Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anggo martinggil dua halak, anjaha laho sidea hu paruhuman anjaha i dabuh bani sidea uhum, gabe papintoron ma halak parpintor anjaha salahkonon halak parsalah.
2 Anjaha anggo patut do silonsingon parsalah ai, maningon hatahonon ni panguhum ai ma ia manowod, anjaha lonsingon i lobeini, romban hubani hajahatonni bueini.
3 Ompat puluh hali do ia bulih lonsingon, ulang lobih; ase ulang mahiri saninamu i lobeimu anggo ilonsingi ia lobih hunjai.
4 Seng bulih huntamonmu babah ni lombu sanggah mardogei.
5 Anggo rap marianan halak na marsanina, hape matei sahalak humbani sidea seng tubuhan anak, seng bulih palahoon puang-puang, parinangon ni halak na matei ai bahen parinangon ni halak na legan, maningon anggini ai do marayaksi bahen parinangonni pajongjong ginompar bani abangni ai.
6 Anjaha anak bunga tubuh, na tinubuhkonni ai, maningon marpanggorankon goran ni bapani na matei ai do, ase ulang sasap goranni hun Israel.
7 Tapi anggo seng marosuh uhur ni dalahi ai paganjangkon parinangon ni abangni ai, maningon laho ma parinangon ni abangni ai tangkog hu horbangan ni huta ai marayak pangintuai-pangintuai lanjar hatahononni ma, “Mangengkar do anggingku pajongjong goran ni abangni i Israel, seng ra ia paganjang ahu.”
8 Dob ai diloon ni pangintuai ni huta ai ma ia laho marsahapkonsi; hape anggo tong do martahan ia mangkatahon, “Seng marosuh uhurhu paganjangkonsi.”
9 Jadi laho ma parinangon ni abangni ai hu lambungni i lobei ni pangintuai ai, itanggali naboru ai ma sipatuni humbani naheini anjaha itijuri bohini, lanjar nini ma mambalosi, “Maningon sonin do bahenon hu dalahi, na so ra pajongjong ginompar hubani abangni.”
10 Anjaha maningon goranon ni halak ma goranni i Israel, “Rumah ni halak, na dob tinanggalan sipatuni.”
11 Anggo martinggil dua dalahi samah sidea, gabe roh parinangon ni na sada sihol paluahkon paramangonni hun tangan ni na mambogbogisi, gabe isurdukkon tanganni anjaha isontap hailaonni,
12 jadi maningon rotaponmu do tangan ni puang-puang ai, seng bulih maralang-alang uhurmu.
13 Seng bulih dong dua batu timbangan ibagas ranjutmu, sada na banggal anjaha sada na etek.
14 Seng bulih mardua tapongan ham ibagas rumahmu, sada na banggal anjaha sada na etek.
15 Maningon marbatu timbangan na botul anjaha na sintong ham, maningon martapongan na botul anjaha na sintong ham, ase dokah ham manggoluh i tanoh sibereon ni Jahowa Naibatamu bamu.
16 Ai marbursik-bursik do Jahowa Naibatamu mangidah ganup jolma na mangkorjahon na sonai, mangidah ganup jolma tene na mangkorjahon hagedukon.
17 Ingat ma na binahen ni halak Amalek bamu i tongah dalan, sanggah na luar nasiam hun Masir,
18 naha pangadangni bamu i tongah dalan, sanggah na galek anjaha loja ham, anjaha ibunuh sagala na galek na roh mangihut hun pudi, anjaha seng ihabiari Naibata.
19 Halani ai anggo domma marhasonangan ham ibahen Jahowa Naibatamu humbani sagala munsuhmu inggot i tanoh sibereon ni Jahowa Naibatamu bamu bahen parbagiananmu, maningon siapkononmu ma pardingatan ni halak Amalek hun toruh ni langit; seng bulih halupahononmu ia.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA