¹ An kon an, em dikim nere mae mo somola Pebe Baksa tame gun hube ale gulzimꞌin: Zen Kengkreyak de jematnak de zi mo tahasa tri so gwizimnin. Zep emki desa dawemkam gul irin,
² sap em mese apdenak deban mae Bian Yesus hun eraha-en gwek. Emki zeno tahalhasa sul sonebin, sap zen hen mes Kristen zini beyakam mas gwibirida gwek. Asa hen ki mas gwe-gweblak.
³ Ano dawem gol sonen ola ansa ere mo wal bose darena Priskila ne Akwila nikip ayang ulzimk. Zen aban mae apdekam Kristus mo nganak syal ta gwenan.
⁴ Hen Kristus hup de jal hap kim sap asa daꞌak, zen zen hwena asa de erzaunnuk lin hip alp eisik. Hen zen dekam asa en hom kirekam mas eblak, hwena tingare Kristen zisi mas eibiridak. Sap asa de ngaya la srem gwenanam, ki ahakon molya eKristen gweꞌanam. Zen zep Yahudi srem zini men zen abon onakon engaya gwen hap de ol dawemna nulin gwenan, zen hen zebe nikip dawemsa nolzimꞌin.
⁵ Hen ano dawem gol sonezimdinni emki hen gubiridan– jematna men zen zeno nik mo golak tagal gwe-gwenanke, zebe mae hap. Hen ano dang tininak de wal bosena Epenetus Baksa enblak, “Paulus dawem ensa ep gol soneblaka.” Sap Asia mo lang nakon, zen zen nonol Kristussu taibliblaka.
⁶ Hen kirekam Maria Baksa enbik, “Zen dawem ensa ep gol sonebirki.” Zen ebe mae hap de dawem hap mes syala dohon-hon naka gol gwek.
⁷ Hen Andronikus ne Yunia neka enzimk, “Zen dawem ensa ebe nikip gol sonezimki.” Zen ano Yahudi bose, hen zen apdekam asa bwinak ergwe gwek. Zen Kristus mo dam sosun we-zi dare, hen ahakore dam tasibin wenya man sam neisik gwizimnin. Hen zen zen nonol abon onakon Kristussu laibliblak. Ëe hwena zeno nik mo lure nakone taibliblak.
⁸ Ano dang tininak de wal bosena Ampliatussu hen enblak, “Paulus dawem ensa ep gol soneblaka.” Sap ee deban mese apdenak Bian han eraha-en gwek.
⁹ Urbanuꞌu hen enblak, “Paulus dawem ensa ep gol soneblaka.” Sap ee deban mae apdenak Kristus mo nganak syal ta gwenan. Ano dang tininak de wal bosena Stakis Baksa hen kirekam enblak.
¹⁰ Hen kirekam Apeles Bak hap ano dawem ola ayang ulblik. Sap desa kim Kristus hup de jal hap karek dak, zen hom dekam Kristussu hli taka. Zen hendep angkam nama tatem zauꞌura. Hen Aristobulus Swe hon de syal ta gwen zini enbiridak, “Paulus dawem ensa ebe mae hap gol sonezimki.”
¹¹ Ano Yahudi bosena Herodion Baksa hen enblak, “Zen dawem ensa ebe hap gol soneblaka.” Hen Narkisus Swe hon de syal ta gwen Kristen aya-wal oso-walya enbiridak, “Zen dawem ensa ebe mae hap gol sonezimki.”
¹² Hen ano dawem gol sonen ola we darena Tripena ne Triposa neka enzimk, men zen hen Kristus hup de syal dohon-honna ol gwenanke. Hen ano dang tininak de somola Persis Baksa hen kirekam enbik, sap zen hen kirekam de syal dohon-honsa gol gwek.
¹³ Hen ano dawem gol sonenna Rufus neka an zeban enzimk. Kristus man tangan sam gweka– Zen kim desa zere mo syalsa de gol gwen hap dam tasikiye. Hen an zem insa, ee ama tangan gweibik– san de ano ane tanganna kiye.
¹⁴ Hen ano dawem ol gol sonenna enbiridak– Asinkritus, Plegon, Hermes, Patrobas, hen Hermas Baksa, hen tingare aya-wal oso-walya men zen deban mae lowehe gwenan. Desa kitak enbiridak.
¹⁵ Hen ano dawem ol gol sonenna enbiridak– Pilologus Baksa, Yulia, Nereus, hen zeno somola, hen Olimpas Baksa, hen tingare Kristen gwen wenya men zen deban mae lowehe gwenan. Desa hen kitak anakan enbiridak, “Paulus ebe mae hap dawem ensa gol sonezimki.”
¹⁶ Men kirekam Kristen zini etagal gwennak egwe gwenan, ansa de baca gulsun hyanak emki kwasang naban enaka tahasa goletowaran. Tingare awe de aya-wal oso-walya zen dawem ensa ebe mae hap nol sonezimk.
¹⁷ Aya-wal oso-wal, ee etan aumwa hap ol zim-zimsi ebe mae hap mas gulzimꞌin: Men zen ehliwen hap emsa titi da gwibirin, desa bahem salbirida gwen. Sap zeno mae mo tawa tabinni in hom apde neꞌan– men kirekam nonol emsa tawa da gwibikye. Sap zeno mae mo yasik tabinni in, dekam zep zini Kristussu de taibliblan nakon ealtil gwenan. Zep kirekam de zini langa lasik gwibik.
¹⁸ Sap kirekam de zini, zen neno mae mo Teipsin Zini Kristus mo syalsa hom noꞌan. Zen hwena zere mae mo dwam-dwam enlalasa dikim sul sonen hap kirekam syal ta gwenan. Zen yasik tabin hip ol derek-derekkam ba tame gun srem wenyaka noleton gwenan, hendep desan zep ang ta gwenan.
¹⁹ Hwena emsa tingare Kristen zini mes anakan tame dabik, “Romak de Kristen zini, zen eiwa tangankam Bian osan ang ta gweꞌan.” Zep kirekam de emsa sane ta gwibinkim, ee ama tangan emsa isrip-sri gwibirida gwenan. Ëe in zebe emsa titi tabiꞌin: Enlala blala ban em dawem ensa gol tine gwen. Hwena karek gol gwensa em hwalebin.
²⁰ Alap men zen tahana nebe mae hap deisu guzimꞌira, Zen sa nabakam dowal mo kigisa neno mae mo tana iltikinnik drenera– nen dikim ze zaublu inen hapye. Dikire Bian Yesus onakore kwasang-kwasangna eno mae mo enhonak lwa gwek.
²¹ Kristus mo nganak de syal bosena Timotius hen dawemsa ebe mae hap gol sonezimki. Hen kirekam ano Yahudi bose walya Lukius, Yason, hen Sosipater Bak, zen hen dawem ensa ep nol sonezimk.
²² Ëe, Tertius, men zene suratna ansa Paulus mo ol san ale guk, dawem ensae hen ebe mae hap gol sonezimꞌin, sap ee an hen eno mae mo Kristen bose.
²³ Gayus Bak hen dawem ensa ebe mae hap gol sonezimꞌira. Ëe, Paulus, angkam zeno golake gweꞌan, hen awe de jematna zeno golak tagal gwe-gwenan. Ë yala awe de pemerinta mo te-ala ait gweblan zini Erastus Bak hen dawem ensa ebe mae hap gol sonezimki. Neno mae mo Kristen bosena Kwartus Bak hen kirekam. [
²⁴ Dikire Bian Kristus Yesus mo kwasang-kwasangna ebon mae onak lwa gwek. In eiwa.]
²⁵ Men kirekame Kristus hup de ol dawemna gol halada gwenan, neno mae mo Alapna Zen sa emsa Yesussu de taibliblannak dikim tatem ezaun hup tatete ta gwibiri. Orep Alap mo kire hap de kalangna zi hip man aning gul gwizimki.
²⁶ Hwena ee zebe angkam zeno orep de ol aning gunnu insa Yahudi srem zi sin dep golzim halada gweꞌan– men kirekam hendep de gwe gwen Zini Alap Zena abe hap syala wei yul soneblakake, hen men kirekam orep zere mo olsa de ayang gul gwen zini hamal hap egu-guk gwekke. Hendep em Yahudi srem zi ausuna zebe angkam Kristussu laibli gweblaꞌan hen ang e gweblaꞌan.
²⁷ Dikire Kristus Yesus onakon Alap mo bosena hendep denaban teip nulsuk gweblak, sap Alap Zen Zen aha-en tangan– enlala blal Zi niye. Amin.