¹ Toh jaton hindai hukuman akan ewen je belom hinje dengan Kristus Yesus.
² Basa hukum Roh Hatalla je mawi itah belom hinje dengan Kristus Yesus jari malapas aku bara hukum je mawi sabab aku badosa tuntang buah pampatei.
³ Taloh je dia tau ilalus awi hukum agama, awi itah oloh balemo, jete jari ilalus awi Hatalla. Hatalla mampakalah kuasan dosa huang sipat olon awie mangirim Anake kabuat, je dumah dengan ampie sama kilau olon je badosa, uka manganan dosa.
⁴ Hatalla malalus jete uka kahandak Ayue je ingarinah huang hukum agama Yehudi te tau ilalus huang arep itah je belom manumon Roh Hatalla tuntang dia manumon sipat olon.
⁵ Kare oloh je belom manumon sipat olon, harajur manirok taloh je ingahandak awi sipat olon. Tapi kare oloh je belom manumon Roh Hatalla, harajur manirok kare taloh je ingahandak awi Roh Hatalla.
⁶ Amon tirok keton inguasa awi sipat olon, maka kajariae keton buah pampatei. Tapi amon tirok keton inguasa awi Roh Hatalla, maka kajariae keton belom tuntang badamai dengan Hatalla.
⁷ Oloh je tiroke inguasa awi sipat kaolon, oloh te hamusoh dengan Hatalla; basa oloh te dia tundok dengan hukum Hatalla; tuntang puna ie dia tau tundok dengan hukum Hatalla.
⁸ Kare oloh je belom manumon sipat olon, dia tau manyanang atei Hatalla.
⁹ Tapi keton dia belom manumon sipat olon. Keton manumon Roh Hatalla -- asal bewei, Roh Hatalla puna toto-toto manguasa taloh handiai huang arep keton. Oloh je dia bara Roh Kristus, oloh te dia ie ain Kristus.
¹⁰ Tapi amon Kristus belom huang bitin keton, maka aloh bitin keton akan matei awi dosa, tapi Roh Hatalla manenga pambelom akan keton, basa hubungan keton dengan Hatalla jari bahalap.
¹¹ Amon Roh Hatalla, je mambelom Kristus bara pampatei, belom huang keton, maka ie je mambelom Kristus bara pampatei te, kareh mambelom kea bitin keton je tau matei te. Ie malalus jete hapan Roh Ayue je belom huang keton.
¹² Jete sababe pahari handiai, itah aton tanggong jawab; tapi dia tanggong jawab dengan sipat olon; itah dia usah manumon kahandake.
¹³ Karana amon keton belom manumon sipat olon, maka keton akan matei; tapi amon hapan kuasan Roh Hatalla, keton harajur mampatei kare gawin keton je badosa, maka keton kareh belom.
¹⁴ Kare oloh je ingagalan awi Roh Hatalla, ewen te anak Hatalla.
¹⁵ Basa Roh je inenga Hatalla akan keton, dia mawi keton manjadi jipen sampai keton belom huang kikeh. Tapi Roh Hatalla te manjadian keton jadi anak Hatalla. Tuntang hapan kuasan Roh Hatalla te itah mantehau Hatalla te "Bapa, o Bapaku!"
¹⁶ Roh Hatalla haya-hayak dengan roh itah mansanan je itah toh anak Hatalla.
¹⁷ Nah, amon itah anak Hatalla maka itah kea jadi ahli waris Ayue je kareh manarima kare berkat je inatap Hatalla akan kare anake. Haya-hayak dengan Kristus itah kareh manarima taloh je jari inatap Hatalla akae; basa amon itah buah kapehe hayak dengan Kristus, itah kareh impahai kea hayak Dengae.
¹⁸ Kakare kajake je ingkeme itah wayah toh, manumon tirok ayungku, dia olih inanding samasinde dengan katinduh-kahai je imparahae akan itah.
¹⁹ Salepah langit tuntang petak mentai dengan kataharue amon sampai katikae Hatalla mangarinah kare anake.
²⁰ Basa langit tuntang petak jari inalua sampai manjadi rebuk, dia awi kahandake kabuat tapi awi Hatalla manaluae kalote. Aloh kalote, magon aton kea kaharap toh:
²¹ hong sinde katika langit tuntang petak kareh iliwus bara kuasa je handak mampahancore tuntang kareh omba mardeka tuntang impahai haya-hayak dengan kare anak Hatalla.
²² Itah katawan sampai katika toh salepah langit tuntang petak manarahing awi buah kapehe sama kilau ije biti ibu je kapehe metoh luas awau.
²³ Tuntang dia baya salepah langit tuntang petak bewei je manarahing; itah kabuat mahin manarahing huang atei itah. Itah jari manarima Roh Hatalla kilau panengan Hatalla ije mambatang, tapi itah magon kea mentai Hatalla maliwus itah samandiai tuntang manjadian itah jadi anak Ayue.
²⁴ Karana awi kaharap, itah inyalamat. Tapi amon taloh je iharap te jari gitan itah, maka jete dia ie kaharap hindai. Basa eweh je magon maharap taloh je jari gitae?
²⁵ Tapi amon itah maharap taloh je hindai itah mitee, maka itah mentai jete dengan sabar.
²⁶ Kalote kea Roh Hatalla dumah mandohop itah amon itah balemo. Basa itah dia katawan kilen ampie itah musti balakudoa; Roh te kabuat manaharep Hatalla uka balaku akan itah hapan kataharu je paham handalem sampai dia olih insanan.
²⁷ Maka Hatalla je mangatawan taloh je huang atei olon, mangasene kahandak Roh te; basa Roh te balaku dengan Hatalla akan ungkup Hatalla, tuntang hasaroroi dengan kahandak Hatalla.
²⁸ Itah katawan Hatalla mator taloh handiai, sampai mampalembut taloh bahalap akan kare oloh je sinta Ie tuntang je intehau Awie hasaroroi dengan rencana Ayue.
²⁹ Ewen je jari iintih awi Hatalla, jari kea inukas bara solake uka manjadi sama ampie kilau dengan Anake, iete Yesus Kristus. Maka dengan kalote anak te manjadi je Tambakase bara kare paharie.
³⁰ Kalote Hatalla mantehau ewen je inukase labih helo; tuntang ewen je intehau te, Ie mawie uka badamai haluli dengan Hatalla. Tuntang ewen je badamai haluli dengan Hatalla, omba huang pambelom ain Hatalla kabuat.
³¹ Toh, en je koan itah tahiu kare taloh handiai te? Amon Hatalla omba pihak itah, eweh je olih malawan itah?
³² Anak Ayue kabuat dia Ie manyayange, malengkan inyarah Awie akan gunan itah samandiai; en Ie dia handak manenga akan itah kare taloh awang beken kea?
³³ Eweh je tau manyalan itah ungkup je iintih Hatalla, amon Hatalla kabuat je mansanan itah toh dia basala?
³⁴ En aton oloh je handak manyalan itah? Kristus Yesus kareh je mambela itah! Ie te je jari matei, ie te haream je jari imbelom tinai bara pampatei tuntang aton hinje Hatalla hong eka je bakuasa.
³⁵ En aton oloh je tau mangahana Kristus sinta itah? En tau kasusah mangahana Ie, atawa kajake, atawa kapehe, atawa lau, atawa kasusah belom, atawa bahaya, atawa kea pampatei?
³⁶ Huang Surat Barasih tarasurat kalotoh, "Hapus andau ikei belom huang bahaya pampatei tagal Ikau. Ikei iawi oloh kilau tabiri je handak inyambalih."
³⁷ Dia! Huang kare taloh handiai te itah haream je mandino kamanang je tinduh-barasih awi Ie je sinta itah!
³⁸ Basa aku percaya toto iete hong hapus kalunen toh, aloh pampatei atawa pambelom, aloh malekat atawa panguasa, aloh kare ancaman je wayah toh atawa ancaman je akan dumah atawa kare kuasa je beken;
³⁹ aloh kare taloh intu langit, atawa kare taloh je intu penda petak atawa en bewei, jaton olih mangahana Hatalla sinta itah, sama kilau je jari imparahae mahalau Kristus Yesus, Tuhan itah.