Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Kenca bage ngerana Musa man bangsa Israel, "Ikutken Undang-undang si kuajarken enda, maka kam banci nggeluh ngingani negeri si ibereken TUHAN, Dibata nu nini-ninindu man bandu.

² Sitik pe ula tambahi, sitik pe ula kurangi kai si kuperentahken man bandu. Ikutken lah perentah-perentah TUHAN Dibatandu si nggo kubereken man bandu.

³ Nggo kap idahndu jine, kai si ibahan TUHAN Dibatandu i Deleng Peor. IkernepkenNa kerina kalak si nembah man Baal i jah,

⁴ tapi ise kam si setia man TUHAN Dibatandu, nggeluh denga seh genduari.

⁵ Nggo kuajarken man bandu kerina Undang-undang bagi si isuruh TUHAN Dibatangku man bangku. Ikutkenlah Undang-undang e i negeri si nandangi iperang ras iinganindu.

⁶ Tutuslah atendu ngikutken Undang-undang e, sabap e kap ncidahkenca man bangsa si deban uga pentarna kam. Kenca ibegina kerina Undang-undang enda, tentu nina, 'Seh kal pentarna ras beluhna bangsa si mbelin enda!'

⁷ Bangsa si deban, amin uga gia belinna bangsa e, la lit kerembakenna ras dibatana bagi kerembakenta ras TUHAN Dibatanta, tep-tep kali ia erlebuh man dibatana e. Isampatina kita sanga kita perlu penampat.

⁸ La lit bangsa si apai pe, amin uga gia belinna bangsa e, si lit undang-undangna si seri adilna bagi undang-undang si kuajarken man bandu wari enda.

⁹ Metengetlah! Tetapkenlah i bas ukurndu maka kidekah kam nggeluh la kam lupa kejadin si nggo idahndu alu matandu jine. Turikenlah man anak-anakndu, ras man kempu-kempundu

¹⁰ kerna wari tupung kam i adep-adepen TUHAN Dibatandu i Deleng Sinai, sanga TUHAN ngerana man bangku, 'Pepulung bangsa enda. Ibegikenna ateKu kai si Kukataken, gelah erlajar patuh ia nandangi Aku kidekah geluhna, gelah iajarina anakna pe mbiar man bangku.'

¹¹ Turiken man anak-anakndu, kuga kam reh deherna jenari tedis i teruh deleng si itutupi cimber si mbiring bagi embun mekapal, dingen api gurlah seh ku langit.

¹² Turiken man bana, uga TUHAN ngerana man bandu i bas api e nari, uga ibegindu Ia ngerana, tapi la idahndu Ia i bas bentuk kai pe.

¹³ Ikataken TUHAN man bandu uga arusna kam ncikep perpadanen, si nggo IbanNa ras kam, eme: arus ngikutken sepuluh Undang-undang, si IsuratkenNa i bas dua papan batu.

¹⁴ Isuruh TUHAN aku ngajari kam kerina kerna undang-undang si man ikutenndu i negeri si nandangi iperang ras iinganindu."

¹⁵ "Sanga TUHAN ngerana man bandu i bas api nari i Deleng Sinai, la idahndu bentuk kai pe. Emaka guna kiniulinndu jaga kal

¹⁶ maka ula kam erdosa alu erbahan gana-gana si man sembah-sembahenndu, subuk gana-gana e bagi tempas diberu ntah pe bagi tempas dilaki,

¹⁷ ntah rubia-rubia, ntah perik-perik,

¹⁸ ntah rubia-rubia si njoler ntah nurung.

¹⁹ Ula sempat turah sura-surandu nembah jadi suruh-suruhen dingen erjimpuh nandangi si idahndu i langit eme: matawari, bulan ras bintang-bintang. TUHAN Dibatandu nggo mereken si enda maka isembah bangsa-bangsa si deban.

²⁰ Tapi kam kap bangsa si nggo iselamatken TUHAN i Mesir i bas ginuhur si gurlah e nari. IbabaNa kam ndarat gelah kam jadi BangsaNa jine bagi si genduari enda.

²¹ Merawa kal TUHAN Dibatandu man bangku, erkiteken kam. Emaka ersumpah Ia, maka tuhu-tuhu kal la aku banci ngepari Lau Jordan, mengketi negeri si mehumur si IberekenNa man bandu e.

²² I jenda aku mate, emaka labo ndigan pe kukepari lau e. Tapi kam lanai ndekah ngepar ngingani taneh si mehumur e.

²³ Jaga, maka ula ilupakenndu perpadanen si ibahan TUHAN Dibatandu ras kam. Ikutkenlah PerentahNa, alu la erbahan gana-gana si ugapa pe man bandu,

²⁴ erkiteken TUHAN Dibatandu seri ras api si gara, percemburu tuhu-tuhu.

²⁵ Aminna pe nggo ndekah kam tading i negeri e, janah nggo lit anak-anakndu ras kempu-kempundu, ula kam erban dosa alu erbahan gana-gana si man sembahenndu i bas bentuk kai pe. Sabap jahat perbahanen si bage i bas pengidah TUHAN, janah nembeh kal AteNa.

²⁶ Kulebuh langit ras doni jadi saksi si ngelawan kam sendah, adi la kam patuh man bangKu, minter kam masap i bas taneh e nari. La kam ndekah nggeluh ngingani taneh i kepar Jordan si nandangi iinganindu. Keri kal kam pagi kernep.

²⁷ Ipemerap ras ipermarparken TUHAN kam ku negeri-negeri si deban, janah i je pagi piga-piga kalak ngenca kam selamat.

²⁸ I je isembahndu pagi dibata-dibata bahanen tan manusia, dibata-dibata si ibahan i bas kayu ras batu nari, dibata-dibata si la erpengidah ras la erpemegi, si la banci man ras la banci nganggeh.

²⁹ I jah me kam terdaram-daram man TUHAN Dibatandu. Adi bulat kal ukurndu ndaramisa emaka jumpa kam ras Ia.

³⁰ Sanga kam i bas kepiceten, janah kerina si e jadi man bandu, i je maka dungna mulihken kam kempak TUHAN, maka kam patuh man BaNa.

³¹ Ia kap Dibata si dem perkuah ate. Labo kam ItadingkenNa, labo kam IkernepkenNa. La Ia lupa perpadanen si IpadankenNa jine ras nini-ninindu.

³² Pepayo lah wari-wari si nggo lepas, paksa-paksa ope denga kam tubuh, seh ku paksa-paksa sanga Dibata njadiken jelma i doni enda. Nggo kin penah lit kejadin si bagenda belinna? Nggo kin penah lit ibegi kalak bagi si enda?

³³ Lit kin penah bangsa si deban nggeluh kenca ibegina dibata ngerana i bas api nari, bagi si nggo pernah ialamindu?

³⁴ Penah kin lit dibata si pang ndilo sada bangsa ndarat i bas bangsa si deban nari, jenari njadikenca jadi SikerajangenNa, bali ras perbahanen TUHAN Dibatandu man bandu i Mesir? IpergunakenNa kuasa ras GegehNa si mbelin i lebe-lebe matandu. IbanNa mara ras perang, IlakokenNa tanda kuasa si erban mamang-mamang ate ras IbahanNa kejadin-kejadin si erbahanca kalak mbiar.

³⁵ Icidahken TUHAN man bandu kejadin enda, guna nuduhken maka Ia ngenca Dibata, la lit si deban.

³⁶ IpedengkehkenNa SoraNa man bandu i langit nari, gelah banci kam IajarkenNa. IcidahkenNa ApiNa si mbelin man bandu i doni enda, janah ngerana Ia i jenari.

³⁷ Erkiteken keleng AteNa kempak nini-ninindu, IpilihNa kam. Ia jine, alu GegehNa si mbelin maba kam ndarat i Mesir nari.

³⁸ Sangana kam ngasak IpelawesNa bangsa-bangsa si belinen ras gegehen asang kam, gelah banci kam IbabaiNa bengket. Alu bage IberekenNa taneh kalak e man bandu, taneh si seh ngayak genduari enda kam empuna.

³⁹ Emaka sendah ingetlah, ndigan pe ula lupaken: TUHAN kap Dibata i surga ras i doni, la lit dibata si deban.

⁴⁰ Ikutkenlah kerina undang-UndangNa si nggo kuajarken wari enda, maka kam ras sinursurndu mejuah-juah janah tetap tading i bas taneh si ibereken TUHAN Dibatandu jadi sikerajangenndu seh asa lalap."

⁴¹ Kenca bage itentuken Musa telu kota arah Timur Jordan

⁴² man ingan kiam ras man ingan si aman, adi lit kalak munuh kalak si deban si gelgel nari labo musuhna, alu la sengaja. Banci ia kiam ku sada kota si telu enda ndai, gelah ula ia ibunuh.

⁴³ Man suku Ruben isikapken kota Beser, inganna i kendit-kendit gurun pasir; man suku Gat isikapken kota Ramot, i bas daerah Gileat; janah man suku Manase isikapken kota Golan, i bas daerah Basan.

⁴⁴ Ibereken Musa undang-undang ras pengajaren Dibata man bangsa Israel.

⁴⁵ Ibereken TUHAN undang-undang enda kenca bangsa Israel nggo ndarat i Mesir nari, sanga ia i berneh-berneh arah Timur Lau Jordan, pekepar ras kota Betpeor. Daerah enda nai daerah Raja Sihon bangsa Amori, si merentah i kota Hesbon. Musa ras bangsa Israel naluken Raja Sihon, sanga bangsa Israel ndarat i Mesir nari.

⁴⁶ (Ul 4:45)

⁴⁷ Irampasi kalak enda daerah enda ndai bage pe negeri Raja Og i Basan nari. Raja Og subuk raja bangsa Amori si tading arah Timur Lau Jordan.

⁴⁸ Daerah si ingani kalak enda mulai i kota Aroer i tepi Lau Arnon nari seh ku Deleng Sirion, eme Deleng Hermon.

⁴⁹ Bage pe kerina daerah si lit arah Timur Lau Jordan seh ku Lawit Mate i Selatan ras ku teruh Deleng Pisga i Timur, bengket ku bas daerah enda.

Ulangan

Video Ulangan 4

Ikuti Kami:

KONTAK | PARTISIPASI | DONASI