Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Saellana jareya PANGERAN adhabu ka sengko’, ‘Mosa, kassa’ ngetthok papan bato dhadhuwa’ papadha ban se sabbanna rowa, pas gabayyagi baddha petthe dhari kaju. Mon la mare ba’na pas entar ka Sengko’ e konco’na gunong.
2 Papan bato jareya bi’ Sengko’ etolesana ca’-oca’ se padha ban se etoles e bato se epabella ba’na rowa, mon la mare, pan-papan bato jareya pas pamaso’ ka petthe kajuna.’
3 Sengko’ pas agabay petthe dhari kaju akasia sarta ngetthok papan bato dhadhuwa’ epapadha ban se jang adha’an, samarena bi’ sengko’ pas egiba ka attas gunong.
4 PANGERAN pas nyerrat Papakon Se Sapolo e papan bato se dhadhuwa’ jareya, padha ban se dha’-adha’, iya areya papakon se edhabuwagi ka ba’na e bakto Salerana abu-dhabu ka ba’na dhari dhalem apoy, teppa’na ba’na akompol e babana gunong rowa. Saellana jareya papan bato se la badha tolesanna rowa bi’ PANGERAN eparengngagi ka sengko’,
5 sengko’ pas abali toron gunong. Papan bato se dhadhuwa’ jareya bi’ sengko’ pas epamaso’ ka dhalem petthe gabayanna sengko’ rowa, menorot apa se la edhabuwagi PANGERAN — molae dhari bakto jareya, sampe’ sateya, papan bato jareya gi’ paggun badha e dhalem petthe jareya."
6 (Saellana jareya oreng Isra’il mangkat dhari mor-somorraoreng Ya’akan, entar ka Mosera. E jadhiya Harun seda, ban ebendhem e jadhiya keya. Eleyazar, ana’na Harun, epadaddi gantena menangka imam.
7 Dhari jadhiya oreng Isra’il terros ka Gudgod, terros ka Yotbata, kennengngan se bannya’ aengnga.
8 E gunong jareya PANGERAN mele reng-oreng suku Lewi epangoros Petthe Parjanjiyan ban epadaddi imam se kodu aladine PANGERAN, sarta epakon aberkadi oreng kalaban asmana PANGERAN. Sampe’ sateya suku Lewi paggun epaneggu’ lalakon jareya.
9 Lantaran jareya suku Lewi ta’ narema tana sangkolan akantha ku-suku laenna; suku Lewi narema ha’ istimewana mam-imamma PANGERAN, iya areya bagiyanna tor-atorra bangsa Isra’il ka PANGERAN, akantha se la edhabuwagi PANGERAN dibi’.)
10 "Pa’ polo are pa’ polo malem abidda sengko’ neng e gunong jareya, akantha se jang adha’an. PANGERAN kasokan ngabbuli tang parnyo’onan pole, ba’na burung ta’ epamosna’a.
11 Sengko’ laju epakon toron, epakon mimpin ba’na sopaja ba’na bisa’a ngaandhi’ tana se la ejanjiyagi ka bangatowana ba’na."
12 "Sateya tan-taretan, kaenga’e apa se epakonnagi ka ba’na bi’ GUSTE Allahna: Abakte ka GUSTE Allahna, ban jalannagi kabbi sabarang papakonna. Taresnae Salerana, ban abakte ka Salerana banne pera’ ban badanna malolo, tape ban atena keya.
13 Estowagi sabarang se daddi papakonna se eajarragi sengko’ ka ba’na are teya reya, kaangguy kaparlowanna ba’na dibi’.
14 Langnge’ se paleng tenggi reya kaagunganna GUSTE Allahna ba’na; bariya keya bume ban essena.
15 Tape kataresna’anna PANGERAN ka bangatowana ba’na talebat rajana, sampe’ ba’na epele e antara sa-bangsa laenna, ban sampe’ sateya ba’na gi’ paggun daddi ommat peleyanna.
16 Daddi, molae sateya ba’na kodu ta’at ka Pangeran, ban ja’ macengkal pole.
17 GUSTE Allahna ba’na atenggiyan dhari sakabbinna la’-alla’an ban ngalebbi’i sakabbinna kakobasa’an. Salerana jareya Allah se agung ban kobasa se kodu eta’adi. Pangeran ta’ kasokan nolonge se settong ban ngamoso settonganna, ban ta’ kasokan ka go’-sogo’.
18 Salerana abillai ha’na na’-kana’ jatim ban dha-randha sopaja na’-kana’ jatim ban para randha jareya narema ha’na kalaban cara se adil; oreng manca se badha e nagarana ba’na ekataresnae, ban eparenge pakan ban angguy.
19 Daddi ba’na kodu noduwagi kataresna’anna keya ka reng-oreng manca jareya, sabab lamba’ e Messer ba’na daddi oreng manca keya.
20 Ba’na kodu hormat ka GUSTE Allahna ban abakte ka Salerana malolo. Paesto ka Salerana ban asompa kalaban asmana malolo.
21 Molja’agi asmana sabab Pangeran jareya Allahna ba’na. Ba’na la nangale bi’ matana dibi’ kadaddiyan-kadaddiyan se makasambu’ ate ban se nako’e se elampa’agi Salerana kaangguy kaparlowanna ba’na.
22 E bakto bangatowana ba’na entar ka Messer, bannya’na pera’ pettong polo oreng. Tape bi’ GUSTE Allahna ba’na epatamba bannya’ sampe’ bannya’na padha ban bannya’na bintang e langnge’."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA