Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nebeisa surgane nda iwau kaban sele ma yakauboke: miyae mbai hu malo yae feleuboke, oko noro keleene, nane merau na yunne ondofolole fokoma wanen findelau me bee oro nen bee bele yanainyekoke.
2 Nebei miyae uwa bele, hononde ya na hului yeubokene, ele kali bole.
3 Benen iwau hi surgane yakauboke. Eren, alaka mbai, hasai, nauwa kaban hele, na yun mehine bee, na tanduk me bee, na yun mehine beene ondofolo fokoma bele mo felaikoke.
4 Yakuna findelau yoni-yoni fo name alaka reme yae aweumi yobole nda kani kelare hekelewole. Nebei alaka wanen kiyae nda fa hononde mo na hibi hunengkonde naeise, honondere kole miyae na bene hebele.
5 Nebei miyae kelu fabe honoke. Neyae nda kani kelana ro miyae yanekoi yase ban mae mehukun besi yae me emmimokonde Kiyae. Hongke bele na hibi hele na mera nukaisake, Allahle bokore Naei kendan wamerande yae rokainyele ekate.
6 Allah yae Naei naeise relahi yae mokoungehake a kala-kala anuwaufe yae nebei miyae hakauboke ewole. Nebeinye ya 1.260 enainyeholende naeise.
7 Nebeisa surgane buloo fela yeuboke. Malaikat kaban Mikhaellere hakainyekoke malaikat yoni-yoni bele alakalere hakainyekoke walobo bele felane relaeinye.
8 Nebeibe alaka kiyaele holonare here waimibokene, nebei yo surgane anuwau ban yaeiboke.
9 Nebei alaka nendahina rami rorele mbai, walobo yoni-yoni naei yun kiyae. Na ro Setan, nda kani kela kabanda ro miyaere ame-amere wabeumi. Naei uwa bele na walobo yoni-yoni bele nda kani kelare hekelaikoke okate.
10 Reyae borale a mbai surgara elaekei yae kaenele, elele, “Nda naei hee niyae: Allah Naei holona ro miyaere holere moloumiboke, Naei me einye mo yaeiboke elae wakure keleumiboke, Naei yo waku mere mokondere raneujeke, nane merau Neyae oro umaufe heraungeboke Wali Ondofolo one hengko bele kiteungeboke. Rabuhine ban aei Wali Ondofolo einye aka baekere Allahle ro be ro yoinye reniai rai ahumbo-ahumbo koumiyeke kiyae surgara hukainyehikene.
11 Aei aka baeke wa yae ahumbo-ahumbo koumiyeke kiyaere Domba Kelule ha yae bele Naei naeise are isaeiwaimi bele yae meleumihake. Rabuhine ban naei wali buhaere eheikoi ban mae isaeiwaimine.
12 Nebei aerene surgane nekaube yo nanemene rei mai kaban kombere ya. Nebeibe beko embende, nda kani kela bele bu yau bele, rabuhine ban walobo yun mai bokore na ikele han romou wae akeuboke oke, rabuhine ban neyae isaeyeuboke naei ya fofo helene.”
13 Nda kani kela rande kainyehike oke naeise nebei alaka isaeyeuboke hee, na hibi hele nebei miyae kelu fare hongke kiyaere yambeisoke.
14 Alaka nekele anuwaufa ahau fele yae a kala-kala mokainyena anuwaufe nakengkonde ennekengkonde naeise, nebei miyaere aye bomekon kaban naei noro bee hele yaeinyekoke. Alaka nare beko mokonnebonde belene, ndine heki ralo yakama name bohi bele holenainyele.
15 Nebei miyae uware rowende ende naeise rami kiyaele ((alaka)) neuwara bu wi bumae elae wanen roroungeboke.
16 Nebeibe nda kani kela yae nebei miyaere hakoungeboke. Neyae wewe koukoke rami yae neuwara rorouboke bube huneukoke.
17 Alaka nebei miyaere ikele hele kowounge. Naei orona mena hiwa Allahle a weumire hubara haeisa yaneyainye ro miyae Yesuslena isaeyaeimi yore bele habelekeumi buloo fela relaeinye.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA