¹ Ki zep Alap zere mo gol mwa nakon ol mamkam gubiridaka: “Tujukam de Abon onakore jala bare panci hona insa em okama san dep hle-hle tasik irin.”
² Nonol zini ki zep hendep gwe halka, ki zep hendep panci ho zemka okama san hlei yulsuk inki. Dekam zep tingare zini men zen otweran dowal yala in mo nomora mirenak ma-makan dabik ekwae-kwae gwek, hen men zen yang tasin dowal zem insa betek ne gweblakke.
³ Zao de zini ki zep hen panci ho zemka hinak hlei yulsuk inki. Hina dekam zep kal kakak hap jowek– san de zi tok mo kala kiye. Dekam zep hinak de kirekam-kirekam otweranna kitak juwesik.
⁴ Zao de zini ki zep hen panci ho zemka weya-weya san hen ho-nwe ho-nwe san hlei-hli guludaka. Tingare weyana dekam zep kal hap ejowendak.
⁵ Ëe dekam zebe Alap mo dam taha nakore zisi ahanaka salblak– men zen tingare weyana irik gili dakake, zen kim gu aneka, “Hare eiwa, Alap Em in Zenke– enho dam-dam Zi niye. Em angkam gweꞌara hen orep mes gweka. Karekna ansa tak gulzim innira man tangan dakastilin.
⁶ Zen mes ere mo hlil irin wenyik mo kala hen ere mo olsa de ayang gul gwizimdin hip de zi mo kala hlei-hli nul gwek, zep angkam Em kalsa de otde gwibin hibe gubiridanda. Kirekam man tangan zebe mae hap dakastilzimnin.”
⁷ Ki zep hwena zi beyam-byana men mo ola Alap mo golak de te kil tru tasik gweblan meja iltikin nikon anakan wet sok, “Bian Alap Soson Tangan Zini, eno auhu-kama zisi de karek tabinni airis tangan, hen man tangan dakastilin!”
⁸ Hwena ki zep dan-ner dan-ner zini panci ho zemka yakla nwenak hlei yul guku. Yakla nwena dekam zep serkam tangan sal-sal gweka– zeno sal-sala in hap dikim zi sop nik etaiblin-taiblin gwen hap.
⁹ Dekam zep hendep zini yakla sal-sal hap sopna etaiblin-taiblin gwek. Zen dekam zep hen Alap mo bosena lamang nul gwek, sap Zen Zen karek-karekna insa lup gul sonezimki. Zen man ki sap karekna insa noltowe gwek, hwena hom kim zere mae mo karek-karek nakon ehale gweꞌak, hwena zen dekam hen bejen Alap mo bosena anakan teip gulsublun “Alap, Em eiwa teipsin tanganna.”
¹⁰ Hwena aha-ere taha-tap zini in ki zep panci ho zemka otweran dowala in mo irik gin e yalak hiri gul inki. Dekam zep tingare otweran dowala in mo irik ginni kawesik. Zeno irik gin zini dekam zep airin hip en sunu ejak-jak gwek,
¹¹ hen dekam zep etan ngatan zi mo langnak de Teipsin Zini Alapsa lamang da gweꞌak, sap kawesinni inkam zeno mae mo kwae-kwaena serkam esang-sang gwek. Hwena zen dekam hen hom tapbla nuk– zere mae mo kirekam-kirekam jal-jal gulin hala seran naye.
¹² Zao de zini ki zep hen panci ho zemka weya yawala Efrat mo ananak hlei yul guku. Weyana in dekam zep sasa gwek. Zen mae hap ki lwak: Eijannak dikim yakla hata sezan nakon teipsin-teipsin nik yaing gwezan hap.
¹³ Hwena dekam zebe dan-ahare dowal karekna hlauludak. Zeno mae mo nwe-masena san de blina kiye. Ahana jalom yala in mo ek mwa nakon wet so zaka, ahana hi mwa nakore otweran dowal yala in mo ek mwa nakon wet soka, hen ahana okama mwa nakore dowala in mo ek mwa nakon wet soka– in zen boton gwekake, “Ëe an Alap mo olsae ayang gul gwizimꞌin.”
¹⁴ Bli makare dowal-dowala in mae hap dena: Zen de owas-owassa syal gwe-gwibin hip. Zen sa tingare langnak de teipsin-teipsin zi nik dep tagal gulsundan hap sek gwenda gwer– dekam de Alap mo yakla yawalak Alap zere han zereijan hap.
¹⁵ Emki eenlala gwen Yesus mensa hamal hap anakan gu-gubirida gwekake, “Ëe sowe zi mo kim asa hatazal! Em in zen salok-salokkam asa kara e gweblaꞌan, em heꞌho gwibinnike lowehe gweꞌan. Hen kirekam– em in zen Asa de hut tu ane gun hup dawemkam kara e gweblaꞌan. Ere mae mo pakeanna dawem enkam kara la gwibik. Ki hwena mumuk ennak de Asa hut so gublunkam, ki irkan esa sahera ban ezaul.”
¹⁶ Bli makare dan-ahare dowala in dekam zep okamanak de teipsin-teipsin wenyaka eijan hap tagal nulsuk– lang bosena Ibrani olkam “Harmagedonk.”
¹⁷ Zao ki zep Alap mo dam taha nakore zini tujuna panci ho zemka okamanak de asesenak hlei-hli gulu daka. Dekam zebe etan Alap zere mo ola sak– ol mamkam kim gu aneka, “Ano jala angkam mes tap gwe henan.”
¹⁸ Dekam zep ngli angna zausun sremkam ang ta tineka, hen nglina serkam tangan tadre tineka, hen serkam de jingil yala dekam zep gweka. Nonol zi yang tasin nikon, hom mae kirekam de jingili gweka. Jingili in karek tangankam dena.
¹⁹ Ë yala Babel dekam zep hlang-hlang gwenkam hendep dan-ahan nek, hen okamanak de tingare langnak de e-ena kitak zep etimbwas gwek. Sap tingare e-enak de zini mes e yala Babelk de zi mo kim karekna nulin halasen gwek. Zeno mae mo karekna man tangan taman kinik, in zep Alap kirekam zere mo jala bare wiklom hona insa de otdebin hip golzimki.
²⁰ Jingili in hap zep tingare hinak de kama-tek kama-tekna langa san dep eese-sek gwek, hen tingare kwatapna hen man ejek-jak gweka.
²¹ Dekam zep es kwak yawal-yawala o makan il tika– zisi dikim karek tabin hip. Aha-ere kwakna zeno dohonna lima-pulu kilogram enkam. Zini dekam zep Alapsa lamang dak– insa es nabare ona serkam il tikake.