¹ Zen in zep, aya-wal oso-wal, em bejen em anakan egun, “Ëe home anakan tame uk, ‘Kirekam de syal gwibinni, zen kareknak tiꞌin.’” Sap em ema aha zisi enbirida gwenan, “Kirekam de kareksa gon zini, nen emaka karek laꞌan.” Hwena em de hen kire kareksa gonkam, dekam em mese Alap mo nwenak enaka kareknak de drenen hap zergunda. Sap ena hen kirena, hwena aha mo karek ensae hlaul gwizimꞌira.
² Zep ena hen mese tame uk, “Alap de kire zisi karek tabin hip man tangan dakastiꞌin.”
³ Hwena em de hen zeno mae mo kim kirekam de kareksa gonkam, em san ema ekil giꞌin? – “Alap aha zi ensa sa kire hap karek tabiri. Asa molya.”
⁴ Em san ema hen Alapsa asyas makan kil li gweꞌan? – “Alap man serkam nesa kwasang gwibirida gwenda, hen Zen holokam neno mae mo karek-karekna nwe enkam nep kara gul gwizimnira, zep ee sap asa karekna ol tine gwer.” Hwena Zen mae hap holokam emsa kwasang gwibirida gwenda: Emsa dikim halen ora san dam tasik gwibin hip.
⁵ Hwena em in nol drak-drakna hen ehalen hap ema baes taꞌan! Em in zebe ere mae hap de jala mam ulsuk gwenan. Zep aumwa hap de klis gunnuk, emsa tangan sa serkam karek tabiri, sap Zen enlala dam-dam enkam sa tingan nesa klis gulu.
⁶ Sap zen kirekam Alap mo ola ban dakastiꞌin– men zen anakan lwakye, “Alap tingare zi hip zere mae mo syal ei jam enkam sa golzimdi– sap dawemsa de gol gwen zi hip dena, hen kareksa de gol gwen zi hip denaye.”
⁷ Dekam dawemsa de syal gwibinnik men zen tatetekam anakare enlala naban ezauk gwenan, “Ëe akakim hendep denaban zere mo ngatannak bose dawem naban gwe gwek,” zebe mae hap hendep de engaya gwen hap denaka sa golzimdi.
⁸ Hwena men zen zere mae mo tim enna ngalap nei gwibirin, hen eiwa dena dokwak nul srem gwe-gwenan, hen jal-jal ensa syal nei gwibirin, kirekam de zini Alap serkam tangan sa karek tabiri.
⁹ Tingare zini men zen kareksa syal nei gwibirin, desa Alap serkam de kareknak sa kang gulu. Zao sa hendep denaban go naban lowehe gwer– sap Yahudi zi, hen sap Yahudi srem zi.
¹⁰ Hwena men zen dawemna syal nei gwibirin, zebe mae hap bose dawemsa sa golzimdi, hen Alap mo ngatannak sa heꞌho naban hendep denaban lowehe gwer– sap Yahudi zi, hen sap Yahudi srem zi.
¹¹ Sap Alap kim de klis guꞌunka, Zen molya ahakore zi ausu ensa nwekam goleakeka.
¹² Zen in zep, Yahudi srem zi ausuna, Alap Musa mo titi tabin olsa de enlala gwibin sremkam sa zere mae mo karek-karek hap karek tabiri, sap zen hom desa tame nuk. Hwena Yahudi zi ausuna, Musa mo titi tabin olsa de enlala gwibinkim sa zere mae mo karek-karek hap karek tabiri, sap zen mes desan de ang ta gwen hap Alapsa nen guk gweblak.
¹³ Sap Yahudi zini nen Musa mo titi tabin ola insa de esane gwe-gwen en nakon bejen nen Alap mo nwenak edakastin. Zen diki men zen desa kitak syal neibir tine gwenan, zen zen edakastiꞌin.
¹⁴ Hwena Yahudi srem zini, zen hom sap Musa mo titi tabin ola insa tame nul gwenan. Hwena zen kim totoresa desan ang ta gwenan, dekam mes dam gwesinin, “Alap onakore titi tabin ola in ki– zeno mae mo enhonakye.” Sap zebon mae hom– Musa mo titi tabin ol ale gunnu inye,
¹⁵ hwena zeno mae mo syala kon man dam gwesinin, “Alap mes desa zeno mae mo enhonak ing gul sonezimki.” Sap zeno mae mo enhonak ki anakare enlala naye, “Kiresa de gonkam ee mese karek gwenan,” ahaksa, “Kiresa de gonkam ee dawemsae syal gwibiꞌin.”
¹⁶ Zep lamkam Alap kim de klis guꞌunka, tingare zini nebe mae hap Alap sa nere mae mo enhonak de enlalana insa zerwet sozimdi– kire enkam de nesa klis gun hupye. Hwena ee men kirekame Kristus hup de ol dawemna ol halada gwenan, zen kirekam sa lwal: Tingare zisi de klis gun hup de Zini, Zen diki Yesus, sap Alap mes zebe hap desa de syal gwibin hip dena golblaka.
¹⁷ Angkam Yahudi zini, nere mae en habe ale gulzimꞌin: Sap nen ema anakan egu gwenan, “Nen an Yahudi zi sike. Nen Musa mo titi tabin olsa am urensik gwenan. Zep nesa man-am Alap sam gwesibirida gwenda.”
¹⁸ Zep nen ema Alap mo dwam gwibinni tame ul gwenan, hen ora dawemna mese dam lasik. Sap Musa mo titi tabin ola in zen nesa tan-tan ta gwibirin– nen dikim dawem naban karek naban kles so gwen hapye.
¹⁹ Nen ema nenaka enbirida gwenan, “Nen an nwe dimin zisi de ora dawem san zon guluda gwen hap de wenya zen, hen kawesinnik de lowehe gwen wenyaka de ngatannak golewet so gwen hap de wenyaye.”
²⁰ Hen ema nenaka enlala eibirida gwenan, “Nen an Alap mo olsa de tawa ta gwibin hip de wenya zen. Ahakore zi ausuna, zen kitak enlala joblo-topna– walas bete-tek makarena, nen de tawa ta gwibin en hap dena.” Nen kirekame nenaka boltere la gwibirin, sap nen Alap mo olsae urensik gwenan. Hen eiwa, okamanak awe kitak de tame gun hup dena, ausuna zewe.
²¹ Zep nen Yahudi zini aha ensae titi la gwibirin, hwena nena hen ba habe desan ang ta srem gwe-gwenan? Sap nen anakane tawa la gwibirin, “Bahem esowe gwen.” Hwena nena hen ba habe esowe gwe-gwenan?
²² Hen nen ema titi la gwibirin, “Bahem ekahalo gwen.” Hwena nena hen ba habe ekahalo gwe-gwenan? Anakan hen ema titi la gwibirin, “Yang tabin alapna bahem ang gwibirida gwen.” Hwena nena hen ba habe zi mo yang tabin alap hap de kire-kirena sowekam kap la gwenan?
²³ Zep nen an Musa mo titi tabin ola insa ek enkame boltere ul gwenan, hwena karekna insa ulin hana gwenan, zen Alapsae kim lamang la gwenan.
²⁴ Zen in zep Alap mo olak anakarekam lwak, “Yahudi zini eno mae mo karek-karek gulin hana gwenna, zen dekon hen aha zi Alapsa lamang da gwenan.”
²⁵ Zen in zep, nen dwan Yahudi zini to mip blonsublun en nik em-am lowe heꞌan, sap Musa mo olak nebe mae hap dena kirekam am lwak. Hwena nen de Musa mo aha titi tabin ol san ang ta gwen sremkam, ki Alap sa nesa enlala gwibiridala, “Zen san de to mip blom tasibin srem wenya.”
²⁶ Zep hen kirekam, Yahudi srem zini men zen sowe henkam Musa mo titi tabin ol san ang ta gwenan, desa sa Alap enlala gwibiridala, “Zen sap to mip blom tasibin sremna, hwena zen san de Yahudi zi tangan.”
²⁷ Zep Yahudi zini nen de Musa mo ol san ek enkam ang ta gwenkam, hwena Yahudi srem zini in de dawemkam ang ta gwenkam, ki zen sa hwena aumwa hap de klis gunnuk nesa anakan swre dabir, “Zena waba hap to mip blom tasibin nik lowehe gwek, hwena hom Musa mo titi tabin ola in san ang ta gwek. Hwena ee sap to mip blom tasibin srem nike lowehek, hwena ee Musa mo titi tabin ol san sowe henkame ang ta gwek.”
²⁸ Sap tim en nik de Yahudi wal gwenna, zen waba tangan hap. Sap eiwakam de to mip blonsublunna, zen tim en nakon bejen.
²⁹ Zen diki enho nakon de liwe henkam bap. Zep kirekam de eliwehen wenya, zen zen enwe-mase gweꞌan– san de Yahudi zi tangan. Hen kirekam de eliwe henna, zen Alap mo Enho mo syala kon ki lwa gwenan. Nere mae mo soson enkam de Musa mo ol ale gun sun ang tankam toton bejen. Enho nakon de eliwehe gwen wenya auhu-kama zini hom desa sam neisibirida gwenan. Hwena Alap Zena enna man sam gwesibirida gwenda.