Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Panewa ndate yangi re’e anu to taa rapobiasa. Anu etu mampakaipu raya ntau pasi mawali tondong resi tau. Etu semo samba’a tau we’a to pakenya mata nu eo, pasi ia makore ri mata mbuya. Pasi ndate wo’onya re’e songko makole to re’e batu’e sampuyu pei dua mpa’i.
2 Tau we’a etu ia tongo mpoananya, pasi tempo moana etu, ia kaboo apa matida naepe.
3 Panewa re’e wo’u ndate yangi anu to ipu raya ntau mangkita, to mawali seja tondong. Etu semo ule naga to bae kojo pasi mawaa. Ule etu pitu wo’onya pasi sampuyu tondunya. Pasi ndate wo’onya pitu etu re’e songko makole. Ponto-ponto wo’onya etu paka ndate songko makole.
4 Wali iku nu ule etu mangawembo yau santila togo batu’e yako ndate yangi tasiba yau lo’u wawo nu lino. Wali ule naga etu maroo-roo ri tango ntau we’a to damoana etu, mangampeas tau we’a etu moana panewa ananya etu ia mansaka damangomo yau.
5 Wali yako etu ratamo temponya tau we’a etu moana, pei Ananya etu ana langkai. Ana etu Ia semo to damangkuasang samparia to lino, pasi tare to maya manganangi kuasaNya etu to raporapaka ewa toko wubu. Wali tempo Ana etu rapoanaka, ule naga damangomo yau Ia, pei taa mawali apa tempo etu Ana etu raoko pei rakeni yau nto’u si Pue Allah ndate tango nggaderaNya.
6 Wali yako etu tau we’a to owo moana etu ia miyai yau njo’u pada bone, apa nja’u ria re’e lipu to napasigenaka i mPue Allah ia. Wali ia darapiara nja’u ria sansowu dua atu pei ono mpuyu mbengi kasaenya.
7 Wali tempo etu aku mangkita re’e to masimusu ndate saruga. Re’e kepala mpomakau i mPue Allah, sanganya i Mikael. Wali i Mikael etu pasi pomakau to ia mangkuasang, sira mangamusu ule naga. Pasi ule naga etu pasi pomakau to si ia, sira mangamusu seja i Mikael.
8 Wali tempo sira masimusu etu, ule naga ia nangi pasi joanya. Wali sira tamo rabiaka maroo-roo ndate saruga.
9 Ule naga to bae etu ia rapanasoka yau yako ndate saruga. Ule naga etu semo ule to yako tempo owi, ule to rato’oka i maja’a pasi Kepala Measa. Ia semo to pantipu to mangantipu to lino samparia. Wali ia rapanasoka yau yako ndate saruga tudu ri wawo lino. Pasi pomakaunya seja rapanasoka yau sindara-ndara pei ia.
10 Wali yako etu aku mangandonge loo to maroso ri raya nsaruga, loo etu manganto’o, “Ratamo temponya i Pue Allah ngkita damampalaes tauNya. Si’i-si’i Ia mampapokitaka tau kuasaNya pasi Ia Makole ngkita. Pasi i Kerisitu, Makole parajanji i mPue Allah, Ia seja mampapokitaka tau kuasaNya. Apa room rapanasok yau yako ndate saruga ia to wuri eo mampakasala a’i-a’i ngkita ri tango i mPue Allah.
11 Wali a’i-a’i ngkita etu manganangi ia apa saba yako kuasa raa nu Ana Domba pasi apa saba tuntu i mPue Allah to napakarebaka nsira. Sira taa ojo mangampobuuka katuwu ngkoronya, apa nempo rapopate yau apa saba pangayanya, sira taa mandoo mangaya.
12 O Saruga pakasanang! Pasi samparia to maroo ri raya nsaruga, pakasanang raya ngkomi. Pei komi to maroo ri lino pasi ri tasi, komi masesa kojo apa i maja’a naratamo resi komi yako ndate yangi. Pasi ia maja’a kojo rayanya apa ia nansani tamo masae ia darata’amakamo.” Wali etu semo gombo to aku mangandonge.
13 Wali ule naga mangansani ia roomo rapanasoka yau yako ndate saruga tudu ri lino. Wali ia mangalambong tau we’a to mampoanaka Ana langkai etu.
14 Pei tau we’a etu ia rawaika dua pani to ewa pani nu bomboliano. Ia rawaika pani etu see ia maya mayoko mangampiyaika ule. Wali ia miyai mangampago lipunya nja’u pada bone. Nja’u lipu etu ia darapiara togo nto’u pei sampu’a kasaenya.
15 Wali ule naga to mangalambong tau we’a etu tamo narata, wali see naka ia mangayua ue to bae kojo yako ri nganganya tondo njo’u kanjo’u ntau we’a see tau we’a etu mandu yau.
16 Pei lino mangansawang tau we’a etu. Tempo etu tana tiloka, wali ue to masuwu yako ri nganga nu ule naga etu, semala yau ri raya ntana. Wali taa mandu tau we’a etu.
17 Wali ule naga ia maja’a kojo rayanya resi tau we’a. Wali ia yau mangamusu ana ntau we’a etu to yusa. Ana ntau we’a batuanginya etu semo samparia tau to mangalulu porenta i mPue Allah pasi mangangkongko anu to napotundeka i Yesu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA