Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 (21-6) Dob ai roh ma hata ni Jahowa hu bangku, mangkatahon,
2 (21-7) “Ale anak ni jolma, dompakkon ma bohimu hu Jerusalem, marsahap ma ho pasal ianan na susi ai, manjahai ma ho pasal tanoh Israel,
3 (21-8) anjaha hatahon ma hubani tanoh Israel, sonon do hata ni Tuhan Jahowa: Tonggor ma, Ahu do imbangmu, sintakon-Ku do podang-Ku hun sarungni, anjaha raseihonon-Ku do hun tongah-tongahmu parpintor ampa parjahat.
4 (21-9) Halani sihol boiskonon-Ku do hun tongah-tongahmu parpintor ampa parjahat, halani ai do ase mandarat podang-Ku humbani sarungni, manlawan sagala jolma hun dangsina das hu utara,
5 (21-10) anjaha botohon ni sagala na mardaging ma, Ahu do Jahowa, na manintak podang-Ku humbani sarungni; seng sarungkonon-Ku be ai.
6 (21-11) Ale anak ni jolma, marhoih ma ho; gogoh ma ho marhoih, marhoru tumang i lobei ni sidea.
7 (21-12) Anjaha anggo isungkun sidea, ʻMase marhoih ho?ʼ hatahon ma, ʻHalani barita ai.ʼ Anggo roh ai, mandatei ma sagala uhur, dabuh sagala tangan, malitonduy sagala jolma anjaha galek sagala towod. Tonggor ma, roh anjaha masa ma ai,” nini Tuhan Jahowa.
8 (21-13) Dob ai roh ma hata ni Jahowa hu bangku, mangkatahon,
9 (21-14) “Ale anak ni jolma, manjahai anjaha marsahap ma ho! Sonon do hata ni Jahowa, ʻPodang, podang do iasah, ipungga ase marlinang,
10 (21-15) iasah laho manraseihon, ipungga ase marhilap itampulhon.ʼ Naha, marmalas ni uhur ma hita? Ale anak-Ku, mapas do uhurmu bani ganup pukul-pukul ampa bani ganup podah.
11 (21-16) Ibere do podang ai ipapunggahon, ase tarpakei ai; iasah do ai anjaha ipapunggahon, laho mamberehon ai bani tangan ni sipamunuh.
12 (21-17) Tangis anjaha mandoruhi ma, ale anak ni jolma, ai mangimbang bangsang-Ku do podang ai, mangimbang ganup kopala-kopala ni Israel, iondoskon do sidea bani podang rap pakon bangsang-Ku. Halani ai tompasi ma hae-haemu.
13 (21-18) Ai roh do pangujian, ai sonaha ma lang masa ai, halani mapas do uhurmu mangidah pukul-pukul,” nini Tuhan Jahowa.
14 (21-19) “Tapi ho ale anak ni jolma, anjaha martopap-topap ma ho! Roh ma podang dua hali lompit, tolu hali lompit tene, ai ma podang sipamunuh, podang bani pamunuhon bolon ai, ai do manginggoti sidea,
15 (21-20) ase malala pusu-pusu ni sidea, anjaha mardabuhan sidea bani sagala horbangan ni sidea. Ahu do na mambere podang na marhilap ai; ibahen do ai marlinang songon hilap, ipungga laho mamunuhi.
16 (21-21) Marot ma panrotapmu, hu siamun atap hu sambilou, dompak ja matamu itampulhon!
17 (21-22) Ahu pe martopap-topap tangan do, sihol do pasombuhon-Ku ringis-Ku, Ahu do Jahowa, na mansahapkon ai.”
18 (21-23) Dob ai roh ma hata ni Jahowa hu bangku, mangkatahon,
19 (21-24) “Ho ale anak ni jolma, gambarhon ma dua dalan harohan ni podang ni raja Babel, humbani sada nagori do harohan ni ai haduasi. Bahen ma sipatuduh dalan, pajongjong ma ai bani bona ni dalan na manuju dompak sada huta.
20 (21-25) Gambar ma sada dalan bani podang na laho hu Rabba, huta ni halak Amon, ampa na sada nari hu Juda, hu Jerusalem na pinatoguh ai.
21 (21-26) Bani sirpang ni dalan ai, bani bona ni dalan na dua ai do jongjong raja ni Babel mandalankon partondungon; ihursuk-hursuk do lingkit, isungkun terapim anjaha ipareksa pangidahan bani atei-atei ni dayok.
22 (21-27) Bani tangan siamunni do pangidahan na dompak Jerusalem ai, gabe ibuha ma pamanganni marsurak-surak, ipamaling sorani, laho padalankon parugas sirongrong horbangan, paulihon tembok sipangkubu, ampa pajongjong manara sipangkubu.
23 (21-28) Tapi partondungon na so sintong do ai bani sidea, halani dong do bani sidea parbulawanan na toguh nini uhurni. Tapi paingatonni do sidea pasal salah ni sidea, ase mangahap sidea.”
24 (21-29) Halani ai, sonon do hata ni Tuhan Jahowa, “Halani na dob mardingat hanima bani hajahatonnima, marhitei na dob pinatalar sagala panlanggaronnima, gabe talar dousanima bani sagala pambahenannima, tongon, halani na dob mardingat ai hanima, sai mangahap ma hanima.
25 (21-30) Ia ho, ale kopala ni Israel, na mabutak anjaha na jahat, na dob jumpah arini, ai ma panorang hagogok ni uhum bam,
26 (21-31) sonon do hata ni Tuhan Jahowa, ʻPadaoh ma gotong in, tanggali sortali in! Seng totap be songon na sain dokah; sipatoruhon do na gijang, anjaha sipagijangon do na toruh.
27 (21-32) Mareong, mareong, mareong do bahenon-Ku in; seng dong be age bokas-bokasni, paima roh ia siparhak ai; hubani do ondoskonon-Ku ai.ʼ
28 (21-33) Tapi ho, ale anak ni jolma, manjahai ma ho anjaha hatahon ma, sonon do hata ni Tuhan Jahowa pasal Amon ampa pasal pangapasi ni sidea, anjaha hatahon ma, ʻPodang, podang do isintak laho manripaskon; ipungga do ai ase marlinang anjaha marhilap,
29 (21-34) ai ma sanggah marpanonggoran na lepak sidea pasal ho anjaha martondung sipaoto-oto sidea dompak ho, laho mannahkon podang ai bani borgok ni parjahat na mabutak ai, na dob jumpah arini, ai ma panorang hagogok ni uhum bani.
30 (21-35) Sarungkon ma podangmu ale Amon! Bani ianan parjadimu, bani tanoh hatubuhanmu, ijai do uhumon-Ku ho.
31 (21-36) Duruskonon-Ku do ringis-Ku bam, anjaha sompulhonon-Ku apuy ni gilang-Ku bam; ondoskonon-Ku do ho hu tangan ni halak na mabajan, sihorjahon hasedaon.
32 (21-37) Gabe sipanganon ni apuy ma hanima, durus ma darohnima i nagori in; seng be sidingat-dingaton hanima, tongon, Ahu do Jahowa, na manluarhon in.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA