Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nia’ siapa are jaina pamimping Israel battu mae ri nakke untu’ ampakkuta’nangngangi ero’Na Batara.
2 Na Nakanamo Batara ri nakke,
3 "He tau, sikamma anne taua napappirannuammi kalenna mae ri barhalaya sa’genna ta’loposo’mo ke’nanga antama ri dosaya. Masakang erokKa’ nikuta’nang ri ke’nanga?
4 Lanri kammana anjo, paui mae ri ke’nanga angkanaya iNakke, Batara Kaminang Tinggia appasang kamma anne, ‘Sikamma tu Israel ampappirannuangai kalenna mae ri barhalaya siagang naturukiangi kalenna ta’loposo’ antama’ ri dosaya, nampa battu untu’ appala’ pappitangara’ ri se’rea na’bi, KalengKu lappiali mae ri ke’nanga siagang piali siratannaya mae ri barhala-barhala kammaya anjo jaina!.
5 Sikontu anjo barhalaya napakabellai ummakKu battu ri Nakke, mingka dasi-dasi nalanri anjo pappialingKu nalammotere’ ummakKu mae ri Nakke.’
6 Pabattuang tongi tu Israel angkanaya iNakke, Batara Kaminang Tinggia, angkana ri ke’nanga, ‘Toba’ mako battu ri dosa-dosanu, siagang bokoimi anjo barhala-barhalanu appakalanrea.’
7 Sikamma tu Israel yareka bansa maraeng ammantanga ri alla’na bansa Israel, ampakabellayai kalenna battu ri Nakke siagang ampappirannuangai kalenna mae ri barhalaya, nampa appala’ pappitangara’ battu ri se’reang na’bi, KalengKu lampiali.
8 INakke langngewai ke’nanga siagang Kupa’jari contoi mae ri maraengannaya. LaKupakabellai ke’nanga battu ri ummakKu, jari naassemmi ummakKu angkanaya iNakke Batara.
9 Punna nia’ sitau na’bi nitipu sa’genna assare piali sala, iNakkemi antipui. INakke, Batara Kaminang Tinggia lampakabellai battu ri tu Israel.
10 Baji’ naanjo na’bia kammayatompa tau appalaka pappitangara’na langgappai hukkungang sangkamma.
11 Yangasenna anjo kammaya Kugaukangi sollanna tu Israel tenamo napakabellai pole kalenna battu ri Nakke siagang tenamo nara’massi pole kalenna lanri dosa. Lanri kammana anjo la’jarimi ke’nanga ummakKu na iNakke a’jari Allata’alana ke’nanga." INakke, Batara Kaminang Tinggia anne akkana.
12 Nakana Batara ri nakke, "He tau,
13 punna nia’ se’re pa’rasangang doraka siagang tena namajarre’ pa’mai’na mae ri Nakke, laKuhukkungi anjo pa’rasanganga. LaKuancuruki parsadiaang kanrena, lappabattuA’ bala kacipurang siagang laKubunoi baji’ rupataua kammayatompa olo’-oloka ri anjo pa’rasanganga.
14 Manna pole nania’ Nuh, Danel siagang Ayub ammantang anjoreng ri tampaka, anjo kabajikanna tau tallua poro nyawa kalenna tonji ke’nanga lasalama’. INakke, Batara Kaminang Tinggia anne akkana.
15 Nakulle kapang appabattuA’ olo’-olo’ sekke’ untu’ angkanrei pandudu’na anjo pa’rasanganga, sa’genna anjo daeraya a’jarimi daerana sannaka bahayana siagang tenamo manna sitau barani angngoloi.
16 Manna pole nania’ Nuh, Danel siagang Ayub ammantang anjoreng, mingka lanri iNakke, Allata’ala mattallasaka, Batara Kaminang Tinggia, anjo ke’nanga takkulleai napasalama’ manna pole inai ri ke’nanga, ba’lalo manna ana’ kalenna ke’nanga takkulle napasalama’. Poro kalenna bawang ke’nanga salama’, nampa anjo pa’rasanganga la’jari parang lompoi.
17 Nakulle kapang appabattuA’ pa’bundukang ri anjo pa’rasanganga, nakukiring sanjata-sanjata porea untu’ ampanraki baji’ rupataua kammayatompa olo’-oloka.
18 Siagang manna pole nia’ anjoreng ammantang anjo tau tallua, mingka lanri iNakke, Allata’ala mattallasaka, Batara Kaminang Tinggia, takkulleai ke’nanga ampasalamaki manna pole inai battu ri ke’nanga, ba’lalo manna ana’na ke’nanga takkulle napasalama’. Poro kalennaji bawang ke’nanga salama’.
19 Nakulle kapang appabattuA’ garring mae ri anjo pa’rasanganga, siagang Kupa’bettese’ larroKu mae ri ia, sa’genna baji’ tau kammayatompa olo’-oloka lamate ngasengi.
20 Siagang manna pole nania’ anjoreng ammantang Nuh, Danel siagang Ayub, mingka lanri iNakke, Allata’ala mattallasaka, Batara Kaminang Tinggia, takkulleai ke’nanga ampasalamaki manna pole inai battu ri ke’nanga, ba’lalo manna ana’ kalenna ke’nanga takkulle napasalama’. Poro kalennaji bawang ke’nanga salama’, lanri kabajikanna ke’nanga."
21 Nakana Batara Kaminang Tinggia, "LaKupabattui appaka hukkungang kaminang hebaka mae ri Yerusalem untu’ angngancuruki baji’ narupataua kammayatompa olo’-oloka. Anjo appaka hukkungang iamintu: bundu’, kacipurang, olo’-olo’ sekke’ siagang garring.
22 Ebara’ angkana nia’ ta’lappasa’ siagang napasalamaki ana’-ana’na, parhatikangi ke’nanga punna battui ke’nanga mae ri kau. Ciniki antekamma ja’dala’na ke’nanga, nanuassemmo angkanaya coco’ sikali tindakangKu anghukkungi Yerusalem.
23 Nampa nupahang tommo angkanaya anjo sikontu tindakangKu nia’ alasanna. INakke Batara Kaminang Tinggia anne akkana."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA