Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ri tanggala’ sampulo bulang lima, lalang taung makatuju ri wattu nipela’na ikambe, nia’mo siapa are pamimpinna tu Israel battu mae ri nakke untu’ appala’ pangngunju’ battu ri Batara. Le’baki ammempo ri dallekangku,
2 kulangngere’mi Batara akkana ri nakke, angkana,
3 "He tau, a’bicarako siagang anjo sikamma pamimpinga siagang pauangi angkana iNakke, Batara Kaminang Tinggia, akkana kamma anne, ‘Barani sikaliko appala’ pangngunju’ mae ri Nakke! Lanri iNakke, Allata’ala mattallasaka, taeroKa’ nipappalakki pangngunju’ ri kau! INakke, Batara Kaminang Tinggia anne akkana.’
4 He tau, sadia mako untu’ angngadeli ke’nanga? Gaukammi! Pakaingaki ke’nanga sikontu kakodiang le’baka nagaukang boe-boena ke’nanga.
5 Pabattui anne apa Kupaua. Le’baki Kupile Israel siagang assumpa mae ri ke’nanga. Ri Mesir, Kupa’nyatai KalengKu mae ri ke’nanga na Kukana, ‘INakkemi Bataranu.’
6 Anjo wattua assumpA’ angkana laKuerangi ke’nanga assulu’ battu ri Mesir mange ri pa’rasangang Kupilea untu’ ke’nanga. Anjo pa’rasanganga kalumanynyangi siagang coppongi, butta kaminang bajika ri sikontu linoa.
7 Kusuroi ke’nanga ampelaki patung-patung appakaringika siagang nangaia anjo, siagang Kupisangkai ke’nanga anra’massi kalenna lanri anynyombana ri barhala-barhala battua ri Mesir, nasaba’ iNakkemi Batara ke’nanga.
8 Mingka angngewai ke’nanga ri Nakke siagang taerokai mappilangngeri ri Nakke. Taerokai ke’nanga ampelaki anjo patung-patung appakaringika kammayatompa taerokai ammari anynyomba ri barhala-barhalana Mesir. Ri wattunna anjorengija ke’nanga, sadiaMa’ ero’ ampabattui larrroKu mae ri ke’nanga.
9 Mingka tena naKugaukangi, sollanna tena nihinai arengKu ri bansa-bansa napammantangia ke’nanga. Nasaba’ ri dallekanna anjo bansa-bansaya le’ba’mi Kupa’la’bang Kupau angkanaya laKuerangi bansa Israel assulu’ battu ri Mesir.
10 Nampa Kuerang ke’nanga assulu’ battu ri Mesir a’lampa mange ri parang kassika.
11 Anjoreng Kusarei ke’nanga parenta-parentaKu siagang Kupangngajarrangi mae ri ke’nanga hukkung-hukkungKu mustia naturuki ke’nanga, nasaba’ inai-nai anturuki iami latuli attallasa’.
12 Kusuroi ke’nanga ampakalompoi allo Pammari-marianga salaku pammatei parjanjiangKu siagang ke’nanga, untu’ ampiu’rangiangi ke’nanga angkana iNakke Batara, le’baka ansa’laki ke’nanga a’jari ummakKu.
13 Mingka anjoreng ri parang kassika angngewa tongi ke’nanga mae ri Nakke. Nadakkai ke’nanga parenta-parentaKu, siagang natollaki hukkung-hukkung ampattantuai angkanaya inai anturuki latuli attallasaki. Sanna’ nara’massinna ke’nanga allo Pammari-marianga. Lanri kammana anjo, anjoreng ri parang kassika sadiaMa’ ero’ a’jallo’ lanri larroKu mae ri ke’nanga siagang ampanraki ke’nanga.
14 Mingka tena naKugaukangi anjo lanri areng bajikKu, sollanna tena nihinai arengKu ri bansa-bansa ancinikiA’ angngerangi bansa Israel assulu’ battu ri Mesir.
15 Anjoreng tomminjo ri parang kassika Kuancang bansa Israel angkanaya tena nalaKuerang ke’nanga antama’ ri butta le’baka Kupasadiangi ke’nanga, iamintu butta kalumanynyang siagang coppong, kammayatompa kaminang bajika ri sikontu linoa.
16 Kuancang kammai anjo ke’nanga lanri nabalang parekangi ke’nanga parenta-parentaKu, nadakkai hukkung-hukkungKu siagang nara’massi allo Pammari-marianga. Nangaiangngangi ke’nanga anynyombaya ri barhala-barhalana ke’nanga.
17 Mingka ribokoanganna mangngamaseangA’ mae ri ke’nanga, sa’genna tajaria Kubuno ke’nanga anjoreng ri parang kassika.
18 Kabalekanna sikamma tau rungka-rungkaya ri tangnga-tangngana ke’nanga, Kupakaingaki kamma anne, ‘Teako turuki paratorang-paratorang napareka boe-boenu. Teako palembai kabiasanna ke’nanga siagang tea tongko ra’massi kalennu lanri anynyombako ri barhala-barhalana ke’nanga.
19 INakkemi Karaeng Allata’alanu. Turuki hukkung-hukkungKu siagang parenta-parentaKu.
20 Pakalompoi allo Pammari-marianga sollanna a’jari pammatei mae ri kau siagang iNakke, untu’ ampiu’rangiangko angkanaya iNakkemi Karaeng Allata’alanu.’
21 Mingka anjo tau rungka-rungkaya tena todong namappilangngeri ri Nakke. Nadakkai ke’nanga hukkung-hukkungKu siagang nabalang parekangi parenta-parentaKu, ampattantuai angkana inai-nai tau anturuki latuli attallasaki. Nara’massi ke’nanga allo Pammari-marianga. Lanri kammana anjo sadiaMa’ ero’ ampabattui pangngalarroingKu mae ri ke’nanga anjoreng ri parang kassika siagang ambunoi ke’nanga.
22 Mingka tena naKugaukangi sollanna tena nanihinai arengKu ri bansa-bansa ancinikai ke’nanga bansa Israel Kuerang assulu’ battu ri Mesir.
23 Anjoreng tommA’ ri parang kassika assumpa angkanaya laKupasisa’la’-sa’laki ke’nanga mange ri sikontu linoa,
24 lanri nabalang parekanna ke’nanga parenta-parentaKu, nadakkai hukkung-hukkungKu, nara’massi allo Pammari-marianga, siagang tuli anynyombana ke’nanga ri rewata-rewata nasombaya boe-boena ke’nanga.
25 Nampa Kupassareang mae ri ke’nanga hukkung-hukkung tenaya nabaji’ siagang parenta-parenta tenaya nakkulle assare katallassang.
26 Kulappassangi ke’nanga anra’massi kalenna siagang koro’bang-koro’banna ke’nanga, ba’lalo ana’ bungasa’ bura’nena ke’nanga nakoro’bangkangi. Kammami anjo carana ke’nanga Kuhukkung sollanna naasseng ke’nanga angkanaya iNakkemi Batara.
27 Jari, he tau, pabattui mae ri tu Israel apa Kupaua, iNakke Batara Kaminang Tinggia, mae ri ke’nanga: Anne conto maraeng ampa’nassai antekamma batena boe-boenu anghiNa’ siagang tena namajarre’ mae ri Nakke.
28 Kuerangi ke’nanga mange ri butta le’baka Kupa’janjiang mae ri ke’nanga. Ri wattunna nacini’ ke’nanga bulu’-bulu’ tinggia siagang poko’-poko’ kayu copponga leko’na, assaremi ke’nanga koro’bang anjoreng ri sikamma anjo tampaka. NapakanassuA’ ke’nanga lanri assarena ke’nanga koro’bang-koro’bang nitunu siagang anggoro’.
29 Akkuta’nanga’ ri ke’nanga angkana, ‘Tampa’-tampa’ tinggi apa anjo nukunjungi?’ Jari appakkaramula anjo wattua naniaremmo anjo sikamma tampaka, ‘Tampa’-tampa’ tinggi’.
30 Jari pabattui mae ri tu Israel apa anne Kupaua, iNakke, Batara Kaminang Tinggia, mae ri ke’nanga. ‘Angngapa nanugaukang dosa-dosa kammaya le’baka nagaukang boe-boenu? Sangkamma ke’nanga, nupinawang tongi anjo barhala-barhala appakaringika.
31 Ba’lalo sa’genna anne alloa nura’massi kalennu lanri angngerannu passare siagang nutunui ana’-ana’nu salaku koro’bang mae ri barhala-barhalaya. Nampa barani ijako appala’ pangngunju’ battu ri Nakke? Lanri iNakke, Allata’ala mattallasaka, Batara Kaminang Tinggia, tena nalaKupa’biangko appala’ pangngunju’ battu ri Nakke.
32 Erokko ampasangkammai bansa-bansa maraenga siagang pandudu’na pa’rasangang-pa’rasangang maraenga anynyomba poko’ kayu siagang batu. Mingka anjo ero’nu tena nala’rupa.’"
33 "Lanri iNakke, Allata’ala Mattallasaka, Batara Kaminang Tinggia, Kupakaingakko angkanaya lanri larroKu, laKuparentako siagang terasa’ sa’genna nukasia’ kakoasangKu. LaKupa’rappungko siagang laKuerangko ammotere’ battu ri sikontu pa’rasangang tampa’nu nipasisa’la’-sa’la’.
34 (20:33)
35 Nampa laKuerangko mange ri ‘Parang Lompo Bansa-bansa’. Anjorengko laKuadeli ri dallekangKu,
36 sangkamma le’baka Kugaukang mae ri boe-boenu ri parang lompona Sinai. INakke, Batara Kaminang Tinggia, anne akkana.
37 LaKuterassiko sollanna nuturuki parjanjiangKu.
38 Sikamma tau nangaia angngewa siagang tau ja’dalaka laKupakabellai battu ri tangnga-tangnganu. LaKuerangi ke’nanga assulu’ battu ri tampa’-tampa’ napammantangngia kamma-kamma anne, siagang tenamo nalaKupa’biang ammotere’ ke’nanga mange ri butta Israel. Nampa nuassemmo angkana iNakke Batara."
39 Nakana Batara Kaminang Tinggia, "He tu Israel, kamma-kamma anne battu ri kau tommami. Patulusu’mi a’gau’ dosa anynyomba ri barhala-barhalanu! Mingka u’rangi angkanaya punna le’baki anjo musti mannurukiko ri Nakke siagang tenamo nanura’massi areng matangkasakKu lanri angngerannu passare mae ri anjo barhala-barhalanu.
40 Nasaba’ ri butta Israel, ri coppo’ bulukKu matangkasaka, ikau ngaseng, bansa Israel lanynyombako mae ri Nakke. Anjoreng lasannangi nyawaKu mae ri kau siagang erokKa’ antarimai koro’bang-koro’bannu, passare-passarenu kaminang bajika siagang passare-passare nusa’laka.
41 Punna le’bakko Kuerang assulu’ battu ri pa’rasangang-pa’rasangang tampa’nu nipasisa’la’-sa’la’, laKupasse’reko nampa Kutarima sikamma koro’bang nitununu. Nampa naassemmo sikontu bansaya angkanaya iNakke anne Allata’ala Kaminang Matangkasaka.
42 Punna Kuerangko ammotere’ mange ri butta Israel, butta Kupa’janjianga mae ri boe-boenu, nuassemmi angkanaya iNakke Batara.
43 Anjoreng lanuu’rangi sikontu panggaukang appakaringika, anra’massiai kalennu. La’ringi’-ringikko angngu’rangi anjo sikontu kaja’dallannu.
44 Punna le’ba’ mako Kupakamma anjo lanri kalompoanNa arengKu, na tena nasimbattala’ panggaukang kodinu kammayatompa panggaukang ja’dala’nu, nuassemmi ikau tu Israel angkanaya iNakke Batara. INakke Batara Kaminang Tinggia anne akkana."
45 Nakana Batara ri nakke,
46 "He tau, accinikko timboro’. Pakaingaki butta timboroka siagang callai romanga anjoreng.
47 Suroi anjo romanga ampilangngeri apa Kupaua, iNakke, Batara Kaminang Tinggia, mae ri ia, ‘Pilangngeri! LapparinrA’ pepe’ akkullea antunui sa’genna cappu’ sikamma poko’ kayu niaka ri kau, baji’ nakalotoroka kammayatompa mataya. Anjo pepe’ a’rinra-rinraya tena nakkulle nibuno. La’le’lereki battu timboro’ a’lampa wara’, na sikontu taua lanapisa’ringi bambanna.
48 Lanaassemmi ke’nanga angkanaya iNakke, Batara, amparinrai anjo pepeka, siagang tena manna sitau akkulle ambunoi.’"
49 Mingka iNakke, Yehezkiel, tena kusituju nakukana, "O Batara Kaminang Tinggia, teaKi’ suroia’ ampaui anjo kammaya! Sikontuna taua akkunrareng ngasemmi nasaba’ le’ba’ma’ a’bicara lalang pangngebarang, sa’genna sukkara’ nipahang."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA