Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anggo ididah ham lombu barang biribiri ni hasomanmu kahou, seng bulih paturutonmu sonai; maningon toguonmu do ai mulak bani hasomanmu ai.
2 Anggo seng dohor ia hun bamu, barang anggo lang itandai ham ia, maningon boanonmu do ai hu rumahmu, anjaha i lambungmu ma ai paima roh pindah-pindah hasomanmu ai; dob ai maningon paulakonmu do ai bani.
3 Maningon sonai do bahenonmu pasal halodeni, lanjar sonai do bahenonmu pasal hiouni, lanjar sonai do bahenonmu pasal ganup ugas na magou humbani hasomanmu, anjaha na jumpah ham, seng bulih paturutonmu ai.
4 Anggo ididah ham halode barang lombu ni hasomanmu tompas i dalan, seng bulih paturutonmu ai, maningon urupanmu do ia pajongjongkon ai.
5 Seng bulih marpakean dalahi naboru, anjaha seng bulih marpakean naboru ia dalahi, ai barang ise na mangkorjahon ai hagigi ni Jahowa Naibatamu do ai.
6 Anggo jumpah ham asar ni manuk-manuk i tongah dalan barang i atas tanoh, maranak poso barang marisi tolur, anjaha indungni ai manrongkob anakni barang mamodomkon tolurni ai, seng bulih buatonmu indungni ai rap pakon anakni ai;
7 maningon paluahonmu do indungni ai, tapi anggo anakni ai bulih do buatonmu, ase marhasonangan ham anjaha dokah ham manggoluh.
8 Anggo pajongjong rumah na bayu ham, maningon bahenonmu do hondor-hondor inggot rumahmu ai, ase ulang iampeihon ham utang daroh bani rumahmu, anggo adong halak na madabuh hunjai.
9 Seng bulih mardua bagei bonih saburhononmu hu pohon anggurmu, ase ulang magou buah ni bonih, na sinaburhonmu ai rap pakon buah ni hayu anggur ai.
10 Seng bulih bahenonmu sapasang maninggala lombu pakon halode.
11 Seng bulih pakeionmu hiou na mardua bagei bonangni, ambulu ni biribiri pakon bonang silopak na alus.
12 Maningon bahenonmu do bamu rambu hubani haompatsi suhi-suhi ni sabingmu, na pinakeimu manrongkob angkulamu.
13 Anggo adong sada dalahi mambuat boru, hape dob marsaor ia pakonsi gabe magigi uhurni mangidahsi,
14 dob ai ipatubuh-tubuh ma hasamboronni anjaha ipabajan-bajan goranni, nini, “Domma namin hubuat boru on bahen parinangonku, hape dob huparayak ia, seng dong jumpah ahu be bani tanda ni haanak boruonni.”
15 Jadi maningon boanon ni bapa pakon inang ni naboru ai ma boruni ai rap pakon tanda ni haanak boruonni hu lobei ni pangintuai ni huta ai, hu horbangan.
16 Dob ai hatahonon ni bapa ni naboru ai ma hubani pangintuai ai, Domma hupalaho namin borungkon hubani dalahi on bahen parinangonni, hape magigi ia mangidahsi,
17 anjaha tonggor ma, ipatubuh-tubuh do hasamboron bani, nini, “Seng dong jumpah ahu bani borumu on tanda ni haanak boruonni,” tapi “ijon do tanda ni haanak boruon ni borungkon.” Dob ai maningon paherbangon ni sidea ma hiou ai i lobei ni pangintuai ni huta ai.
18 Dob ai maningon tangkapon ni pangintuai ni huta ai ma dalahi ai, lanjar bogbogon ni sidea ma ia;
19 dondaon ni sidea ma ia saratus sekel pirak, anjaha bereon ni sidea ma ai hubani bapa ni puang-puang ai, halani na pinasambor-samborni ai goran ni anak boru ni Israel; anjaha maningon totap do ia parinangonni, seng bulih ambukkononni ia sadokah manggoluh.
20 Tapi anggo tongon do ai, seng dong jumpah tanda ni haanak boruonni bani naboru ai,
21 jadi maningon toguon ni sidea do luar naboru ai hu labah ni rumah ni bapani, dob ai pargijigon ni hasomanni sahuta ma ia bani batu ase matei, halani na dob mambahen hasamboron ia i Israel marhitei na marriah-riah ia ibagas rumah ni bapani; sonai ma siapkononmu hajahaton ai hun tongah-tongahmu.
22 Anggo tardapot sada dalahi mangkorjahon na masambor pakon sada parinangon ni halak na legan, maningon matei sidea haduasi, dalahi na marsaor hubani naboru ai pakon naboru ai, sonai ma siapkononmu hajahaton ai hun tongah-tongah ni Israel.
23 Anggo adong sada anak boru na dob martunangan, anjaha pajumpah ma ia pakon sada dalahi na legan i huta ai, lanjar marsaor sidea,
24 maningon haduasi sidea toguon hu darat ni horbangan ni huta ai, anjaha maningon pargijigon sidea bani batu ase matei, naboru ai, halani na so mandoruhi ia age pe ibagas huta; dalahi ai, halani na binutakanni ai parinangon ni hasomanni; sonai ma siapkononmu hajahaton ai hun tongah-tongahmu.
25 Tapi anggo i ladang do jumpah dalahi ai naboru, na dob martunangan ai, gabe itangkap ia anjaha marsaor pakonsi, jadi pitah dalahi na marsaor pakonsi ai do na maningon matei.
26 Tapi seng bulih kahuaonmu naboru ai, ai seng dong bani naboru ai dousa, na boi mambahen matei ia, halani paharani ai usih do ai hubani sada halak, na mandorab anjaha na mamunuh hasomanni;
27 ai i ladang do naboru ai jumpahsi, anjaha age pe mandoruhi naboru na dob martunangan ai, seng dong age sahalak na tarbahen mangurupisi.
28 Anggo jumpah sada halak sada anak boru, na so martunangan ope, gabe itangkap ia anjaha marsaor ia pakonsi, anjaha tardapot sidea,
29 jadi maningon bereon ni dalahi, na marsaor pakon naboru ai ma lima puluh sekel pirak hubani bapa ni naboru ai, anjaha gabe parinangonni ma ia halani na dob binutakanni ai ia, seng bulih ambukkononni ia sadokah manggoluh ia.
30 Seng bulih pagodangon ni sada halak parinangon ni bapani, halani na dob marsaor bapani hu bani.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA