Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'enaka de 'o diwangoka 'o no-nako 'ihera-herangi moi gee 'o nyawa posironga yoherangioka. Ge'ena la mimoi 'o wange ma ako momasibajuku, 'ami dou 'o mede ma dekuoka. 'Ami saekoka 'o tuala 'o ngai moi ma ngoma 'o ngai mogiooko de modidioka.

² 'O ngeweka gumuna miroesoka, de ma 'orasiou momaku'arene so mosiri de momapoa-poaka.

³ Ge'enaka de 'o diwangoka 'okia naga moioli 'ihera-herangi, ge'ena la 'o naga yate-tereboko moi ko ma dingoonuwa, ma saeke ngai tumudiingoka de ma taduku ngai mogiookoka. Ma saeke 'isinoimi 'o tuala 'o ngai moi 'isinoaku.

⁴ 'O ngoma 'o diwangoka gee 'isoka 'ipula sa'angeka, 'o bula moi 'o naga yate-tereboko ge'ena ma bikini yositauru de ya'umo 'o duniaku. 'O naga ge'ena 'ima'okode 'o ngeweka gee momaku'arenou mi bionoka, ma dumutu la 'o ngowaka ge'ena kayauku 'ilahiri de ya'odomokau.

⁵ Ge'enaka de 'o ngeweka gumuna momaku'arene 'o ngowaka 'o nauru wimoi gee dua wapareta 'o nyawa 'o duniaka 'iodumu de 'awi kuasa ma amoko, ma ngale wakitorouoka gee wimusu-musu 'unaka. Ma 'o ngowaka ge'ena 'o naga koya'odomuwa sababu naga moi ya'oraka 'o ngewekaka gumuna, de ya'asa ma Jo'oungu ma Dutuka de 'awi pareta ma go-gogere ma bionika.

⁶ So 'o ngeweka gumuna moowara 'o tonaka 'ika-kakasaka, gee kiaka ma Jo'oungu ma Dutu wadua-duangou to muna mi ngii. Ge'enaka dau dua muna mipaliara 'o wange caana moi de 'o ratusu modidi de nagi butangano.

⁷ De 'o sorogaaka 'o parangi 'idadi. 'O Mikhael 'o mala'ekati ma balusu moi de to 'ena ma mala'ekati 'iku-kudai yaparangi 'o naga ge'ena. De ma naga ge'ena mita de to 'ena ma mala'ekati 'iku-kudai yaparangi 'o Mikhael.

⁸ Ma 'o naga ge'ena 'ikala, so 'ena de ma mala'ekati koidadiwau 'imanoa 'o sorogaaka.

⁹ 'O naga gee 'iamo-amoko ge'ena yosisupu 'o sorogaaka! 'Enau ge'ena 'o ngia gee ka ma sirasi de ma 'enau, gee ma ronga 'o Tokata ma Koana bolo 'o Ngomasa ma Dorou ma Balusu. 'Enau ge'ena 'isiliba-liba 'o nyawa 'iodumika 'o duniaka. 'Ena ya'umo 'o duniaku de to 'ena ma mala'ekati 'iodumu.

¹⁰ Ge'enaka de to'isene 'o 'ilingi 'iamo-amokie 'o sorogaaka kaingosekau, "Ma 'orasi ne'enau ma Jo'oungu ma Dutu 'awi kawasa wosilaha! Ma 'orasi ne'ena ma Jo'oungu ma Dutu 'awi kuasa wosidumutu ma ngale wokoana! Ma 'orasi ne'ena ma Koana 'o Nyawa Wosilaha-laha gee ma Jo'oungu ma Dutu wosijaji-jajiokau mita wosidumutu 'awi kuasa! Sababu 'o Tokata ma Koana gee 'ima'okode ma Jo'oungu ma Dutu wi bionoka koimaogo-ogoruwa 'ikalaki ma ngale yakikalaki nanga 'esa moi gee wile-leleani ma Jo'oungu ma Dutu, ge'ena yosisupuokau 'o sorogaaka.

¹¹ Nanga 'esa moi 'ona yosikalakau 'o Tokata ma Koana ge'ena, ma ngekomo 'una gee wisironga 'o Domba ma Ngowaka gu'una wosongene, de 'o habari 'iti-tiai ma Jo'oungu ma Dutuno gee 'ona yosiha-habari. 'Ona ngaro yakito'oma sigado yosongene ma kayomodeke.

¹² Sababu ge'ena, yoodumu gee 'o sorogaaka yomanoa-noa salingou yomorene! Ma niotorouoka ngini gee niomanoa-noa 'o duniaka, de 'o sagala moi-moi gee 'o ngootoka. Sababu 'o Tokata ma Koana 'i'utiokau nginiku de ma do'otasa 'irama-rama, ngano 'ena yanakokau 'ato ma 'orasi ka ma etakau ma ngale 'imanarama."

¹³ Gee 'o naga ge'ena 'imanako 'ato 'ena ge'ena ya'umokou 'o duniaku, de 'ena 'ikiniiki 'o ngewekaka gee mosingowakokau 'o ngowaka 'o nauru gu'una.

¹⁴ Ma 'o ngeweka gumuna mikula 'o kodoba ma gatuuku ngai modidi, la muna mososo 'ami ngiika 'o tonaka 'ika-kakasaka 'irii-riidoka, kiaka gee muna 'asa mipaliara 'o taunu sa'ange de ma songonano, la 'o naga gee miki-kiniiki ge'ena 'uwa mibodito.

¹⁵ So 'o naga ge'ena 'isiopuru 'o 'akere ma amoko matero ka 'o 'akere ma roese 'ingu'uisi, 'itaari 'o ngewekaka gumuna ma ngale miasini.

¹⁶ Ma 'o tonaka miriwo 'o ngeweka gumuna. 'O tonaka ma 'uru yapelenga de yaasiri 'o 'akere gee 'isupu-supu 'o naga ge'ena ma 'urusa.

¹⁷ 'O naga ge'ena posironga 'ingamoka 'o ngewekaka gumuna, sigado 'itagi yodingika 'o ngeweka gumuna 'ami ngowaka de midangonuku 'ireguoli, ge'ena la 'o nyawa 'iodumu gee yosingou-ngounu ma Jo'oungu ma Dutu 'awi pareta, de gee yositota-totara 'o habari ma ngale 'o Yesus de 'awi kuasa.

Wahyu

Video Wahyu 12

Ikuti Kami:

KONTAK | PARTISIPASI | DONASI