Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Siapa are sallona ribokoanganna, nakanamo Naomi mae ri Rut, "Musti usaha’ ampa’bura’neko poleang siagang numate’ne.
2 Sai siagangko bai’-bainea anjama ri kokonna Boas? Anjo Boas bijanta tonji. Jari, pilangngeri kanangku! Anne bangngia la’lampai mange anggiling gandung ri kokonna.
3 A’je’ne’ mako kamma-kamma anne nampa ammakeko minynya’-minynya’ mabau’, siagang pakemi pakeannu kaminang ga’gaya. Nunampa a’lampa mange ri tampa’ napanjamaia Boas anggiling gandung. Tayangi anjoreng sa’genna le’ba’ angnganre siagang angnginung, mingka tea’ lalo naassengi angkanaya niakko anjoreng.
4 Parhatikangi kemaei a’lampa attinro. Punna attinromi, mange mako anjoreng siagang sungkei kalimbu’na nampa attinroko ri ampi’ bangkenna. Lanapauang jako antu sallang apa musti nugaukang."
5 Appialimi Rut angkana, "Baji’mi amma’, lakugaukangi sikontu kananta."
6 Jari a’lampami Rut ri tampa’na taua anggiling gandung. Anjoreng nagaukammi sikontu anjo apa napassuroanga matoanna.
7 Le’ba’namo Boas angnganre siagang angnginung, sukku’mi nasa’ring siagang sannammi pa’mai’na. Nampa a’lampamo mange attinro ri ampi’na pa’gompoang gandunga. A’mere’-merekimi Rut battu nampa nasungke kalimbu’na Boas, nampa attinro ri ampi’ bangkenna.
8 Ri tangngana bangngia ti’ring ambangummi Boas na ero’ anggiling. Ta’bangkami nacini’na nia’ sitau baine attinro ri ampi’ bangkenna.
9 Akkuta’nammi angkana, "Inaiko antu?" Appialimi Rut angkana, "Inakke Rut Bapa’. Ikatte bija ma’reppese’na ikambe ia mustia antanggongi katallassangku. Kupalaki nakirella angngallea’ a’jari bainenta."
10 Nakanamo Boas, "Tapporo Nabarakkakiko Batara anakku. Punna nipasinrapangi apa le’baka nugaukang mae ri matoang bainenu, anne apa nugaukanga ri kamma-kammaya anne ma’nassa la’bi lompoangangi pole pangngainu. Akkullejako a’boya bura’ne ia la’bi rungkangnganga ri tau kalumanynyanga yareka tu kasi-asia, mingka tena nanugaukangi anjo kammaya.
11 Lanri kammana, tea’ mako batai Rut. Sikontu anjo apa nupalaka lakugaukangi; nasaba’ sikontu taua ri anne kotaya naassemmi angkanaya ikau tau baji’ pa’maikko.
12 Memang, kammatojengi angkanaya inakke musti antanggongi katallassannu, nasaba’ inakke bija ma’reppese’nu. Mingka nia’ ija maraengannaya musti antanggongi katallassannu. Siagang ia bija la’bi a’reppesangngang na inakke.
13 Anne bangngia ammantang mako rolong anrinni. Ammuko bari’basa’ lakukuta’nangi apaka ero’ji anggaukangi anjo tanggong jawa’na mae ri kau yareka tena. Punna eroki, baji’mi; mingka punna taerokai, a’janjia’ lalang arenNa Allata’ala mattallasaka, angkanaya lakugaukangi anjo tanggong jawaka. Kamma-kamma anne attinro mako anrinni sa’genna bari’basa’."
14 Jari attinromi Rut anjoreng, ri ampi’ bangkenna Boas. Ammukona, ri bari’basa’ duduna ija, ambangummi Rut, sollanna tanicinika ri taua. Nasaba’ taerokai Boas angkanaya nia’ tau angngassengi angkanaya niaki Rut battu mae anjoreng ri anjo tampaka.
15 Angkanami Boas mae ri Rut, "La’gasimi bongonnu nampa nupalapara’ anrinni." Jari nala’gasimi bongonna Rut nampa napalapara’. Nampa napanaungimo Boas anjo bongonga kira-kira nia’ ruampulo kilo battala’na gandung. Nampa napanai’ ri salangganna Rut. Le’baki anjo a’lampami Boas mae ri kotaya.
16 Battuna Rut mange ri balla’, akkuta’nammi matoanna angkana, "Antekamma kajarianna, na’?" Nacarita ngasemmi Rut sikontu apa nagaukanga Boas mae ri ia.
17 Nakanamo pole Rut, "Ba’lalo iami assarea’ yangasenna anne gandunga, nasaba’ nakana takkullea’ ammotere’ mae ri katte natena apa-apa kuerang."
18 Nampa nakanamo Naomi, "Tayang mami na’, sa’genna nucini’ antekamma sallang kale’bakkanna anne passalaka. Tena nala’mereki Boas punna tena napa’le’baki Boas anne passalaka, ia memang anne alloa."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA