¹ Ki zep meter blala abe hap nolblak. Zeno blala san de dutena kiye. Ki zep Alap asa gubluka, “Em ano gol san song gwen hen ngirin tekson en naka metera inkam akasibli, hen zewe de kalsna. Hen zini men zen ano bosesa dekon teip gulsublun hap zewe lowe heꞌan emki aitbin.
² Hwena alp san de teksonna bahem akasibin. Sap desan dena mese Yahudi srem zi hip golzimk. Zen sa Yerusalemsa, e lalakna ansa, tanakam nyauk gweblal– holona benna 42 enkam.
³ Ëe asa zi daresa teisya soner. Zen kaen glaing-glingsi sa da koso gwera– dekam de goltreizimdin hip, ‘Ëe ama emsa gosa labirida gweꞌan.’ Zen Ëre mo olsa sa 42kam de benna inkam ayang ul gwizimdi.”
⁴ Zi darena in, gulk sun de olkam de guzimdinni, zen tenya zaitun dare, ahaksa lampu dare. Zi darena in Teipsin Tangan Zini Alap mo dang gwen nakon yauk gwenda.
⁵ Alap sa sosonna zi darena in hap golzimdi. Dekam zi mae de karek son hap alp gwizimdinni, dekam sa zeno nik mo ek tihi nakon syauknu wet noso gwizim. Zen dekam sa zere nik mo jal zini insa tru kulsuk gwera.
⁶ Zeno nik mo sosonna hen ki– o dikim il ti gwen srem hap dena. Zen diki zere nik mo abe en enkam de etan il ti gwen. Alap mes kirekam zebe nikip sosonna golzimki– holona in kim zere mo ola ayang ul gweꞌanka, dekam en dep. Hen zeno nik mo sosonna hen ki– tingare weyasa dikim kal hap li kul sone gwen hap denaye. Hen okamasa de banakare maekam heip ul gwen hap de zeno nik mo sosonna hen ki– beyana men kirekam zena dwam eibiꞌinkaye, kire enkam de heip gun hup.
⁷ Kim de Alap mo olsa de ayang ul gwenna 42kam de benna inkam su kul soneꞌanka, ki sa hwena otweran nwe-mase makare dowal yala juwen zi mo lang nakon wet so zala. Zen hendep dekam sa zieija zala, hendep sa zili.
⁸ Zeno nik mo tokna molya na-en nyehanuk, hwena isrip-sri hap sa ora bolak kamanak nyehal– e yala in zao zere nik mo Bianna te-lidak sonnak makan da inkke. Ëna in, zeno gulk sun de ol blaorankam de bosena “Sodom,” ahaksa “Mesir.”
⁹ Dekam tingare zini sa zeno nik mo tokna karatda noso gwer– yaklana dan-ahan, ahana ngirin ngam sonnak. Tingare zini, sap tingare zi ausu nakon, hen tingare irik gin lang nakon, hen tingare ol ton gwibin zi nikon, zen sa kama hulak de zehanun hap ejalse gwer.
¹⁰ Tingare auhu-kama zini sa tangan eisrip-sri gwer– zi darena in mo tok naka de akenkamye. Zen zep sa isrip-sri hap gol-gol san twen nasen gwer. Zen mae hap sa eisrip-sri gwe-gwer, “Ol ayang gul gwen zi darena men zen karekna beyakam nebe mae hap ol gwizimki, zen mes lilki.”
¹¹ Yaklana kim de dan-ahan neꞌak, ahana ngirin ngam sonnak, dekam sa ensasana etan ngaya en hap dena Alap onakon ing gwe hezim zira. Zen dekam sa etan ngaya era, hendep yaulu. Tingan men zen de kara nosoꞌak serkam tangan sa eairil.
¹² Dekam sa zi darena in ola asal sera– ngatan zi mo lang nakon de takenzim ane hanna, “Haen, em se kezan.” Zen dekam sa hendep zere nik mo jal zi mo nwenak but de teisya ine hankam se ke sera– ngatan zi mo lang san depye.
¹³ Zen hendep dekam sa jingil yawala karekkam gwera. Dekam sa e yala in eihya nakon timbwas gwera, hen zini tuju ribu enkam sa juwer– jingili in konye. Tingare ahakore zini dekam sa dawemkam eairil. Zen dekam sa nglinak de Zini Alap mo bosena teip nulsublul.
¹⁴ Dan-ahare karek tabin hip dena insa heiri kira tabirki, dan-dan mes tap nenan. Hwena emki ekara gwen, aumwa hap de karekna sa nabakam ang gwe kinzil.
¹⁵ Alap mo dam taha nakore zini tujuna, zen kim sramin zemka gubir aneka, dekam zep ngatan zi mo lang nakon ol mam-mamkam anakan etonꞌak, “Kitak okamasa de irik gin hip dena angkam Eirzi-Bia mo tahanak lwaꞌan. Bi zem mes Tane zikhip golblanda– mensa Israelsa de ngaya tabin hip dam tasikike, Zen de hendep denaban irik gin hip.”
¹⁶ Dekam zep 24kam de teipsin-teipsin wenya in zen Alap mo dang gwen nakon teinikin gwenan eik gwe hezak, hen Alap hap dawemna anakare ola ban nolblaꞌak,
¹⁷ “Bian Alap Soson Zini, Em in Zen orep gweka hendep angkam namae gweꞌara: Ëe ama ebe hap dawemsa olblaꞌan, sap Em angkam ere mo serkam de sosonkam ema irik ginkim kon gwesibir hanaꞌara.
¹⁸ Tingan men zen Emsa tame da srem gwek, zen man Emsa u sal-sal ne gweblak. Hwena angkam desa de karek tabin hip denak mes zaunun. Hen angkam mes zaunun– Em dikim juwen wenyaka klis gun hup denakye. Hen Em dikim dawemsa golzimdin hip de yaklanak mes zaunun– men zen ere mo ola ayang nul gwek, hen men zen Emsa betek ne gweblak, sap bose nabare wenya, hen sap bose srem wenya. Hen zisi dikim timbwas gun hup denak angkam mes zaunun– men zen okamana ansa karek nul gwekye.”
¹⁹ Dekam zep ngatan zi mo langnak de Alap mo gola dalusuhuk. Dekam zep hen gol mwana in kon petina teipsiꞌik– Alap mo zi niban de ol aha-en gun nubare petina, mensa Musa Bak hap goltreblakake. Dekam zep ngli angna zausun sremkam ayang-ayang gwe song gweka, hen nglina serkam tadre tineka, hen es kwa-kwakna dekam zep o makan il tika, hen jingil yala dekam zep mam enkam gweka.