Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Kamma-kamma anne akkullei nupilei kalase’renna iamintu barakkaka yareka pattunraya, sangkamma le’baka kupakasingara’ mae ri kau. Punna le’ba’mi nukasia’ anjo sikontu passessaya siagang attallasakko ri alla’na bansa-bansa maraeng ri tampa’nu nipasisa’la’-sa’la’ ri Karaeng Allata’alanu, lanuu’rangimi apa kupassareanga ri kau untu’ nupilei.
2 Punna ta’giling mako ammotere’ siagang jari-jarinu mae ri Karaeng Allata’ala, siagang attojeng-tojeng mako ri pa’mai’nu mannuruki ri parenta-parentaNa kupassareanga mae ri kau anne alloa,
3 laNakamaseang mako Karaeng Allata’alanu. LaNaerangko ammotere’ battu ri bansa-bansa nupammantangngia nipasisa’la’-sa’la’, nampa nipa’jari salewangangko ammotere’ ri katallassannu.
4 Manna pole tassiarakko ri kere-keremae ri sikontu linoa, mingka laNapasse’reko siagang laNaerangko ammotere’ Karaeng Allata’alanu.
5 Lakkullei nupatang ammotere’ butta napammantangngia boe-boenu riolo. Siagang lanipa’jari la’bi salewangangko pole, kammayatompa pila’ jaiangngangi bilannu na boe-boenu riolo.
6 Ikau siagang jari-jarinu lanisareko nyawa sarroa mannuruki, sa’gennu mangngamaseang ri Karaeng Allata’alanu lalang sikontu pa’mai’nu siagang akkulleko tulusu’ ammantang ri anjo buttaya.
7 Sikontu anjo pattunraya lanipituju mangei ri musu-musunnu birisika ri kau siagang anjallakkangako.
8 Lamannurukiko mae ri Batara ammotere’ siagang lanupajappai sikontu parentaNa kupassareanga mae ri kau anne alloa.
9 Sikontu usahanu laNapa’jari ngasengi Karaeng Allata’alanu; la’jari jai ana’nu siagang olo’-olo’nu; alla’bi-la’bi wassele’na sikamma kokonnu. Sannangi nyawaNa Batara ampa’jari salewangangko, sangkamma todong sannanNa nyawaNa assarei salewangang boe-boenu.
10 Mingka musti mannurukiko mae ri Ia siagang mannuruki ri sikontu hukkunNa niaka tattulisi’ lalang ri anne kittaka, iamintu kitta’ HukkunNa Batara. Musti attojeng-tojengko ri pa’mai’nu ammotere’ mae ri Ia.
11 Tena nasukkara’ dudu parenta kupassareanga mae ri kau siagang teai apa takkulle nigaukang.
12 Tena narate ri langika ammantang. Tea’ mako akkuta’nangngi angkana, ‘Inai lanai’ anjoreng untu’ angngerangi naung mae ri katte, sollanna akkulle nipilangngeri siagang nituruki?’
13 Tena todong naba’leang tamparang ammantang. Tena nuparallu akkuta’nang angkana, ‘Inai la’limbang tamparang untu’ angngerangi mae ri katte sollanna akkulle nipilangngeri siagang nituruki?’
14 Teako akkuta’nang kammai, nasaba’ anjo parentaya niaki anrinni. Nuapele’mi siagang akkullemi nupau, jari poro lanugaukang mami.
15 Anne alloa akkullei nupilei kalase’renna: bajika yareka ja’dalaka, matea yareka attallasaka.
16 Anne alloa kuparentakangko sollanna nukamaseang Karaeng Allata’alanu, mappilangngeriko ri Ia, kammayatompa gaukangi sikontu hukkung-hukkunNa siagang parentaNa sollana baji’ pattallassannu siagang a’jariko bansa lompo. LaNabarakkakiko Karaeng Allata’alanu ri pa’rasangang tenayamo nasallo nanupammantangngi.
17 Mingka punna tena numannuruki siagang tena nuero’ mappilangngeri, kammayatompa nubalang parekang kalennu nipasala oloang untu’ anynyomba mae ri rewata-rewata maraenga,
18 mattantu lanipanrakiko. U’rangi! Kupauang mako anjo passalaka anne alloa. Tena nalala’bu umuru’nu ri pa’rasangang ba’leanna Binanga Yordan, tenayamo nasallo nanupammantangngi.
19 Kamma-kamma anne akkullei nupilei kalase’renna iamintu attallasaka yareka matea, barakka’ yareka pattunraNa Batara. Kukioki langika siagang buttaya untu’ a’jari sa’bi mae ri kaputusannu. Pileimi attallasaka.
20 Mangngamaseangko mae ri Karaeng Allata’alanu, mannurukiko mae ri Ia, siagang majarre’ pa’maikko mae ri Ia. Na ikau siagang jari-jarinu lattallasakko siagang lala’bui umuru’nu ri pa’rasangang Napa’janjianga Batara mae ri boe-boenu iamintu Abraham, Ishak siagang Yakub."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA