Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Dungna mulihken kita ku gurun pasir ngikuti dalan si kempak Teluk Akaba, bagi si iperentahken TUHAN man bangku. Ndekah kita mampa-mampa i deleng-deleng negeri Edom.
2 Kenca bage maka ikataken TUHAN man bangku,
3 maka nggo bias dekahna kita mampa-mampa i deleng-deleng e, janah kita arus lawes kempak Utara.
4 IsuruhNa aku mereken perentah-perentah enda man Bandu 'Nandangi ibentasindu me deleng-deleng negeri Edom. E kap ingan kade-kadendu kesusuren Esau. Mbiar kalak e man bandu,
5 tapi la banci iperangndu ia, erkiteken la ateKu Kubereken sejengkal pe taneh e man bandu. Nggo Kubereken Edom man sinursur Esau.
6 Nakan ras lau ngenca banci itukurndu i bas ia nari.'
7 Ingetlah uga nggo pemasu-masu TUHAN Dibatandu i bas kerina si nggo idahindu. Ikep-KepNa kam kidekah kam mampa-mampa i gurun pasir si mbelang enda. Iarak-ArakNa kam kidekah empat puluh tahun enda, janah kerina keperlunndu IcukupiNa.
8 Emaka kita erdalan terus nadingken dalan i kota Elat ras Esiongeber nari ku Lawit Mate, jenari melok kita ku Timur Laut nuju Moap.
9 Nina TUHAN man bangku, 'Ula gasgasi bangsa Moap sinursur si Lut. Ula erperang ras ia. Nggo Kubereken kota Ar man bana, janah la ateKu mereken taneh e sitik pe man bandu.'"
10 (Sada bangsa manusia Emim gelgel e tading i kota Ar. Seri gedangna ras bangsa Anakim. Bangsa Anakim e pe bangsa si gedang mbelin.
11 Bali ras bangsa Anakim, bangsa Emim pe igelari bangsa Repaim, tapi igelari bangsa Moap kalak enda Emim.
12 Bangsa Hori pe mbarenda tading i Edom. Tapi ipelawes sinursur Esau kalak enda, ikernepkenna negerina, emaka iinganina, bali ras bangsa Israel si arah pudi mpelawes musuhna i bas negeri si ibereken TUHAN man bana.)
13 "Kenca bage sikepari Lau Seret, sabap bage perentah TUHAN.
14 Si enda jadi kenca nggo telu pulu waluh tahun kita nadingken Kades Barnea. Kerina kalak si ngasup erperang i bas paksa si e nggo mate, sue ras kai si nggo ikataken TUHAN.
15 Kalak enda tetap ilawan TUHAN la ngadi-ngadi IkernepkenNa ia kerina.
16 Kenca kerina kalak si ngasup erperang e mate,
17 ngerana TUHAN man banta,
18 'I bas wari enda ibentasindu daerah Moap arah kota Ar.
19 Kenca bage maka nggo kam ndeher ras negeri bangsa Amon, bangsa sinursur Lut. Ula gasgasi ia, ula erperang ras ia, sabap la ateKu Kubereken sitik pe man bandu taneh si nggo Kubereken man bana e.'"
20 (Taneh e semal igelari taneh Repaim, sue ras gelar bangsa si gelgel e tading i je. Tapi bangsa Amon nggelari kalak e bangsa Samsumim.
21 Gedangna bali ras bangsa Anakim. Kalak enda nterem janah megegeh. Tapi ikernepken TUHAN kalak enda, gelah banci ikuasai bangsa Amon tanehna, janah ringan i je.
22 Bage ka pe perbahanen TUHAN man bangsa Edom sinursur Esau si ringan i deleng-deleng Edom. Ikernepken TUHAN bangsa Hori gelah banci ikuasai bangsa Edom tanehna janah ringan i je. Seh ngayak genduari i je denga kalak enda ringan.
23 Taneh i gedang-gedang tepi Lawit Tengah gelgel e iingani kalak si rehna i pulau Kreta nari. Ikernepken kalak enda bangsa Awi, eme kap penduduk asli daerah e, jenari ikuasaina negerina seh ku kota Gasa i Selatan.)
24 "Kenca nggo si bentasi Moap, ngerana TUHAN man banta nina, 'Genduari berkat lah, kepari Lau Arnon. Kuendesken man bandu si Sihon, raja bangsa Amori si erkuasa i Hesbon, ras negerina. Perang lah ia, rampas negerina.
25 Mulai sendah, Kuban maka mbiar kalak i ja pa pe man bandu. Si megi gelarndu nggirgir ia perbahan biarna ngenehen kam.'"
26 "Kenca bage maka kusuruh piga-piga persuruhen i gurun pasir Kedemot nari ngadap man Sihon raja si erkuasa i Hesbon, guna nehken usul perdamen enda,
27 'Bere lah kami mentasi negerindu. Mentas ngenca kami, janah labo kami luar i bas dalan nari.
28 Igalari kami pangan si ipan kami ras inemen si inem kami. Mentas ngenca ate kami arah negerindu,
29 seh maka banci kami ngepari Lau Jordan ku negeri si ibereken TUHAN Dibata kami AteNa man kami. Bangsa sinursur Esau si tading i Edom ras bangsa Moap si ringan i Ar, e pe iberena nge kami mentasi daerahna.'
30 Tapi la ibere Raja Sihon kita mentasi negerina. TUHAN Dibatandu nggo erbahanca maka batu-batun pusuh Raja Sihon ras la ia nggit patuh, maka banci sitaluken ia, janah ngerampasi negeri si genduari iingani kita enda.
31 Nina TUHAN man bangku, 'Nen me! Nggo Kuendesken Raja Sihon ras negerina man bandu. Rebutlah ras ingani lah negerina e.'
32 Ndarat Sihon ras kerina tenterana, erperang ia ras kita i deher kota Jahas.
33 Tapi iendesken TUHAN Dibatanta ia ku bas kuasanta, emaka si bunuh ia, ras anak-anakna, ras kerina tenterana.
34 I bas paksa eme kita ngerampas ras ngkernepken tep-tep kota, munuhi tep-tep jelma subuk dilaki ntah diberu bage pe anak-anak, sada pe lanai lit tading.
35 Sibuati asuh-asuhenna, sirampasi kota-kotana.
36 TUHAN Dibatanta nampati kita naluken kota-kota, menaken i Aroer nari si lit i tepi berneh-berneh Arnon ras kota si lit i tengah-tengah berneh-berneh e, seh ku Gileat. La lit tembok kota enteguh-enteguhsa man banta.
37 Tapi la si deheri daerah bangsa Amon ntah ndeheri Lau Jabok, ntah kota-kota si apai pe i bas uruk-uruk e. Bage pe labo si deheri ingan si apai pe si la iperentahken TUHAN kita ku je."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA