Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani tahun papituhon, bani bulan lima, ari sapuluh, roh ma deba humbani pangintuai-pangintuai ni Israel laho manungkun Jahowa, lanjar hundul ma sidea i lobeihu.
2 Jadi roh ma hata ni Jahowa hu bangku, mangkatahon,
3 “Ale anak ni jolma, marsahap ma ho dompak pangintuai-pangintuai ni Israel, hatahon ma bani sidea, sonon do hata ni Tuhan Jahowa, ʻLaho manungkun Ahu do hanima na roh on? Songon sintongni manggoluh Ahu,ʼ nini Tuhan Jahowa, ʻseng ra Ahu sungkunonnima.ʼ
4 Sihol uhumonmu sidea, ale anak ni jolma, sihol uhumonmu? Anggo sonai pabotohkon ma bani sidea hasamboron na hinorjahon ni ompung ni sidea.
5 Hatahon ma bani sidea, sonon do hata ni Tuhan Jahowa, ʻBani panorang, sanggah Hupilih Israel, marbija do Ahu marhitei tangan na tarangkat hubani ginompar ni si Jakob, Hupatalar do diring-Ku bani sidea i tanoh Masir, marbija do Ahu bani sidea, ning-Ku, Ahu do Jahowa, Naibatanima.
6 Bani panorang ai Hubijahon do bani sidea, paboa paluaron-Ku do sidea hun tanoh Masir hu tanoh na dob Hupilih bani sidea, tanoh habaoran ni dadih ampa manisan, tanoh sijengesan humbani sagala nagori.
7 Anjaha Huhatahon do bani sidea, ganup ma hanima mangambukkon gana-gananima, na manarik panonggornima, anjaha ulang ipabutak hanima dirinima marhitei sisombah-sombahon ni Masir, ai Ahu do Jahowa, Naibatanima.ʼ
8 Tapi manlawan do sidea dompak Ahu, seng ra manangihon Ahu; seng dong na ra mangambukkon gana-gana sitarik panonggor ni sidea ai, anjaha seng itadingkon sisombah-sombahon ni Masir. Jadi isura uhur-Hu ma manguseihon ringis-Ku bani sidea, anjaha padalankon gilang-Ku bani sidea i tongah-tongah ni tanoh Masir.
9 Tapi seng Hupasaud ai halani goran-Ku, ase ulang butak ai ididah bangsa-bangsa panginsolatan ni sidea ai, ai domma Hupatalar diring-Ku bani sidea ididah parbegu, marhitei na mambagahkon paluaron-Ku sidea hun tanoh Masir.
10 Jadi Hubobahon ma sidea mandarat hun tanoh Masir, anjaha Huboan ma sidea hu halimisan.
11 Hubere ma bani sidea titah-Ku, anjaha Hupabotohkon aturan-Ku bani sidea, sidalankonon ni jolma, ase manggoluh ia.
12 Hubere homa ma bani sidea ari Sabat-Ku, gabe tanda hun Bangku bani sidea, ase ibotoh sidea, paboa Ahu do Jahowa sipapansing sidea.
13 Tapi manlawan do dompak Ahu ginompar ni Israel i halimisan; seng marparlahou sidea domu hubani titah-Ku, anjaha itulak do aturan-Ku, sidalankonon ni jolma bahen hagoluhanni, ibutaki sidea do Sabat-Ku. Jadi isura uhur-Hu ma manguseihon ringis-Ku bani sidea i halimisan, laho mambahen bois tumang sidea.
14 Tapi seng Hupasaud ai halani goran-Ku, ase ulang mahiri ai i lobei ni bangsa parbegu, na mangidah Ahu mambobahon sidea mandarat.
15 Ambahni ai marbija do Ahu bani sidea i halimisan, paboa na so boanon-Ku be sidea bani tanoh na dob Huberehon bani sidea, ai ma tanoh habaoran ni dadih pakon manisan, tanoh sijengesan humbani sagala nagori,
16 halani ibuangkon sidea titah-Ku, seng idalankon paraturan-Ku, anjaha ipabutak do ari Sabat-Ku; tongon, sisombah-sombahon ni sidea do ipaihut-ihut uhur ni sidea.
17 Tapi maidop do matang-Ku mangidah sidea, gabe seng Huboiskon sidea, anjaha seng rasei sidea Hubahen i halimisan.
18 Jadi ningku ma dompak anak ni sidea i halimisan: Ulang ma marparlahou hanima domu hubani aturan na binahen ni bapanima, anjaha ulang ma paihut-ihut hanima titah-titah ni sidea, anjaha ulang ma butaki hanima dirinima marhitei gana-gana ni sidea.
19 Ahu do Jahowa, Naibatanima; domu hubani aturan-Ku ma hanima marparlahou, titah-Ku ma ramotkon anjaha dalankon hanima!
20 Ari Sabat-Kai, papansing hanima ma ai bahen tanda hun Bangku bannima, ase ibotoh hanima, Ahu do Jahowa, Naibatanima.
21 Tapi manlawan do dompak Ahu age anak ai; aturan-Ku seng iparlahouhon sidea, anjaha titah-Ku seng iramotkon sidea, laho mandalankon ai, sidalankonon ni jolma ase manggoluh ia; ibutaki sidea do Sabat-Ku. Jadi isura uhur-Hu ma manguseihon ringis-Ku dompak sidea anjaha padalankon gilang-Ku bani sidea i halimisan.
22 Tapi Hupasurut do tangan-Ku anjaha seng Hupasaud ai halani goran-Ku, ase ulang mahiri ai i lobei ni bangsa parbegu, na mangidah Ahu mambobahon sidea mandarat.
23 Ambahni ai marbija do Ahu bani sidea i halimisan, laho mangerap sidea hu tongah-tongah ni bangsa-bangsa, anjaha mambahen mambur sidea hu nagori-nagori ai,
24 halani seng idalankon sidea titah-Ku, ibuangkon aturan-Ku anjaha ipabutak do ari Sabat-Ku; tongon, sisombah-sombahon ni sidea do ipaihut-ihut sidea.
25 Halani ai Hubere do bani sidea aturan na so madear ampa titah na so boi manggoluh sidea marhitei ai,
26 anjaha Hubahen do sidea butak marhitei galangan ni sidea, marhitei na igalangkon sidea ibagas apuy sagala bunga-tubuh ni sidea; ase gok songgot-songgot sidea, anjaha ase ibotoh sidea, Ahu do Jahowa.
27 Halani ai, ho ale anak ni jolma, hatahon ma bani ginompar ni Israel, sahapkon ma bani sidea, sonon do hata ni Tuhan Jahowa, ʻInunut ompungnima ope pahiri Ahu, marhitei pangoseion ni sidea Bangku?ʼ
28 Ai dob das sidea Huboan hu tanoh na dob Hubijahon, laho mamberehon ai bani sidea, jadi ija ididah sidea buntu-buntu na gijang atap hayu na tabun, ijai do igalangkon sidea galangan ni sidea anjaha iondoskon galangan ni sidea sipuhoi ringis-Ku; ijai do inahkon sidea dahupa ni sidea na misbou, anjaha ijai do iduruskon sidea galangan siinumon ni sidea.
29 Jadi ningku ma bani sidea, ʻAi aha do buntu-buntu na pinarayaknima in?ʼ Halani ai do ase ibahen goran ni Bamah (ianan na gijang) ronsi sadari on.
30 Halani ai hatahon ma bani ginompar ni Israel, sonon do hata ni Tuhan Jahowa, ʻAi sihol pabutakonnima do dirinima marhitei pambahenan ni ompungnima, anjaha kahou hanima mangihutkon hagigi na hinorjahon ni sidea ai?ʼ
31 Anggo isombahkon hanima galangannima, anjaha igalangkon hanima anaknima ibagas apuy, ipabutak hanima do dirinima marhitei sagala gana-gananima ronsi sadari on. Jadi ra ma Ahu sungkunonnima, ale ginompar ni Israel? Songon sintongni manggoluh Ahu, nini Tuhan Jahowa. Seng ra Ahu sungkunonnima.
32 Anjaha sura-sura ni uhurnima pe, seng anjai saud ai, ai ma na sinurahonnima. Songon bangsa na legan ai ma hita, songon halak na i nagori-nagori na legan ai, na marsombah bani hayu pakon batu.
33 Songon sintongni manggoluh Ahu, nini Tuhan Jahowa, ʻAhu do Raja bannima marhitei tangan na gogoh, marhitei tangan na pinagostong ampa marhitei ringis na niuseihon.
34 Anjaha boanon-Ku do hanima mulak humbani bangsa-bangsa in, anjaha patumpuon-Ku do hanima humbani nagori hamerapannima marhitei tangan na gogoh, marhitei tangan na pinagostong ampa marhitei ringis na niuseihon.
35 Anjaha boanon-Ku do hanima hu halimisan ni bangsa-bangsa, anjaha ijai do padalan uhum Ahu bannima padumpar bohi.
36 Songon panguhuming-Ku ijia bani ompungnima sanggah i halimisan na i tanoh Masir, usih sonai do uhumon-Ku hanima,ʼ nini Tuhan Jahowa.
37 ʻPabontaskonon-Ku do hanima hun toruh ni simambu, anjaha bilangon-Ku do hanima tulimat.
38 Anjaha padaohon-Ku do hun tongah-tongahnima sipanlawan ampa halak siparbalik hun Bangku; padaraton-Ku do sidea hun tanoh panginsolatan ni sidea, tapi seng anjai masukan ni sidea tanoh Israel. Jadi botohonnima ma, Ahu do Jahowa.
39 Tapi hanima, ale ginompar ni Israel, sonon do hata ni Tuhan Jahowa, ʻLaho ma ganup hanima marsisombah gana-ganani bei, halani seng ra be hanima manangihon Ahu; tapi anggo goran-Ku Na Mapansing in, seng bulih be pabutakonnima marhitei galangannima ampa gana-gananima.
40 Ai i atas dolog-Ku Na Mapansing in, bani dolog ni Israel na gijang in,ʼ nini Tuhan Jahowa, ʻijai ma Ahu balosan ni haganup ginompar ni Israel, haganup sidea na i nagori in; ijai ma jaloon-Ku sidea, ijai ma tungguon-Ku humbennima galangannima ampa limbuahnima ampa haganup sibere-bere na pinapansingnima.ʼ
41 Jaloon-Ku ma hanima songon uap na misbou na hinarosuhkon, sanggah na Huboan hanima mandarat humbani bangsa-bangsa, anjaha Hupatumpu hanima hun nagori-nagori hamerapannima ai; anjaha patalaron-Ku do hapansingon-Ku i tongah-tongahnima ididah bangsa-bangsa.
42 Anjaha hatahononnima ma, Ahu do Jahowa, dob Huboan hanima hu tanoh Israel, tanoh na dob Hubijahon mamberehon ai bani ompungnima.
43 Ijai ma taringat hanima bani parlahounima ampa ganup pambahenannima na mambahen mabutak hanima; jadi magigi ma hanima bani dirinima halani haganup hajahaton na hinorjahonnima.
44 Anjaha botohonnima ma, Ahu do Jahowa, marhitei na Hubahen bannima halani goran-Ku, sedo romban hubani parlahounima na jahat in ampa pambahenannima na masambor in, ale ginompar ni Israel,” nini Tuhan Jahowa.
45 (21-1) Dob ai roh ma hata ni Jahowa hu bangku, mangkatahon,
46 (21-2) “Ale anak ni jolma, dompakkon ma bohimu hu dangsina, dilo-dilo ma ho dompak dangsina, anjaha manjahai ma ho dompak harangan na i tanoh dangsina.
47 (21-3) Hatahon ma bani harangan na i tanoh dangsina, tangar ma hata ni Jahowa, sonon do nini Tuhan Jahowa, tonggor ma, pagaraon-Ku do apuy ibagas ho, panganonni do bois sagala hayu na masak ibagas ho; seng tarintopi gajag ni apuy na marjimbur in, anjaha mosogkononni do sagala bohi hun dangsina das hu utara.
48 (21-4) Botohon ni sagala na mardaging ma: Ahu do Jahowa na pagarahon ai; seng intopkonon-Ku be ai.”
49 (21-5) Jadi ningku ma, “Ham Tuhan Jahowa, isahapkon sidea do pasal ahu: Ai lang marlimbaga do tong ia marsahap?”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA