¹ Ki zebe hwena otweran dowal yala hla tak– hi mwa nakon kim hata seꞌan zaka. Zeno nola tuju enkam, hen nolak de hlina dare taha-tap enkam. Tingare zeno hli-hlina mire sigi en naban, hen zeno tingare mirena Alapsa de lamang tan ale en naban.
² Otweran dowala insa hla tak, san de tutul jal-jala kiye. Zeno tana bol ongkola blal-blala– san de beruang tana bol ongkola kiye. Utrum danna san de singa utrum danna kiye. Ki zep ze hwena jalom yala in soson zemka zebe hap golblaka– zen de zeno bose hap kitak teipsinkim irik gin hip.
³ Otweran dowala in mo aha nolak, san de tin hip de nebok wei yawala kiye. Hwena weina in mes at gwesik. Zen in zep tingare okamanak de zini desa ang ne gweblak, sap man denggwan gweblak.
⁴ Dekam zep jalom yala in hap boklena kom da gweblak– men zen zere mo irik ginni otweran dowala in hap golgublukaye. Hen otweranna in mo bosena anakan teip nulsuk gweblak, “Ahana hom tangan otweran dowala an han de apde enna. Desa toton nara dep? – zereijan naye.”
⁵ Alap man otweran yala in hap golblaka– dekam de zen 42 ben enkam irik gin hip. Alap Zena dekam nwe enkam ze kara ta gweka– kim dowala in zenaka boltere ta gweka, hen Alap Zenaka kim lamang ta gwekaye.
⁶ Zen dekam Alapsa serkam lamang ta gweka. Hen zeno gwe gwenna man lamang gul gweka. Hen tingan men zen ngatan zi mo langnak lowehe gwenan, desa hen man kitak laman ta gwibirki.
⁷ Otweran dowala in dekam zep Alap zere mo irik gin wenyaka goleeija gweka, hendep timbwas ta gwibirki. Hwena Alap dekam nwe enkam ze kara ta gweka. Zen zao nwe enkam ki kara ta gweka– kim kitak bi gwibirki, sap tingare zi ausuna, tingare irik gin langna, tingare ol ton gwibin wenya, hen tingare sop zi ausuna.
⁸ Tingare auhu-kamanak de zini sa otweranna insa betek ne gweblal. Diki ahakon men zeno mae mo bosem-sesa Domba Tanena in mo bukunak ale dabir-zimk, zen molya. Sap zeno mae mo bosem-sena orep mes hendep de engaya gwen hap de wenyik mo bosemse nabare bukunak ale dabir-zimk– auhu-kamana ansa de yang gulsun sremnak. Hwena dekam zep Domba Tanena in zeno mae mo kareksa de ngan gulsuzimdin hip tilki.
⁹ Zen in zep, eme i niban lowe heꞌanam, emki esane gwen!
¹⁰ Kristus hup de jal hap de emsa bwinak yal gulnen hap de wenya, emsa sa ki yal nulne gwer. Nebokkam de tameran hap de wenya, emsa hen nebokkam sa damera gwer. Zen in zep, Alap mo hlil irin wenya, em Yesussu de taibliblannak tatem ezauk.
¹¹ Ki zebe etan aha otweran dowala hla tak– okama mwa nakon kim wet soꞌan zaka. Zeno nola kore hlina dan-dan– san de domba mo nolak de hlina kiye. Hwena zeno zairinni, jalom yala in mo zairin niban apdenak.
¹² Hi mwa nakore dowala in zere mo soson yawala kitak zep bohe gulbluka– kama mwa nakon de wet son dowala in hap. Dekam zep zen zere mo nwenak okamanak de zini kitak tik-tik ta gwibirki– dekam de hi mwa nakore dowala in hap boklesa kom ta gweblan hap. Hi mwa nakore otweran dowala in, zen in men zeno nolak de nebok wei yala at gwesiblikke.
¹³ Okama mwa nakon de wet son dowala in, zen hen owas-owasna tingare zi mo nwenak mamkam syal gwe-gwibirki. Zen hen syauksu gubirki– ngli nakon de kamanak dep ati gwezan hap.
¹⁴ Sap zen owas-owasna insa hi mwa nakore dowala in mo bose hap syal gwe-gwibirki, dekam zep auhu-kamanak de zisi anakare ola ban yasik ta gwibirki, “An Zen tangan– neno mae mo Alap naye.” Zebe nikip de yaklana hom tap gweꞌanka, zep Alap nwe enkam kara soꞌanka. Okama mwa nakon de dowala in hen man yang tasin dowalsa de syal gweblan hap gubiridaka– nonol otweran dowala in mo nwe-masekam, dekam de nebok wei nakon de dawem gwen zini insa blikip gwesiblin hap.
¹⁵ Kim yang tasin dowala insa syal neisiblik, ki zep okama mwa nakore dowala in gubluka, “Em ensasa gwen.” Dekam zep hendep ensasa gweka, hendep ola tonꞌanka. Yang tasin dowala in dekam zep hen tameran hap gubiridaka– men zen zenaka de blikip gwesiblin hap baes taꞌakke. Dekam hen Alap nama nwe enkam kara tabiꞌinka– dan-ahare dowala in saye.
¹⁶ Kama mwa nakore dowala in hen tingare zisi tik-tik ta gwibirki– nomorsa de zere mae mo dam tahanak ahaksa mirenak makan tabir-zimdin hip. Zen tingare zisi tik-tik ta gwibirki– sap mamna, betekna, kire-kire beya wenya, hen tahalha wenya, sap zi mo tana iltikinnik lowehe gwen wenya, hen sap kirenak de lowehen srem wenya.
¹⁷ Dekam, nomorkam de ale tabiridan srem wenya, zen bejen kire-kiresa tokonak gon, hen ba maena bejen pasarak lirak gun. Nomor-nomora in, zen gulk sun de ol blaoran makan. Zeno dam gulsunnu, hi mwa nakon de wet son dowal yala in mo bose, ahaksa zeno bose hap de nomor.
¹⁸ Zen in zep, enlala blal wenya, zen en sa dowala in hap de nomora insa dam nulsuk gwer. Sap nomora in mo dam gulsunnu, zi mo bose. Nomora in, zen 666.