Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai roh ma deba humbani pangintuai ni Israel marayak ahu, anjaha hundul ma sidea i lobeihu.
2 Jadi roh ma hata ni Jahowa hu bangku, mangkatahon,
3 “Ale anak ni jolma, ia dalahi-dalahi on, marpangajaman bani gana-gana do uhur ni sidea ibagas, anjaha na mambahen madabuh sidea hubagas hajahaton, dohor do ipajongjong sidea i lambungni; mintor ra ma Ahu panungkunan ni sidea?
4 Halani ai marsahap ma ho bani sidea anjaha hatahon ma bani sidea, sonon do hata ni Tuhan Jahowa, ʻBarang ise humbani ginompar ni Israel na marpangajaman bani gana-gana uhurni ibagas, anjaha ipajongjong i lambungni sibahen pardabuhan bani hubagas hajahaton, age pe sonai iparayak do nabi, jadi Ahu, Jahowa sandiri ma na marbalos bani, halani buei ni sisombah-sombahonni,
5 ase mangahap Hubahen uhur ni ginompar ni Israel ibagas, halani na marbalik ai sidea hun Bangku, halani gana-gana ni sidea na buei ai.ʼ
6 Halani ai hatahon ma bani ginompar ni Israel, sonon do hata ni Tuhan Jahowa, ʻPaubah hanima ma uhurnima, tundalhon hanima ma gana-gananima, anjaha padaoh hanima ma humbani haganup hasamboronnima.
7 Barang ise humbani ginompar ni Israel atap halak na legan, na manginsolat i tongah-tongah ni halak Israel, na paholangkon dirini hun Bangku, na marpangajaman uhurni ibagas bani gana-ganani, anjaha na pajongjong dohor i lambungni sibahen pardabuhan bani hubagas hajahaton, age pe sonai iparayak do nabi, laho manungkun haporluanni hun Bangku, jadi Ahu, Jahowa sandiri ma na marbalos bani.
8 Dompakkonon-Ku ma bohing-Ku mangimbang dalahi ai, bahenon-Ku ma ia gabe tanda ampa umpama, anjaha boiskonon-Ku ma ia hun tongah-tongah ni bangsang-Ku, jadi tandaonnima ma, Ahu do Jahowa.
9 Anjaha anggo taroto nabi ai, gabe marpodah ia, Ahu, Jahowa do na mambahen taroto ia, anjaha pagostongon-Ku ma tangan-Ku manlawansi, anjaha boiskonon-Ku ma ia hun tongah-tongah ni bangsang-Ku Israel.
10 Anjaha porsanon ni sidea ma uhum na bani sidea, dos do uhum bani nabi ai ampa uhum bani sipanungkun ai,
11 ase ulang be kahou ginompar ni Israel manlembang hun Bangku, anjaha ulang be ipabutak dirini marhitei ganup hajahaton ni sidea ai, tapi ase gabe bangsang-Ku ma sidea, anjaha Ahu gabe Naibata ni sidea,ʼ” nini Tuhan Jahowa.
12 Dob ai roh ma hata ni Jahowa hu bangku, mangkatahon,
13 “Ale anak ni jolma, anggo mardousa sada nagori dompak Ahu, marhitei na mangelukkon padan, gabe Hupagostong tangan-Ku manlawan nagori ai, anjaha Huparseda parbohalanni, Huparoh lohei, Huboiskon hunjai jolma age pinahan,
14 anjaha porini pe ijai sitolu halak on, ai ma si Noak, si Daniel pakon si Job, hosah ni sidea sandiri do hansa tarpaluah sidea marhitei hapintoron ni sidea,” nini Tuhan Jahowa.
15 “Ai anggo Huparoh binatang panoroh mawat-awat i nagori ai, gabe iboiskon pangisini, mambahen tarulang nagori ai, gabe seng dong halak na ra mamontas hunjai halani binatang ai,
16 anjaha porini ijai pe sitolu halak ai (songon sintongni Ahu manggoluh, nini Tuhan Jahowa), seng anjai tarpaluah sidea anak atap boru; tapi pitah sidea do maluah, tapi tarulang do anggo tanoh ai.
17 Atap anggo Huparoh podang hu nagori ai, anjaha ning-Ku, ʻPodang ma manraseihon i nagori in!ʼ Gabe ripas Hubahen hunjin jolma age pinahan,
18 anjaha porini pe ijai sitolu halak ai (songon sintongni manggoluh Ahu, nini Tuhan Jahowa), seng anjai tarpaluah sidea anak atap boru, pitah sidea do hansa maluah.
19 Atap anggo Hutongos sampar hu nagori ai, anjaha Huuseihon ringis-Ku hujai marhitei na manduruskon daroh, laho mamboiskon jolma age pinahan,
20 anjaha porini pe ijai si Noak, si Daniel ampa si Job (songon sintongni manggoluh Ahu, nini Jahowa), seng anjai tarpaluah sidea anak atap boru; hosah ni sidea sandiri do hansa tarpaluah sidea marhitei hapintoron ni sidea.”
21 Ai sonon do hata ni Tuhan Jahowa, “Age pe Husuruh hu Jerusalem uhum-Hu na ompat in, ai ma podang, lohei, binatang panoroh ampa sampar, laho mamboiskon hunjai jolma pakon pinahan.
22 tonggor ma, dong do na tading ijai, na maluah, na mamboan anak ampa boru mandarat. Sidea ai ma na roh bannima, idahonnima ma parlahou ampa pambahenan ni sidea, gabe tarapoh uhurnima, age pe Huparoh hamagouan hu Jerusalem ampa haganup na Hupasogop ai hujai.
23 Jadi tarapoh ma uhurnima halani sidea, anggo ididah hanima parlahou ampa pambahenan ni sidea. Jadi botohonnima ma, paboa sedo na so marhala haganup na Hubahen ai bani Jerusalem,” nini Tuhan Jahowa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA