Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Ikutkenlah alu tutus kerina undang-undang si kubereken sendah man bandu, gelah banci kam nggeluh, dingen ertambah-tambah beliganndu, janah ngiani negeri si ipadanken TUHAN man nini-ninindu.
2 Inget uga TUHAN Dibatandu mabai kam i bas perdalanen si nggedang mentasi gurun pasir empat puluh tahun dekahna; i je IberekenNa melala kiniseran guna nguji kam, gelah IetehNa ukurndu, ntah iuekenndu PerentahNa ntah lang.
3 IpelepasNa kam kelihen, emaka IberekenNa manna man panganndu, pangan si lenga pernah ipanndu tah ipan nini-ninindu. IlakokenNa e, guna ngajar kam, maka labo pangan ngenca si pegeluhken manusia, tapi manusia nggeluh erdankanken kasakai si ikataken TUHAN.
4 Kidekah empat puluh tahun e, uisndu pe la merigat ras nahendu pe la besar.
5 Ingetlah, maka TUHAN Dibatandu ngajarken ras ngukum kam bali ras sekalak bapa ngajarken anak-anakna.
6 Emaka nggeluhlah rikutken kai si nggo iperentahken TUHAN man bandu: nggeluh lah rikutken undang-UndangNa janah mbiar man BaNa.
7 TUHAN Dibatandu maba kam ku taneh si mehumur, i ja melala ulu lau, lau, ras sumbul si erburak launa i bas baluren ras uruk-uruk.
8 Taneh si mereken ulih gandum, jelai, buah anggur, buah ara, buah ndalima, saitun ras tengguli.
9 I jah la banci kam kelihen, la banci kam kurang kai pe. Batu-batuna isin biji besi, i bas uruk-urukna banci ibuatndu tembaga.
10 Idatndu kai atendu ipanndu. Erkiteken si e ngataken bujur me kam man TUHAN Dibatandu, kerna taneh si mehumur si IberekenNa man bandu."
11 "Jaga, maka ula ilupakenndu TUHAN Dibatandu. Ula silahken sada pe undang-UndangNa si kubereken man bandu wari enda.
12 Adi nggo idatndu kerina kai atendu si ipanndu, janah nggo ipajekkenndu rumah si mejile man inganndu,
13 bage pe nggo ertambah-tambah lembu ras biri-birindu, emas ras pirakndu ras kerina erta-ertandu si deban,
14 jaga maka ula meganjang ukurndu, jenari ilupakenndu TUHAN Dibatandu si nggo mulahi kam i Mesir nari sanga kam jadi budak mbarenda.
15 Ibabaina kam mentasi gurun pasir si mbelang si dem kebiaren i ja melala nipe si erbisa ras kacip gelang. I bas taneh kerah si la lit lau e, IbahanNa lau erburak i bas batu nari man bandu.
16 I bas gurun pasir e, IberekenNa manna man panganndu eme pangan si lenga pernah ipan nini-ninindu pe. IberekenNa kiniseran lako nguji kam, gelah dungna banci ipasu-PasuNa kam alu kai-kai si mehuli.
17 Erkiteken si e, ndigan pe ula kam rukur maka kinibayakenndu e, eme erkiteken kuasa ras gegehndu jine.
18 Ingetlah maka TUHAN Dibatandu nge si mereken gegeh man bandu erbahanca kam bayak. Si enda IbahanNa sabap seh wari enda Ia tetap setia nandangi perpadanen si IbahanNa man nini-ninindu.
19 Ula kam lupa man TUHAN Dibatandu. Ula kam nilah jenari ersembah janah jadi suruh-suruhen dibata-dibata si deban. Adi bage, kupersingeti kam genduari, maka pasti kam IkernepkenNa.
20 Adi la kam ngikutken TUHAN la banci lang IkernepkenNa kam, bali ras bangsa-bangsa si nandangi IkernepkenNa i lebe-lebendu."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA