel antekamma salana ke’nanga ampattoangi Mesir, sangkamma le’baka nagaukang ke’nanga. Jari naassemmi bansa Israel angkanaya iNakke Batara Kaminang Tinggia."
17 Ri tanggala’ se’re bulang se’re, lalang ri taung makaruampulona antuju ri wattu nipela’na ikambe, Nakana Batara ri nakke,
18 "He tau, Karaeng Nebukadnezar battu ri Babel nabunduki Tirus. Nasuroi sikamma tantaraya ammisang barang sanna’ battala’na, sa’genna a’gondolo’mo ulunna ke’nanga siagang a’bokka’mi salangganna; mingka baji’ karaenga kammayatompa tantarana tena nanggappa wassele’ apa-apa battu ri anjo kaposoanna.
19 Lanri kammana anjo, iNakke Batara Kaminang Tinggia Kukana: Butta Mesir laKupassareangi mae ri Karaeng Nebukadnezar. Lanaellaki siagang lanarampasaki kammayatompa lanaengkaki sikontu anjo kakalumanynyangnganna Mesir salaku sawala’na tantarana.
20 Butta Mesir Kupassareangi mae ri ia salaku pa’balasa’ mange ri jasa-jasana, lanri le’ba’mi tantarana anggaukangi tugasa’na untu’ iNakke. INakke, Batara Kaminang Tinggia, anne akkana.
21 Punna kajariang anjo passalaka, laKupa’jari Israel bansa kassa’, siagang akkulle mako ikau Yehezkiel, laluasa a’bicara, sa’genna sikontu taua akkulle mako napilangngeri. Jari naassemmi ke’nanga angkanaya iNakkemi Batara."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA