Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Enda me aturen perpadanen si ibahan TUHAN man bangsa Israel, sue ras si IperentahkenNa man Musa i negeri Moap. Kerina perpadanen e, jadi tambahen perpadanen si nggo ibahan TUHAN ras kalak e i das Deleng Sinai.

² Ipepulung Musa kerina bangsa Israel; kenca pulung ngerana ia, "Nggo idahndu jine kai si ibahan TUHAN man raja Mesir ras pegawe-pegawena, bage pe man kerina isi negerina.

³ Idahndu mara si mbelin, ras tanda-tanda kuasa si ibahan TUHAN.

⁴ Tapi seh ngayak genduari lenga IbereNa kam ngerti kai si nggo ialamindu e.

⁵ Empat puluh tahun dekahna TUHAN ngarak-ngarak kam mentasi gurun pasir, tapi uis ras selopndu pe la merigat.

⁶ La lit roti si man panganndu, la lit anggur ntah bir si man inemenndu, tapi TUHAN nikapkenca keperlunndu, guna ngajar kam gelah ietehndu maka ia nge Dibatandu.

⁷ Janah kenca kita nggo seh i bas ingan enda, Raja Sihon i Hesbon nari ras Raja Og i Basan nari reh ngelawan kita. Tapi talu sibahan ia.

⁸ Sibuat negerina, sibagiken e man suku Ruben ras Gat ras man setengah suku Manase.

⁹ Emaka ikutkenlah alu tutus kerina aturen perpadanen enda, maka kam rulih i bas ndahiken kerina si idahikenndu.

¹⁰ Sendah tedis kam kerina i adep-adepen TUHAN Dibatandu, subuk peminpin-peminpinndu, pegawe-pegawendu, kam si dilaki

¹¹ ras si diberu ras danak-danak ras bangsa si deban si tading ras kam, si muat ranting ras ngelegi laundu.

¹² Kam sendah i jenda muat bagin ngaloken tanggung jawab i bas perpadanen si ibahan TUHAN Dibatandu ras kam,

¹³ gelah genduari banci itetapken TUHAN kam selaku BangsaNa ras Ia Dibatandu, sue ras si IpadankenNa man bandu ras man nini-ninindu Abraham, Isak, ras Jakup.

¹⁴ Labo ras kam ngenca TUHAN erbahan perpadanen rikut ras tanggung jawabna e.

¹⁵ Ia erbahan perpadanen ras kerina kita si tedis i adep-AdepenNa wari enda, ras bage pe man sinursurta si lenga tubuh pe.

¹⁶ Ingetndu uga geluhndu sanga i Mesir, uga nanamna mentasi negeri bangsa-bangsa si deban.

¹⁷ Idahndu uga cigana ate ngenehen dibata-dibatana si ibahan i bas kayu, besi, pirak ras emas nari.

¹⁸ Jaga maka kerina si tedis i jenda sendah, subuk dilaki ntah diberu, keluarga ntah suku-suku, la nundalken TUHAN Dibatanta alu nembah man dibata-dibata bangsa si deban, erkiteken nembah man dibata-dibata si deban bali ras urat si turah jadi sinuan-sinuan si pagit ras si erracun.

¹⁹ Jaga maka ula lit sekalak pe si i jenda sendah megi aturen perpadanen si ibahan TUHAN enda erpengakap maka ia tetap nge mejuah-juah aminna gia alu ukur mersik tetap nge ia nggeluh bagi ate-atena. Adi bage kerina kam ikernepken, subuk si bujur ras si jahat.

²⁰ La ialemi TUHAN kalak si bage, tapi gara pernembeh ate TUHAN man bana, janah kerina mara si isuratken i bas kitap enda, ndabuh ku ia, seh maka nggo keri kal ia ikernepken TUHAN.

²¹ Ijadiken TUHAN ia jadi sada usihen man kerina suku Israel. Iukum TUHAN me ia alu mara kelesa sue ras sumpah si isingetken i bas perpadanen si tersurat i bas kitap pengajaren TUHAN enda.

²² I bas paksa si reh sinursurndu ras bangsa si deban si asalna i bas negeri si ndauh nari ngidah mara ras kiniseran si ibahan TUHAN i negerindu.

²³ Jumandu jadi tenggiring si la lit gunana, itambusi kertah ras sira. La tersuani kai pe, rih pe la turah. Negerindu bali ras kota Sodom ras Gomora, Adma ras Seboim, si ikernepken TUHAN alu rawana si la teralang.

²⁴ Emaka kerina doni nungkun, 'Ngkai maka ilakoken TUHAN e man negeri Israel? Kai nge ndia si erbanca maka bage nembehna AteNa?'

²⁵ Enda me jabapna, 'Sabapna eme erkiteken bangsa TUHAN la ncikep perpadanen si ibanna ras Ia, Dibata nu ninina, sanga bangsa e ibabana ndarat i Mesir nari.

²⁶ Isembahna dibata-dibata si deban si lenga penah isembahna, dibata-dibata si ilarang TUHAN man sembahen.

²⁷ Emaka nembeh TUHAN man BangsaNa, janah ItamakenNa ku negeri e kerina mara si isuratken i bas kitap enda.

²⁸ Seh kal ate TUHAN nembehna, janah erkiteken PernembehNa si mbelin e, IruahNa BangsaNa e i bas negerina nari, jenari IambekkenNa ku negeri bangsa si deban, janah bagi ah me genduari kecibalna.'

²⁹ Memang lit denga si ibuniken TUHAN Dibatanta man banta, tapi nggo IpetangkasNa undang-UndangNa, emaka kita ras sinursurta arus ngikutkenca asa lalap."

Ulangan

Video Ulangan 29

Ikuti Kami:

KONTAK | PARTISIPASI | DONASI